Panangibunog na Imbitasyon Parad Memoryal Diad Sankamundoan!
1. Anton espisyal a kampanya ed interon mundo so nagawa sakbay na Memoryal?
1 “Itultuloy yon gawaen iya bilang pakanodnonotan ed siak.” (Luc. 22:19, NW) Bilang panangunor ed sayan ganggan nen Jesus, mantitipon iray managdayew nen Jehova, kaiba iray interesadon totoo no Marso 30, 2010 pian nodnonoten so impatey nen Jesus. Sakey ya espisyal ya imbitasyon parad Memoryal so ibunog ed interon mundo manlapud Marso 13 anggad Marso 30.
2. Panon tayon iter so imbitasyon?
2 No Panon Itan a Gawaen: Nayarian yon iyawat a mismo so imbitasyon ed katongtong yo pian nanengneng toy litrato, insan yo ikuan: “Diad labi na Marso 30, minilyon a totoo ed interon mundo so mantitipon pian nodnonotey impatey nen Jesus. Wadia ak pian iter so imbitasyon a parad sikayo tan ed pamilya yo. Sarag yo met ya ipila iray kakaaro yo. Ipangasin imanoen so oras tan pasen a pakagawaan na saya.” Depende ed kipapasen, nayarian yon basaen so Lucas 22:19 pian ipaimano so Makasulatan a ganggan ed panselebra. Nodnonoten balet a lapud antikey labat a panaon so nigana pian nakobrian so interon teritorya, magmaong no magano kayo labat.
3. Sioparay imbitaan tayo?
3 No maawang so teritorya na kongregasyon yo, nayarin desidien na saray elder ya ipatilak la’d sikayo iray imbitasyon ed saramay abung ya anggapoy nasabi yo. No matukoy, sarag yo met ya iyopresi iray magasin a kaiba na imbitasyon. Agyo lilingwanan ya imbitaan iray papawilen yo, iyaaralan na Biblia, katrabaho, kaeskuela, kakanayon, kakaabay, tan arum niran kaulop.
4. Lapud aapresyaen tayo so impangitarya nen Jehova na dondon, anto so gawaen tayo?
4 Manparaan Pian Sigpot a Makapibiang: Sankaabigan a panaon so Memoryal pian padaaken so kimey tayo. Kasin niyarunsam so eskedyul mo pian makapan auxiliary payunir ka? Walara kasi anak mo odino iyaaralan moy Biblia ya onaaligwas ed espiritual? No wala, onasingger ed saray elder pian naamtaan no kasin kualipikado la ran mibiang ed sayan espisyal a kampanya bilang agbautismadon manangipalapag. Say pangapresya ed panangaro nen Jehova diad impangitarya toy dondon so aglabat mamakiwas ed sikatayon onatendi ed Memoryal noagta mamaseseg met iya ed sikatayon mangimbita na amayamay ya onatendin kaiba tayo.—Juan 3:16.