“Say Balon Milenyo—Anton Arapen so Itatarya na Saya ed Sika?”
1 Satan a tepet so abayag lan walad kanonotan na totoo ed intiron dalin. Anggaman dakel lay agawaan na katooan ed pigaran siglo, nadidismaya so totoo lapud wala nin siansia iray manunan problema a manasalot ed totoo ed dakel lan milenyo. (Job 14:1; Sal. 90:10) Iner so pakaromogan na katooan na inawa?
2 Diad bulan na Oktubre tan Nobyembre, nawalaan itayo na nikabiig a pankanawnawa pian ebatan itan a tepet ed kakaabay tayo. Panon? Diad pangibunog ed Kingdom News No. 36. Atituloan iya na “Say Balon Milenyo—Anton Arapen so Itatarya na Saya ed Sika?” Diad pilimeron kapaldua na bulan na Oktubre, iyopresi tayoray magasin a Panag-Bantayan tan Awake! Insan no Lunes, Oktubre 16, ya angga ed Biernes, Nobyembre 17, mibiang itayo ed malaknab a panangibunog ed Kingdom News No. 36. Legan na sayan kampanya, iyapasakey tayo so pangipalima ed Kingdom News No. 36 diad saray simplin agew. Diad saray sampot simba, iyopresi tayo itan katekep iray balon magasin.
3 Sigpot Kayo Kasin Mibiang? Kaliktan na saray mamatatken, ministeryal a lingkor, tan payunir so mangidaulo ed sayan kampanya, lapud sikaray manunaan ed sayan kimey. Inyarunsa na dakel a manangipalapag iray sirkumstansia ra pian makapan-auxilary payunir legan na sakey odino duaran bulan na panagbunog. Implano na arum so pangusar na malaglaem a panaon dia ed ministeryo.
4 Nayarin nausar a mamaseseg iray konduktor na Panagaral na Libro ed Kongregasyon ed kada membro na grupo ra pian sigpot a mibiang ed panagbunog na Kingdom News No. 36. Nayarin walaray manangipalapag ya inaktibo la ed kimey na panagpulong. Kaukolan a bisitaen iraya na mamatatken ya amtaen no antoy nagawaan pian natulongan iratan. Nayarin iyuksoy ed eksperiensiadon manangipalapag ya ibaan toy inaktibo a manpulong legan na sarayan bulan. Say nakaukolan labat et say simplin presentasyon na Kingdom News No. 36 pian napaaktibo lamet irayan manangipalapag.
5 Maabig met iyan pankanawnawa parad saray iyaaralan na Biblia a ngalngali da la nasumpal so libron Pikakabat insan onkualipika lan agbautismadon manangipalapag pian onggapon manpulong. Anggan saray ugugaw so nawalaan na maabig a pibiang ed sayan makapasagyat a kimey.
6 Simpli labat a presentasyon so nakaukolan. Nayarin ikuan yo:
◼ “Angigana ak na panaon ko pian ontulong ed pangibunog ed sayan importantin tuloy a mensahe ed kada pamilya diad [ibaga so syudad odino baryo]. Nia so kopya yo. Ipangasin basaen itan.” Magmaong no agmangaawit na bag a panagpulong sano ibubunog so Kingdom News No. 36.
7 Implanon-Maong Iran Miting Parad Lawak na Kimeyan: Nepeg a seguroen na mamatatken a say uksoyan na panagpulong so kombenienti tan praktikal. Nagkalalo lan seguroen na manangasikaso na serbisyo a walay malaglaem a teritorya a pankabkaabungan tan pasen na negosyo ta pian amin so sigpot a makapibiang ed kimey. Inerman a posibli, kaukolan a naorganisa iray miting ed serbisyo ed kada simplin agew, ed sampot simba, tan ed saray labi. Gawaey uksoyan na pambabana diad mansirunget pian minabang iray eskuela, walay shift iran trabahador, tan arum nira.
8 No Antoy Gawaen No Anggapoy Onabung: Say kalat tayo et say pitongtong ed dakel ya onabung no nayadyari. No anggapoy too ed abung sano ondalaw kayo, isulat so address tan ompasyar diad arum a panaon. No diad sampot lan simba na kampanya et agyo ni apitongtongan irayan onabung, itilakan yo ra na kopya na Kingdom News No. 36 ya iseguron naala ra itan a basaen. Nayarin idirehi na mamatatken iray agagi ed kongregasyon a mangitilak na sakey a kopya na Kingdom News No. 36 diad saray anggapoy onabung diad unonan dalaw sano mankikimey ed nisulinek a lugar tan diad saray maawang a teritorya ya agnasumpal a kobrian legan na kampanya.
9 Dakel Komon so Nagawaan Tayo! Panggunaetan komon na saray kongregasyon a kobrian so teritorya ra sakbay a nasumpal so kampanya no Nobyembre 17. No maawang a maong so teritorya yo, nayarian na arum a manangipalapag so mankimey a bukor no praktikal tan aliwan delikado. Lapud sayan uksoyan et mas mainomay a nasabi so dakel nin makanepegan no nayadyari. Seguroen ya iyatol so maabig a rekord na amin ya aromog ya interesado.
10 Kaukolan ya amtaen lan unona na mamatatken no kaunongan karakel a kaaruman a magasin so nakaukolan na kongregasyon pian napedidon tampol. Agla kaukolan a pedidoen so Kingdom News No. 36, lapud magenap lay nipawit ed balang kongregasyon. No iner a walay magenap a teritorya, makaawat so kada espisyal, regular, tan auxiliary payunir na 250 a kopya ya ibunog, bangta ikdan iray balang sakey a manangipalapag ed kongregasyon na 50 a kopya. Kasin akaparaan tan magunaet kayo la pian dakel so nagawaan yo ed sayan espisyal a kimey? Agaylan pribilihyo tayo ya ipaamta ed kakaabay tayo ya asingsingger lay insipan na Dios!