‘Pasindag Yoy Liwawa Yo’
1. Anto so nikaduman regalo a kaukolan tayon inabang?
1 Manlapud ibutay na agew anggad iselek to, nirarayew na marakdakep a liwawa si Jehova a Dios. Balet, walay sananey a klase na liwawa ya iyoopresi nen Jesus ed saray disipulo to, say “liwawa na bilay.” (Juan 8:12) Sayan espiritual a liwawa et espisyal a regalo ya walay katekep ton seryoson responsabilidad. Oniay imbilin nen Jesus: “Pasindag yo . . . so liwawa yo ed saray totoo” pian natulongan ira. (Mat. 5:16) Diad sayan mundo a walad espiritual a kabilungetan, nepeg tayon isindag iyan liwawa a kakkaukolan natan! Panon tayon nisindag so liwawa tayo a singa si Kristo?
2. Panon ya impanengneng nen Jesus so kaimportantian na panginabang ed espiritual a liwawa?
2 Panamegley na Pampulong: Inusar nen Jesus so panaon, biskeg, tan kaykayarian to pian say liwawa na katuaan et nipaamta ed totoo diad kaabungan, plaza, kapalandeyan, tan amin a pasen a kawalaan da. Amta to ya nagunggonaan ira ed andi-angga no inabang toy tuan espiritual a liwawa. (Juan 12:46) Pian mas dakel ni so napulongan, imparaan to ray disipulo to a magmaliw ya “liwawa na mundo.” (Mat. 5:14) Insindag day liwawa ra diad impanggawa day kamaongan ed arum tan diad impanginabang dad espiritual a katuaan.
3. Panon tayon nipanengneng a talagan aapresyaen tayo so liwawa na katuaan?
3 Seseryosoen na totoo na Dios so responsabilidad dan ‘mantultuloy a mankurang bilang ananak na liwawa,’ kanian manpupulong ira ed amin a kawalaan na totoo. (Efe. 5:8) Anggan say pambasa na Biblia odino arum a publikasyon tayo legan na break time ed trabaho odino eskuelaan et sakey lan paraan pian nigapoy tongtongan nipaakar ed Biblia. Sanen ginawa itan na sakey ya agin bii, sikatoy akapangigapo na panangiyaral na Biblia tan akapangipalima na saray libro ed 12 kaklase to!
4. Akin et kabiangan ed ‘pangisindag tayoy liwawa tayo’ so maabig ya ugali?
4 Panamegley na Maabig ya Ugali: Kabiangan met ed pangisindag na liwawa so inagew-agew a kakikiwas tan ugali tayo. (Efe. 5:9) Diad trabaho, eskuelaan, tan arum ni ran pasen et naiimano so maabig ya ugali na saray Kristiano, tan mangiiter itan na pankanawnawan nipulong so katuaan na Biblia. (1 Ped. 2:12) Singa bilang, lapud maong ya ugali na limay taon ya ugaw, oniay imbaga na maestra to ed saray atateng to, “Pandinayewan koy inka-kalakal na anak yo!” On, say ministeryo tan maong ya ugali tayo so manasagyat ed totoo diad “liwawa na bilay” a kirayewan na Dios tayo.