Bayuboan so Apalesan Interes Panamegley na Kingdom News No. 36
1 Kasin nibunog yo lay apag yon Kingdom News No. 36? Itetepet na satan so nipanpanaon a tepet a pan-imatlekan na amin: “Say Balon Milenyo—Anton Arapen so Itatarya na Saya ed Sika?” Leleg a manasingger so taon 2000, nanduruman tuloy iray iilaloan no antoy itarok na balon milenyo. Sasaglawien na Kingdom News No. 36 so pigara ed saratan ya iilaloan tan ipapanonot na satan ed sikatayo a saray kipapasen ed mundo so agmakapangiter na panseguro. Say alenleneg a milenyo a mangitarok na deen tan kaligenan ya aanapen na maslak a too et say Milenyon Uley nen Kristo Jesus. Lapud talek tayo ed inkapeteg na sayan Panarian, napakiwas itayon ibunog so Kingdom News No. 36 ed amin a nabunogan tayo.
2 Saray Inkiwas ed Kingdom News: Diad saray apalabas ya impangibunog ed Kingdom News et apaneknekan ya apakiwas itayon maong nipaakar ed kimey tayo. Nipaakar ed Kingdom News No. 35, insulat na sanga ed Canada: “Sayan espisyal a kampanya so maligsan sinuportaan na saray manangipalapag tan payunir dia ed lawak, tan dakel so makapaseseg ya eksperiensian nanggayagaan.” Andi-duaruwan impatnag yo met so ontan a ligsa ed impangibunog ed Kingdom News No. 36.
3 Say peles a kampanya na Kingdom News so inyeskedyul angga ed Nobyembre 17, 2000. Kasin akobrian lay amin a teritorya ed kongregasyon yo? No andi ni, kerewen ed sikayo na mamatatken ya itultuloy yo ni so kampanya anggad sampot na Nobyembre.
4 Komustay lay inkiwas ed lugar yo diad kibubunog na Kingdom News No. 36? Pigaran totoo so mansulat ed kupon tan onkerew na kopya na brosyur a Kakaukolanen tan/odino panangiyaral na Biblia. Balet, kaslakan ed saramay angipatnag na interes diad unonan pankanawnawa dia ed say tema nipaakar ed milenyo so agni onkiwas anggad agni makapawil iray Tastasi nen Jehova. Kaukolan a pawilen so amin ya angipanengneng na interes. Kapigan so maabig a panaon ya ipawil? Pawilen komon a tampol no nayadyari.
5 Imanoen irayan eksperiensia a resulta na ipawil ed saray apalimaan na Kingdom News No. 35. Sakey a payunir ed Ireland so angitilak na Kingdom News ed makankien na restawran. Asagyat so bii ed mensahe kanian inimbitaan ton ompawil so agin bii. Pinmawil so agi ed mikaduan agew, et nigapoy panangiyaral na Biblia. Diad Denmark, intilak so kopya na Kingdom News ed sakey ya abung ya anggapoy too. Diad saman met lanlamang ya agew say biin manaayam diman so angipawit na kupon ed sangan opisina, a satan so niyareglo ed lokal a kongregasyon. Ag-apalabas so sakey simba, pinmasyar so duaran agin bii, inyuksoy so panagaral, insan inmatendi so bii diad pilimeron impiaral to ed Kingdom Hall!
6 No Antoy Ibaga Sano Ompawil Kayo: Mainomay met labat so pamawil ed apalimaan na Kingdom News tan satan so makapaliket a kabiangan ed ministeryo tayo. Sano ompawil kayo, magmaong no mangawit kayoy kopya na Kingdom News No. 36, lapud nayarin anggapoy kopya na onabung. Nayarian yon usaren irayan suhestion.
7 Kayari yon impanonot ed onabung no siopa kayo, nibaga yo:
◼ “Angitilak ak ed sikayo na babasaen ya apauloan na ‘Say Balon Milenyo—Anton Arapen so Itatarya na Saya ed Sika?’ Agta makapaseseg so pakabasa a magano lan onggapoy Milenyon Uley nen Kristo Jesus, a mangitarok na Paraiso iran kipapasen diad dalin? [Ipanengneng iray litrato na Paraiso diad Kingdom News No. 36.] Diad beneg a pahina, nibaga ed sikayon onkerew na sakey a kopya na brosyur ya Anto so Kakaukolanen na Dios ed Sikayo?” Ipanengneng so brosyur, ibukay ed leksion 5, basaen so unonan tepet tan parapo 1 tan 2, insan pankomentoen so onabung. Basaen tan singbaten so sakey odino duaran teksto. No nayari, singbaten so arum nin tepet tan parapo, insan iyuksoy so ipawil pian ituloy so diskusyon.
8 Lapud say ontumbok ya opresi parad Nobyembre et say brosyur a “Kakaukolanen” odino say libron “Pikakabat,” nayari yon ibaga:
◼ “Sanen sampot ya imbisitak ed sikayo, intilakan takayo na kopya na ‘Say Balon Milenyo—Anton Arapen so Itatarya na Saya ed Sika?’ Iyoopresi na satan so libren panagaral na Biblia. Pinmawil ak pian ipanengneng ed sikayoy katulongan a panagaral ya uusaren mi. [Ipanengneng so brosyur a Kakaukolanen, insan ibukay ed apis ed beneg; odino ipanengneng so libron Pikakabat, insan ibukay ed pahina 188-9.] Say Milenyon asaglawi ed Biblia so mangitarok ed saray kipapasen a singa nanengneng yo ed sayan litrato. Pian onkualipika ed bilay diad Paraiso, kaukolan tayoy mangala na suston pikakabat ed Dios. Abuloyan yo ak pan mangidemostran magano no panon tayon aralen so Biblia.”
9 Say impangibunog ed Kingdom News No. 36 so amakiwas ed sikatayon palaknaben so pibibiang tayo ed ministeryo, a manresulta ed baleg a panagtasi. Nayarin saya so anagyat ed interes na dakel a totoo diad teritorya. Diad tulong nen Jehova, say nankakasakey a sagpot tayo pian nabayuboan a maong iyan interes so manresulta ed magayagan panaanap tayo ed dakel niran kinmarnero.—Mat. 10:11; Gawa 13:48, 49, 52.