Ibunog so Kingdom News No. 38 no Enero!
1. Anto ray tepet na totoo nipaakar ed patey, tan panon iratan ya naebatan no Enero?
1 Say patey et kabusol na amin a totoo, antokaman so relihyon da. (1 Cor. 15:26) Iisipen na dakel no iner kasi kawalaan na inaatey tan no kasin nanengneng da lamet ira. Kanian, saray kongregasyon diad interon mundo et mibiang ed sakey bulan ya panangibunog na Kingdom News No. 38, ya say tema to et Talaga Kasin Nabilay Lamet Iray Inaatey? Sayan espisyal ya kampanya et onggapod Pilipinas no Enero 1, 2014. Kayari na sayan espisyal ya panangibunog, say Kingdom News No. 38 et usaren ed ministeryo bilang tract.
2. Panon so inkadesinyo na Kingdom News No. 38?
2 Say Inkadisenyo na Satan: Say Kingdom News No. 38 et denisinyo ya itupin padukey pian nanengneng ed arap so makapainteres a title tan say tepet ya “Kasin say ebat mo et . . . on? andi? seguro?” No lukasan na manbabasa so Kingdom News, nanengneng toy ibabaga na Biblia ya ebat ed samay title tan no antoy nitulong ed sikato na promisa na Biblia. Nanengneng to met iray rason no akin ya napanisiaan toy Biblia. Diad beneg na Kingdom News et walay makapainteres a tepet ya nayarian ton panisipan tan impormasyon no panon a makaaral ni.
3. Panon ya ibunog so Kingdom News No. 38?
3 No Panon Itan ya Ibunog: Sayan kampanya et mipara ed panangibunog na imbitasyon parad Memoryal tan distriton kombension. Mangiter na instruksion iray elder no panon ya sumpalen so teritorya na kongregasyon, base ed naawat dan sulat ya apetsaan na Abril 1, 2013. Saray kongregasyon ya melag so teritorya da et nayarin ontulong ed asingger iran kongregasyon ya mas baleg so teritorya da. No mangalay ibunog mon Kingdom News No. 38, tandaan ya mangala labat na kaukolan mo parad sakey simba. Legan na kampanya, no asumpal lay amin ya teritorya parad panagkabkaabungan, sarag yo lan usaren iray akeran kopya diad pampulong ed publikon lugar. No naupot lay suplay antis ni na sampot na bulan, usaren so opresi ed satan ya bulan. Diad unonan Sabado na Enero, manpokus tayo ed espisyal ya kampanya imbes ya diad pangigapoy panangiyaral na Biblia. Diad saray weekend, no matukoy, kaukolan ya iyopresi tayo ray magasin. Kasin manpaplano ka la pian makapibiang ed sayan espisyal ya kampanya?