Pananesdes na Kalimog tan say Pribilihyom a Manpulong
1 Mabiskeg ya impluensia so pananesdes na kalimog—parad panmaongan odino pankaugsan. Isesekar na saray kaparan lingkor nen Jehova so positibon impluensia a managyat ed sikatayo parad maabig iran gawa bilang Kristiano. (Heb. 10:24) Balet, nayarin desdesen itayo na saray aliwan-Tasin kapamilyaan, katrabahoan, kaeskuelaan, kakaabay, odino arum nin kabkabat pian tumboken so kurang a sumlang ed saray Kristianon prinsipyo. Nayarin mansalita iran ‘mabalaw ed maong a panagbilay [tayo] unong ed Kristo.’ (1 Ped. 3:16) Panon tayon napansiansiay determinasyon tayo a mantultuloy a manpulong anggaman ed negatibon pananesdes na kalimog a nayarin naabet tayo?
2 Saray Kapamilyaan: No maminsan, nayarin aglabay na ulo na pamilya ya aliwan sakey ed Tastasi nen Jehova a manpulong so asawa to tan ananak to. Onia so kipapasen ed sakey a sankaabungan diad Mexico. Nan-tasi so asawan bii tan pitoran ananak na laki. Diad inmuna, sikatoy sumpa lapud agto labay a say pamilya to so manpulong tan manopresi na literatura na Biblia ed kabkaabungan. Liknaen ton saya so mangipaabeba ed sikara. Balet, say asawa to tan ananak to so tinmalindeg a malet ed desisyon dan manlingkor ed si Jehova tan regular a manpulong. Asabi panaon, atalosan na laki so kablian na panisia ed uksoyan na Dios ed panagpulong a kimey, kanian indedika to met so inkasikato ed si Jehova. Asabi 15 taon insan to inawat so katuaan, balet kasin agawaan to itan no agnantultuloy so pamilya to ed pribilihyo a manpulong?—Luc. 1:74; 1 Cor. 7:16.
3 Saray Katrabahoan: Nayarin ag-aapresiaen na arum iray sagpot mon manpulong ed saray katrabahoan. Insalaysay na sakey ya agin bii a sanen pansisingbatan na saray kaopisinaan to so nipaakar ed anggaan na mundo, sikatoy niludlurey da lapud insuheri ton basaen da so Mateo kapitulo 24. Balet, kayari na pigaran agew, sakey ed saray katrabahoan to so angikuan a binasa to iman a kapitulo tan sikatoy asagyat. Nipalima so sakey a publikasyon, tan niyuksoy so panagaral na Biblia ed sikato tan ed masiken to. Say pilimeron impanaral da et asabi toy anggad alas dos na palbangon. Kayari mikatlon impangiyaral, sikara lay inmatendi ed saray miting, tan ag-abayag et intunda da lay panagsigarilyo ra tan akila met laran nampulong. Kasin agawa iya no agnansagpot so agin bii pian inabang so ilalo to ed arum?
4 Saray Kaeskuelaan: Agla pankelawan a saray tobonbalon Tasi so desdesen na kalimog diad eskuelaan tan natatakot ya ompan sikaray leglemewen na arum a tobonbalo no sikaray manpulong. Inkuan na sakey a tin-edyer diad Estados Unidos: “Antakot kon pulongan so arum a kalangweran ompan elek-elekan da ak.” Kanian agto la inanamot iray pankanawnawa a pulongan iray kalimog to diad eskuelaan tan diad teritorya. Panon kan napabiskeg ya onarap ed pananesdes na kalimog? Manmatalek ka ed si Jehova tan anapen so imis na abobon to. (Uli. 29:25) Ikinon moy abilidad mon mangusar ed Salita na Dios diad ministeryom. (2 Tim. 2:15) Say tobonbalon abitla dia so nampikasi ed si Jehova, a kinmerew na tulong a nabayuboan toy pilalek ton mitongtong ed saray kaeskuela to. Sikatoy ginmapon nampulong ya impormal diad eskuelaan, awalaan na maabig iran resulta, tan ag-abayag et sikato lay mitotongtong ed amin a kabat to. Inkuanto: “Kaukolan tan kaliktan na saratan ya ananak so ilalo ed arapen, kanian uusaren itayo nen Jehova pian tulongan ira.”
5 Saray Kakaabay: Nayarin walaray kakaabay odino arum a kabkabat tayo a naiingongotan ed sikatayo lapud no siopa itayo tan ed saray sisiaen tayo. No natatakot ka ed iisipen da, tepetan moy inkasika: ‘Kasin amta ra so katuaan a mangitonton ed bilay ya andi-anggaan? Antoy nagawaan ko pian nasabi so kapusoan da?’ Naimano na sakey a manangasikaso na sirkito a walaray maabig a resulta ed kalkalna balet ta maparanay a pampulong ed saray kakaabay. Onkerew ed si Jehova na nakaukolan a biskeg tan kakabatan pian nitultuloy ya anapen iray matuan impanpuso.—Fil. 4:13.
6 Nayarin manliket iray sumusumpa no onsuko itayo ed negatibon pananesdes na kalimog, balet kasin say panggawa ed satan et pankaabigan da—odino sikatayo? Si Jesus so sinumpa na totoo ed mismon lugar to. Intepel to ni ingen iray ansakit a balikas na agagi to ed ina. Balet amta to a natulongan to ra dia lambengat ed pansiansia ton matoor ed kurang ya angibakian na Dios ed sikato. Kanian, “sinungdoan [nen Jesus] so sumlang a salita na saray managkasalanan sumpad dilin pankaabigan da.” (Heb. 12:2, 3) Ontan met so nepeg tayon gawaen. Determinadon gawaen so anggaay nayarian mo ed pribilihyom ya ipulong so mensahe na Panarian. Diad panggawa’d satan, “nilaban mo so inkasika tan saray ondengel met ed sika.”—1 Tim. 4:16.