Atateng—Ipaslep ed Ananak Yo Iray Makanan Ugali
1 Agnisipor iray makanan ugali, nisay nagamoran iratan ya agginagala. Sakey ni, nakaukolan so panaon pian ipaslep ed ananak iray maong ya ugali. Say “ipaslep” et mankabaliksan na “kalkalnan panginabang” odino “ipasepsep a sandaraiset.” Nakakaukolan so inkapekder na atateng ta pian “bangatan [so ananak da] ed kadudusa tan panamilin na Katawan.”—Efe. 6:4.
2 Igapo ed Inkaugaw: Nikaduma so abilidad na ugugaw nin maong ya ananak ed pakaaral tan panggawa na balo iran bengatla. Anggaman mabetbet a nairapan iray wala la’d edad a manaral na balon lenguahe, sarag a naaral a bansag na saray agni maneeskuela ya ugugaw so duara odino taloran lenguahe. Agbalot ipasen a say anak yo et ugaw nin tuloy pian nabayuboan so maong iran ugali. No nigapon masakbay tan tuloytuloy so panamilin panamegley na katuaan na Biblia, sano mantaon la na pigara so ugaw, say nonot to so napano na pikakabat a manggawa ed sikaton “makabat ed kilalaban.”—2 Tim. 3:15.
3 Iyugali so Panpulong: Sakey a makanan ugali ya ipaslep legan na saray taon na ibabaleg na ugaw et say maparanay a panagpulong ed maong a balita na Panariay Dios. Dakel ya atateng so mangigagapo ed saya diad pangipila ed ananak da diad panagkabkaabungan legan ya ugugaw niray ananak da. Say maparanay a pibiang na atateng ed panagpulong so ontulong ed ananak da pian nabayuboan so apresasyon tan seseg ed ministeryo. Nipanengneng na atateng ed ananak da no panon so pibiang ed panagpulong ed kada aspekto na lawak na kimeyan.
4 Ontulong met ed ananak so panpalista ed Teokratikon Eskuelaan Parad Panagministro. Satan so mangibangat ed sikara na maong iran ugali ed panagaral tan no panon so pambasa tekep na pakatalos. Naaralan dan itongtong so nipaakar ed Biblia, pamawil, tan pangikondukta na saray panangiyaral na Biblia. Saratan a panangipasal so mamaligsa ed sikara a manpayunir tan ondampot parad espisyal iran pribilihyo ed serbisyo. Labalabay na dakel iran Bethelite tan misionaryo a molimolien so asasakbay ya impibiang da ed Teokratikon Eskuelaan tan impasen da itan bilang probisyon a tinmulong ed sikaran abayuboan so makana iran ugali.
5 Aliling tayoy pitek ed lima na Baleg a Domadamili, si Jehova. (Isa. 64:8) No makulnet ni so pitek, mas mainomay a moldien itan. No namamaga la itan, lalon onawet itan. Kanian ontan met ed totoo. Sano ugugaw ni ira, mas mainomay iran ibangat—tan no mas malangwer ni, magmaong iray resulta. Sarayan taon na inkaugaw da et panaon na ibabaleg, sano mansumpal ed maong odino mauges. Bilang manangiyansakit ya ateng, masakbay lan ipaslep ed ananak yo iray makanan ugali diad Kristianon ministeryo.