‘Manlingkor ed si Jehova Tekep na Liket’
1. Anto so nayarin lapuan na baleg a gayaga parad saray lingkor nen Jehova?
1 Insulat nen apostol Pablo: “Manggayaga kayo ed Katawan lawas: kuan ko lamet, Manggayaga kayo.” (Fil. 4:4) Say pribilehyo a panginabang ed maong a balita tan panulong ed saray kinmarneron totoo a mandayew ed si Jehova so lapuan na baleg a gayaga. (Luc. 10:17; Gawa 15:3; 1 Tes. 2:19) Balet, no naimano tayo a no maminsan et naaandi so gayaga tayo ed ministeryo, antoy gawaen tayo?
2. Panon a say pamasiansia tayon akasentro ed lapuan na kimey tayo et ontulong ed gayaga tayo?
2 Ingganggan na Dios a Kimey: Tandaan a say panagpulong a kimey tayo et nanlapud si Jehova. On, agaylan pribilehyo tayo so pagmaliw a “kakimeyan na Dios” diad pangiyabawag ed mensahe na Panarian tan panggawa na saray babangatan! (1 Cor. 3:9) Si Jesu-Kristo so kaiba tayo ed sayan aglan-balot-naulit a kimey. (Mat. 28:18-20) Saray anghel so aktibo met a mibibiang tan mankikimey a kaiba tayo diad baleg ya espiritual a panag-ani a nagagawa la natan. (Gawa 8:26; Apoc. 14:6) Say Kasulatan, pati saray eksperiensya na totoo na Dios, so mabitar a mamapaneknek a susuportaan nen Jehova iyan kimey. Kanian, sano manpupulong itayo, oonla itayo ‘ed arap na Dios a mansasalita dia ed biang nen Kristo.’ (2 Cor. 2:17) Agaylan mabiskeg a rason pian manggayaga!
3. Anto so papel na pikakasi diad pamasiansia ed gayaga tayo ed serbisyo ed Dios?
3 Say pikakasi so importante pian napansiansia tayoy gayaga tayo ed serbisyo ed Dios. (Gal. 5:22) Lapud nayarian tayo labat a gawaen so kimey na Dios panamegley na biskeg to, kaukolan a masimoon tayon kerewen so espiritu to, a mabunlok ton iiter ed saraman so onkerew ed sikato. (Luc. 11:13; 2 Cor. 4:1, 7; Efe. 6:18-20) Say pangipikasi ed ministeryo tayo so ontulong ed sikatayon napansiansia so dugan punto de bista sano walaray onsuppiat. Ontulong itan ed sikatayo pian makapantultuloy a manpulong tekep na pakpel tan liket.—Gawa 4:29-31; 5:40-42; 13:50-52.
4. Panon a say panagparaan a maong so ontulong ed lalon panggayaga tayo ed panagpulong, tan antoray pigaran praktikal a paraan a nayari tayon iparaan?
4 Manparaan a Maong: Sakey a praktikal a paraan pian lalon manggayaga tayo sano mibibiang itayo ed ministeryo et say pamparaan a maong. (1 Ped. 3:15) Say panagparaan so agmangala na dakel ya oras. Mankaukolan labat na pigaran minuto so panrepaso ed nisuheri iran panangipresenta ed peles iran magasin odino sakey a presentasyon a matukoy parad literatura a plano yon iyopresi. Parad matukoy ya introduksion, nayarian yon nengnengen so libron Reasoning odino saray apalabas ya isyu na Ministeryo Tayo ed Panarian. Arum a manangipalapag na Panarian so akaimano a makatulong so pangisulat na antikey a presentasyon ed melag a kard. Panapanaon, rerepasoen da so kard pian natariwa ed nonot da. Saya so ontutulong ed sikaran natalonaan so pannerbios tan mangiiter ed sikara na kompiyansa pian makpel iran manpulong.
5. Panon a mangunggona ed sikatayo tan ed arum so gayaga?
5 Katekep na gayaga so dakel a gunggona. Say magayagan disposisyon so manggawa ed mensahe tayo a lalon makapasagyat. Say gayaga so mamabiskeg ed sikatayon mansungdo. (Neh. 8:10; Heb. 12:2) Nagkalalo ed amin, say magayagan serbisyo so mangiglogloria ed si Jehova. Kanian, ‘manlingkor [itayo] ed si Jehova tekep na liket.’—Sal. 100:2.