Espisyal a Kampanya ed Tract Oktubre 20–Nobyembre 16!
1 Onggapo ed Lunes, Oktubre 20, tan mantultuloy ed loob na apatiran simba, mibiang itayo ed espisyal a kampanya ed pangibunog ed balon tract ya apauloan na Kasin Labay Mon Naamtaan so Katuaan? Iilaloan a sayan sankamundoan ya espisyal a kampanya et managyat ed interes na totoo ed saksakey a lapuan na katuaan.—Juan 17:17.
2 Say tract so mangiiter na antikey iran ebat na Biblia ed anemiran importantin tepet: “Talaga kasin inaro itayo na Dios?” “Manampot ni kasi guerra tan paniirap?” “Anto so nagawa ed sikatayo sano ompatey itayo?” “Wala ta so ilalo na saray inaatey?” “Panoy dugan pampikasik pian dengelen ak na Dios?” tan “Panon ak a magmaliw a maliket?” Saray relihyon na Kakristianoan so agbalot akapangiter na makapenek iran ebat ed sarayan tepet. Anggaman pankelawan iratan a pamaakaran na dakel ya agmangipapasen a sikara et Kristiano, balet nayarin agda amta a naromog ed Biblia so malinew iran ebat. Kanian, ilaloan tayon dakel a totoo so nasagyat ed sayan mensahe.
3 Kimeyan so Teritorya Yo: Panggunaetan a diad pankabkaabungan et baleg so nakimeyan a teritorya. No maawang so teritorya yo, nayarin ipaseseg na saray mamatatken a mangitilak kayo na sakey a kopya na tract diad kaabungan ya anggapoy nasabi ed unonan iyakar. Aglilingwanan ya ikdan na kopya iray kakaabay, kakanayon, kabat ed trabaho odino diad eskuelaan, tan arum a nakakatongtong yon mabetbet. Nayarin iplano yoy man-auxiliary payunir ed Oktubre odino Nobyembre. Wala tay anak yo odino iyaaralan yo na Biblia ya onaaligwas la ed katuaan tan nayarin kualipikadon mibiang ed sikatayo ed sayan kampanya bilang agbautismadon manangipalapag? No wala, itongtong ed saray mamatatken.
4 No Antoy Ibaga: Ta pian dakel a totoo so napasabian ed sayan mensahe, sankaabigan no antikey labat so presentasyon yo. Simpli labat so gawaen, itepet ed unabung so sakey ed anemiran tepet a walad apis tan ipanengneng ed sikara so ebat ed tract. Saya so mangiyabuloy ed amin a manangipalapag ya itukoy so presentasyon da ed pankaukolan na teritorya. No walay angipatnag na interes, isulat itan tan pawilen itan ya interesado. Diad saray sampot simba, saray peles a magasin so nayarin iyopresi katekep na tract. Sano nasumpal la so kampanya no Nobyembre 16, iyopresi tayo so libron Ibabangat na Biblia. No walay nakera iran tract, usaren iratan ed regular a paraan a singa ed arum a tract.
5 Pangigapo na Panangiyaral na Biblia: Say gagala na sayan tract et pian tulongan itayon mangigapo na saray panangiyaral na Biblia. Sano pawilen iray interesado, nayarin itepet yo no dinan a katuaan na Biblia so akaligliwa ed sikara odino akaliknaan day inawa? Ipaimano so beneg a pahina nipaakar ed uksoyan tayo ed panangiyaral na Biblia, tan palimaan na sakey a kopya na libron Ibabangat na Biblia. No posible, singbaten ed antikey so sakey odino duaran parapo na kapitulo a mangisasalaysay ed tema a pinili to.
6 Aanapen nen Jehova iramay mandayew ed sikato “ed espiritu tan katuaan.” (Juan 4:23) Komon ta mibiang tayon amin ed sayan espisyal a kampanya pian tulongan so arum a naamtaan so katuaan!