Magmaliw a Maliket a Mananumpal
1 Inkuan nen Jesus a legay kiwawala to, say karaklan so ‘agmangimano,’ a singa ed panaon nen Noe. (Mat. 24:37-39, NW) Sirin, iilaloan a dakel a totoo so ag-ondengel ed maong a balita na Panarian. Antoy makatulong ed sikatayo pian namantini so magayagan awawey legan tayon gagawaen so ministeryo tayo?—Sal. 100:2.
2 Unona, kaukolan a lawas tayon nonoten a say mensahe tan kimey tayo a manpulong et nanlapud Dios. Antokaman ya ag-ikiwas ed ministeryo, anggaman ed saray sagpot tayo, so diad tua et panangipulisay ed si Jehova. No nonoten tayo ya aabobonan toy inkamatoor tayo ed panagpulong, ontulong itan ed sikatayo pian napansiansia so gayaga tan akindalem a liket tayo bilang mananumpal na salitay Dios.—Sant. 1:25.
3 Komadua, wala niray totoo a mangawat ed paraan na panangilaban nen Jehova. Anggaman ag-interesado so karaklan, wala niray kinmarnero a natipon, anggan natan, dia ed kasampotan lay panaon na anggaan. Kaukolan itayon mantultuloy a manpulong, onla “ed anggan dinan a syudad ono baley” pian ‘anapen iray makana.’—Mat. 10:11-13.
4 Pansiansiaen so Positibon Awawey: Say mauges a rekord na palson relihyon so pakakadismayaan na arum. Arum so “maermen tan abuybuyak” makasengeg ed sayan sistema na bengabengatla. (Mat. 9:36) Nayarin dakel so nakalan lay ilalo lapud sikaray andian na trabaho, panangasikaso ed bunigas, tan seguridad. Say pakatalos ed saya so ontulong ed sikatayo pian mantultuloy ed kimey tayo. Panggunaetan so pangigapo na tongtongan a manasaglawi ed saray isyu a pirmin kapapagaan na totoo ed teritorya tayo. Tulongan ira a natalosan dan say alenleneg a solusyon et say Panarian na Dios. Usaren so Kasulatan tan saray espisipikon punto ed saray publikasyon pian onsabi ed kapusoan da so maong a balita.—Heb. 4:12.
5 Onia so sankanonot a naynay na saray maliket a mananumpal na salitay Dios: “Say liket nen Jehova sikato so biskeg [tayo].” (Neh. 8:10) Nepeg ya agnaandi so gayaga tayo. “No say abung makana, onla’d sikatoy kareenan yo; bangbalet no agmakana, ompawil ed sikayo so kareenan yo.” (Mat. 10:13) Papasimbaloen nen Jehova so gayaga tan biskeg tayo legan a maanos tayon mansusungdo ed sagradon serbisyo to, tan bendisionan toy inkamatoor tayo.