Aglilingwanan Iramay Inaktibo
1. Akin a nepeg tayon panggunaetan a pasesegen iramay nagmaliw ya inaktibo?
1 Wala ta so kabat yon nagmaliw ya inaktibo? Anganko et sikatoy agla mililimog ed kongregasyon tan kinmasipa la. Nayarin walay aromog yon inaktibo legan na pankakabkaabungan yo? Tandaan tayo a say inaktibo et siansia nin kaagian tayo ed espiritual. Kanian, kaukolan tayo ya ipalikna ed sikato so panangaro tayo diad panulong ed sikaton makapawil ed kongregasyon tan ed ‘saray pastor tan obispo na saray kamarerwa tayo.’—1 Ped. 2:25.
2. Panon tayon napaseseg so sakey ya inaktibo?
2 Ipatnag ya Interesado Kayo: Say itawag a magano ed telepono odino say ibisita so mangipaseguro ed samay inaktibo a sikatoy agtayo alingwanan. Anto balet so nayari tayon ibaga? Diad pangipaamta tayo labat a sikatoy nononoten tayo et napaseseg tayo la. Pansiansiaen yon positibo tan makapaseseg so tongtongan. (Fil. 4:8) Nayari tayon salambiten so sakey a punton agusgustoan tayo ed agano nin impi-aral tayo. Sikato met so nayari tayon imbitaan ed ontumbok ya aral odino magano lan nagawan asamblea tan ibagan ireserbaan tayo la na yurongan odino paluganen tayo ra.
3. Panon a nagmaliw lamet ya aktibo so sakey ya agin bii?
3 Walay aromog ed teritorya a sakey ya agin bii a masulok lan 20 taon ya inaktibo. Anggaman masuyat a paiyaralan na Biblia, samay agin biin akaromog ed sikato so aminpigan pinmawil tan angitilak na saray balon magasin. Kayari na distriton kombension, innabang na manangipalapag ed inaktibon agi iray pigaran pabitar a punto ed kombension tan diad kaunoran et sikatoy nagmaliw lamet ya aktibo.
4. Panon so nepeg a pantrato tayo ed sakey ya ontubat lan milimog diad piaral to?
4 Sano Ompawil lay Inaktibo: Sano ontubat lan miaral so inaktibon agi, panon so nepeg a pantrato tayo ed sikato? Bueno, panon ta so impantrato nen Jesus ed saray babangatan to anggaman diad aminsan et sikatoy inabandona ra? Sikatoy nankompiyansa ed sikara tan maad-aro toran tinawag ya “agagik.” Inmatalek to ni ingen ed sikara so sakey ya importanten asainmin. (Mat. 28:10, 18, 19) Ag-abayag kayari na satan, sikara lay ‘andi-tundan’ angiyabawag ed maong a balita.—Gawa 5:42.
5. Salambiten iray pamaakaran nipaakar ed sakey ya inaktibo a nepeg tayon ipanon ed saray mamatatken.
5 Sakbay tayon opresian na panangiyaral na Biblia odino itagar a manpulong so sakey ya abayag lan inaktibo, nepeg tayon ipanon ni itan ed saray mamatatken. No walay aromog tayon inaktibon manangipalapag ed teritorya tayo, nepeg tayon ipaamta itan ed saray mamatatken ta pian niiter day nakaukolan a tulong.
6. Antoy nayarin panliketan tayo diad panulong tayo ed saramay inaktibo?
6 Singa ed malinlinew lan ipapanengneng na Biblia, saramay misungdo labat anggad kasampotan so nilaban. (Mat. 24:13) Kanian, anapen iramay atiror odino kinmasipa. No maan-anos tayon ipalikna ed sikara so panangaro nen Jehova diad pangipatnag tayoy peteg ya interes ed sikara, nayarin nanengneng tayo ran ontubat a manlingkor ed Dios a kaiba tayo, tan talagan makapaliket iya.—Luc. 15:4-10.