‘Pasindagen so Silew Yo’
1 Walad moral tan espiritual a kabilungetan so mundo a kaliberliber tayo. Iwawalwal na liwawa na katuaan ‘iray ag-ombungan gawa’ na kabilungetan ta pian napaliisan irayan makapatey a pakatiroran. Lapud satan, pinaseseg nen apostol Pablo iray Kristiano: “Manakar kayon singa anak na liwawa.”—Efe. 5:8, 11.
2 “Say bunga na liwawa” so misunian a maong ed bilunget na mundo. (Efe. 5:9) Pian napawala iyan bunga et nakakaukolan a magmaliw itayon matalonggaring iran ehemplo ed Kristianon kabibilay, say nengneng na totoo ya aabobonan nen Jesus. Nepeg tayo met ya ipatnag iray kualidad a singa say inkasigpot-puso, inkasimoon, tan inkaseseg parad katuaan. Kaukolan a nipatnag tayo iyan bunga ed agew-agew a kabibilay tan ed ministeryo tayo.
3 Onsinag ed Amin a Pankanawnawa: Inkuan nen Jesus ed saray babangatan to: “Pasindagen yo komon so silew yo ed arap na saray totoo.” (Mat. 5:16) Bilang pangalig ed si Jesus, pasindagen tayo so liwawa nen Jehova diad pangipulong ed Panarian na Dios tan saray gagala to. Onsinag itayo bilang silesilew sano ombisita tayo ed kaabungan na totoo tan sano iwakawak tayo so katuaan diad pantratrabahoan, eskuelaan, dia ed kakaabay tayo, odino ed inerman nin pasen a walay pankanawnawa tayo.—Fil. 2:15.
4 Inkuan nen Jesus a walaray manggula ed liwawa. (Juan 3:20) Kanian ag-itayo nadidismaya sano aglabay na karaklan ya onsinag ed sikara so “silew na ebanghelyo na gloria nen Kristo.” (2 Cor. 4:4) Nabasa nen Jehova so kapusoan na katooan tan agto labay a walaray manggagawa na ag-inkatunong ed limog na totoo to.
5 Sano tumboken tayo iray dalan nen Jehova tan panggayagaan so espiritual a liwawa, nisindag tayo itan ed arum. No natebek da panamegley na kondukta tayo a ‘wala ed sikatayo so silew na bilay,’ diad ontan et napakiwas met ira a manggawa na saray pananguman pian magmaliw iran manangakbibit na liwawa.—Juan 8:12.
6 Diad pangisindag ed liwawa tayo, nidayew tayoy Manamalsa tayo tan natulongan tayo iray masimoon pian sikatoy nakabatan da tan nagamoran da so ilalon andi-anggaan a bilay. (1 Ped. 2:12) Lapud walad sikatayo so liwawa, usaren tayo sirin itan pian iwanwan so arum ya ompaway ed espiritual a kabilungetan tan mamawala na saray gawa na liwawa.