“Salita a Nibaga ed Dugan Panaon”
1 Kasin mairap parad sika so panginabang ed mensahe nipaakar ed bilay ed arum? Kasin isipen mo a nepeg moy mangibaga na bengatlan aralem pian nasagyat moray ondengel ed sika? Sanen imbaki nen Jesus iray babangatan to, inkuan to ed sikara: “No onla kayo, manpulong kayo, a kuan yo, Say panarian na tawen asingger la.” (Mat. 10:7) Say mensahe so aliwan masoliwet tan mainomay ya inabang. Mipadpara itan natan.
2 Kaslakan et pigara labat a salita so kaukolan pian nigapo so tongtongan. Sanen nabet nen Felipe so Etiopen eunoko, sikatoy tinepetan to: “Natalosan mo so babasaen mo?” (Gawa 8:30) Agaylan makatumang ya impantongtong a resulta na “salita a nibaga ed dugan panon”!—Uli. 25:11, NW.
3 Nayarian mon usaren so mipadparan iyaasingger sano manpulong ka. Panon? Diad pagmaliw a maimano tan pilien iray salita a matukoy ed saray sirkumstansya. Mantepet, tan dengelen so ebat.
4 Pigaran Manunan Tepet: Diad pangigapo na tongtongan, nayarian mon salien so dinanman ed sarayan tepet:
◼ “Kasin uusaren yo so Pikakasi na Katawan (odino, Ama Mi) ed panagdayew yo?” (Mat. 6:9, 10) Salambiten so kabiangan na satan, insan ikuan: “Walaray mangitetepet, ‘Antoy ngaran na Dios ya inkuan nen Jesus a nepeg a napasantos (odino, igalang)?’ Arum so mangitetepet na, ‘Anto so Panarian ya imbaga nen Jesus ya ipikasi tayo?’ Kasin nalmo yo la so makapenek iran ebat ed sarayan tepet?”
◼ “Kasin naumameng yo la: ‘Antoy kabaliksan na bilay?’” Ipanengneng a misiglaotan itan ed pikakabat nipaakar ed Dios.—Ecl. 12:13; Juan 17:3.
◼ “Diad padesir yo, kasin naandi so ipapatey?” Usaren so Isaias 25:8 tan Apocalipsis 21:4 pian iter so napanmatalkan ya ebat.
◼ “Wala tay simplin solusyon ed pirmin kaguloan ed mundo?” Ipabitar ya ibabangat na Dios ya ‘aroen so kaparam a too.’—Mat. 22:39.
◼ “Kasin say malaknab a desyang ed talba so maneral ed dalin tayo ed isabi na panaon?” Inabang so sipan na Biblia a say dalin so mansiansia ed ando lan ando.—Sal. 104:5.
5 Iparungtal so maong a balita diad simpli, direktan paraan tan tekep na mapangasin iyaasingger. Bendisyonan nen Jehova iray sagpot yo ed panginabang na anggan sakey a “salita” na katuaan ed arum.