Onggapoy Pangibunog na Imbitasyon ed Memoryal no Marso 22

Diad sayan taon, onggapo no Sabado, Marso 22, so pangimbita tayod saray totoo pian onatendid Memoryal. Papasesegen so amin ya sigpot a mibiang. Diad saray weekend, iyopresi tayo met iray balon magasin no matukoy. Diad unonan Sabado na Abril, manpokus tayod pangibunog na imbitasyon imbes ya diad pangigapoy panangiyaral na Biblia. Balet, no walay nakatongtong tayon interesado, sarag tayo nin siansian mangigapoy panangiyaral na Biblia. Ikonsidera na manangasikaso na serbisyo no kasin makatulong so pangibunog na imbitasyon diad panagpulong ed publiko pian mas dakel so naimbitaan diad teritorya da. Ilista la natan iray kakanayon, katrabaho, kaklase, saray papawilen, tan arum ni ran kabat mo ya labay mon imbitaan, insan mo ra ikdan na imbitasyon no onggapo lay panangibunog. Komon ta dakel so nakaiba tayo diad pannodnonot tayod baleg a panangaro nen Jehova tan nen Jesus.​—Juan 3:16; 15:13.