Tepet
◼ Panon a tulongan so abayag lan inaktibo pian onkualipika lamet bilang manangipalapag na maong a balita?
Sano ipatnag na inaktibo a sikatoy masimoon tan manpilalek a manlingkor ed si Jehova, panliketan iya. (Luc. 15:4-6) Nayarin lapud isusumpa odino pakadetdetan ed bilay, say sakey et anggapo lay panaon ton personal a manaral, miaral, tan manpulong. Panon a niiter so sankaabigan a personal a tulong ta pian sikatoy onaligwas ed espiritual?
Kaukolan ya amin tayo so manbulon ya ipaseguro ed sikato so puron Kristianon panangaro tayo ed sikato. Akaparaan iray mamatatken a mangasikaso ed saray episipikon espiritual a pankaukolan to. (Sant. 5:14, 15) No agano nin inaktibo, anggan say eksperiensiadon manangipalapag so makasarag lan ontulong pian sikatoy napaaktibo lamet diad lawak na kimeyan. Balet, no abayag lan agmililimog ed kongregasyon so inaktibo, nayarin nagkalalo ni kaukolan a tulong. Pian napabiskeg ed pananisia tan apresasyon, nakaukolan so personal a panagaral na Biblia dia ed matukoy a publikasyon. Lapud satan, iyuksoy na manangasikaso na serbisyo ed kualipikadon manangipalapag so mangiyaral ed sikato. (Heb. 5:12-14; nengnengen so “Tepet” ed Nobyembre 1998 a Ministeryo Tayo ed Panarian.) No walay amta yon kaukolan toy ontan a tulong, ibaga ed manangasikaso na serbisyo ed kongregasyon yo.
Sakbay ya imbitaan a manpulong so abayag lan inaktibo, magmaong no katongtongen ni na duaran mamatatken pian amtaen no sikatoy kualipikado bilang manangipalapag na Panarian. Tumboken da so paraan a singa impitongtong ed saray balo ni a manggugunaet ya onkualipika bilang manangipalapag na maong a balita. (Nengnengen so Nobyembre 15, 1988, a Watchtower, pahina 17.) Kaukolan a nawalaan na masimoon a pilalek so inaktibo a manginabang na maong a balita ed arum. Kaukolan to met a kapeten iray manunan kakaukolanen a nidatak ed pahina 98-9 diad libron Our Ministry tan maparanay ya onatendi ed saray miting ed kongregasyon.
Baleg so nagawaay pakawalaan na maabig ya espiritual a rotina pian natulongan so ompapawil a napabiskeg tan napansiansia toy mablin siglaotan to ed si Jehova tan mansiansian manakar ed dalan ya ompugta ed andi-anggaan a bilay. (Mat. 7:14; Heb. 10:23-25) Diad pansagpot ton “pangiyan na seseg” tan pamaaligwas ed saray Kristianon kualidad a mansiansia, sikatoy aglamet ‘manmeneng odino ag-ombunga’ bilang sakey a Kristianon babangatan.—2 Ped. 1:5-8.