Pangibunog na Imbitasyon ed Memoryal ya Onggapo no Marso 1
1. Kapigan onggapo so kampanya na pangimbitad Memoryal, tan akin et mas andukey iya natan?
1 No Biernes, Marso 1, igapo tayo so tinaon ya kampanya na pangimbitad arum ya onatendid Memoryal. Nagawa so Memoryal no Marso 26, kanian mas andukey so kampanya natan nen say diad imbeneg iran taon. Tan diad saray kongregasyon ya baleg so teritorya ra, mas dakel so naikdan day imbitasyon.
2. Anto ray uksoyan diad pangalay imbitasyon tan panumpal ed teritorya?
2 Saray Uksoyan: Iter na saray elder so instruksion no panon ya sumpalen so teritorya, pati no kasin itilak iray imbitasyon no anggapo ray unabung. No asumpal lay amin ya teritorya balet wala ni keran imbitasyon, nayarin ibunog iratan diad pampulong ed publikon lugar. Seguroen na manangasikaso na serbisyo ya walay naalan imbitasyon diad magasin counter, ya asulatan na address tan oras. Balet ag-ipapaway ya maminpinsan so amin ya imbitasyon. Nepeg ya say alaen tayo labat et samay kaukolan tayod sakey simba.
3. Antoy nepeg tayon tandaan no mangibunog tayoy imbitasyon?
3 Antoy Ibaga Tayo? Mas maabig no antikey labat so ibaga tayo pian mas dakel so nakatongtong tayo. Diad pahina 4 et walay pangaligan ya presentasyon ya sarag tayon itukoy ed teritorya tayo. Siempre, agtayo met onalis ya tampol no makaaro so householder odino wala ray tepet to. Sano mangibubunog na imbitasyon diad weekend, nepeg ya mangiyopresi tayo met na magasin no matukoy. No Marso 2, manpokus tayod pangibunog na imbitasyon imbes ya mangigapoy panangiyaral na Biblia.
4. Akin ya nepeg a maseseg tayon mibiang ed kampanya?
4 Iilaloan tayon dakel so nakaiba tayod Memoryal. Diad paliwawa, naamtaan no siopan talaga si Jesus. (1 Cor. 11:26) Nipaliwawa no panon ya say impatey to et makatulong ed sikatayo. (Roma 6:23) Tan nidanet no akin ya importantin sikatoy nodnonoten tayo. (Juan 17:3) Komon ta maseseg tayon mibiang ed sayan kampanya!