Pangibunog na Imbitasyon ed Memoryal ya Onggapo no Abril 2
1. Kapigan so pangibunog tayoy imbitasyon ed sayan taon, tan akin et importante iyan tinaon a kampanya?
1 Manlapud Abril 2 anggad Abril 17, mangibunog itayo na imbitasyon parad sankaimportantian ya selebrasyon ed taon—say Memoryal na impatey nen Kristo. Diad apalabas, dakel ya interesado so angawat ed sayan tinaon a kampanya. Alimbawa, diad agew na Memoryal et tinmawag so sakey ya bii ed sangan opisina tan inkuan to: “Kasabik ed abung, walay imbitasyon ed silong na puerta mi. Labay koy onla, balet agko amta no anton oras.” Impaliwawa na agi no iner so pakabasaan ed satan ya impormasyon diad imbitasyon. Sinampotan na bii so tongtongan diad impangipaseguron, “Onla ak ed selebrasyon yo naani labi!”
2. Antoy nayarin ibaga tayo sano mangiter tayoy imbitasyon?
2 No Panoy Pangibunog: Lapud limitadoy panaon tayo pian kobriay interon teritorya, mas maabig no magano tayo labat. Nayarian tayon ibaga: “Labay mi kayon imbitaan ed importantin tinaon a selebrasyon a nagawa’d sankamundoan no Simba, Abril 17. [Iderew so imbitasyon ed unabung.] Satan a petsa so anibersaryo na impatey nen Jesus. Walay nibase’d Biblian diskurso a mangipaliwawa no panon itayon minabang ed dondon nen Kristo. Akasulat dia no iner nagawa tan no anton oras.”
3. Antoy gawaen tayo pian dakel so naimbitaan anggad posible?
3 No maawang so teritorya na kongregasyon, nayarin desidien na saray elder so pangitilak na imbitasyon ed saray ayaman ya anggapoy unabung, balet ikarga ed pasen a sankanengneng. Seguroen ya imbitaan iray return visit, kakanayon, katrabaho, kaeskuela, tan arum niran napipilimogan yo. Sano mibiang ed panagbunog diad saray weekend, mangiyopresi na magasin no matukoy. Sarag mo kasi man-auxiliary payunir no Abril tan nawalaay malaglaem a panaon diad pibiang ed sayan maliket a kampanya?
4. Akin et labay tayon onatendi’d Memoryal iray interesado?
4 Talagan alay abig a pantasi so naawat na saray onatendin interesado! Narengelan day abalbaleg a panangaro nen Jehova diad impangitarya to na dondon. (Juan 3:16) Naaralan da no panon a nabendisyonan so katooan panamegley na Panarian na Dios. (Isa. 65:21-23) Napaseseg met iran onasingger ed saray attendant tan man-request na panangiyaral na Biblia. Ipipikasi tayon dakel a matuan impanpuson totoo so onkiwas ed sayan kampanya tan onatendi ed Memoryal!