Tepet

◼ Akin a makagungguna ed saray dumerengel no nengnengen da iray tekston papaanap na espiker legan na paliwawa to?

Saray lugan na paliwawa a singa say sisingbaten a tema tan no kasin laktipen na paliwawa so bersikulo-por-bersikulon panangonsidera ed kabiangan na Salitay Dios so nadetermina no pigaran teksto so paanap ed dumerengel.

Importantin nodnonoten a say sakey a rason no akin a nengnengen iray teksto et pian pekderan so ibabagay Biblia. (Gawa 17:11) Say sakey nin gagala et pian usisaey Makasulatan ya ebidensia bilang suporta ed sisingbaten ta pian napabiskeg so pananisia ra. No natatalosan so tuan ibabaga na Biblia leleg a babasaen so manunan teksto, lalon onsepsep itan ed kanonotan. Nilikud ed pananap ed saray teksto, makagungguna so pannota tan pandengel a maong ed nipapaliwawa.

Anggaman dakel a Makasulatan a teksto so nisitas ed outline na Sosyedad diad panibukel ed tema, nitarya iraya a pakagunggunaan na espiker, pian sikatoy natulongan ed pamparaan to. Mangiter itan na magenap ya impormasyon tan pian natebek ton maong iray Makasulatan a prinsipyo tan pian natalosan toy inkatibukel na tema. Determinaen na espiker no antoran teksto so makana ed katibukel na paliwawa insan imbitaan toy dumerengel a mibansag ed sikato no basaen tan ipaliwawa to iratan a teksto. Nayarin bitlaen tan ipaliwawa toray katulongan a teksto, balet agla kaukolan a nengnengen ni na dumerengel.

Sano basaen na espiker iray apilin teksto, basaen ton direkta ed Biblia, ya aliwan diad say inimprinta ed computer. Sano imbitaan na espiker so dumerengel a mibansag ed pambasa, ibaga ton malinew so libro na Biblia, say kapitulo, tan (saray) bersikulo. Diad itunda pian mamalesa na tepet odino mankomento a magano no akin a basaen so teksto et naalagar toray dumerengel a makaanap ed teksto. Say pangulit ed nisitan teksto so makatulong met ed dumerengel pian natandaan da so tinukoy a teksto. Balet, agla nirekomendan ibaga to ni so pahina, lapud ta mandependi iraya ed partikular ya edisyon na Biblia ya uusaren na sinansakey ed dumerengel. Say inengneng ed saray teksto sano ibagan anapen iratan so makatulong ed dumerengel pian nagunggunaan manlapud say pakayari na Salitay Dios a singa nipapalinew legan na paliwawa.​—Heb. 4:12.