Padaak Yoy Gayaga Yo ed Panagpulong
1 Say gayaga ed pananginabang na maong a balita—kasin nasasali yo la itan ed ministeryo yo? No agtayo maalwar, say marelmeng a mundo ed kaliberliber tayo so nayarin mamatayer ed sikatayo ed panagpulong, a pansengegan na kaandi na gayaga tayo. Say pankimey ed agmananginenen a teritorya so nayarin manismaya met ed sikatayo. Antoran praktikal a kundang so nagawaan tayo pian napadaak tayoy gayaga tayo ed panagpulong?
2 Magmaliw a Positibo: Talagan makatulong so pamasiansia ed positibon awawey. Say sakey a paraan a nagawaan tayo iya et diad pandalepdep ed nikadkaduman pribilehyo tayo bilang “kakimeyan na Dios.” (1 Cor. 3:9) Si Jesus met so kaiba tayo diad panusumpal ed sayan kimey. (Mat. 28:20) Tan tutulongan to itayo diad panamegley na armada na saray anghel. (Mat. 13:41, 49) Makaseguro itayo, sirin, a say sagpot tayo so iwawanwan na Dios. (Apoc. 14:6, 7) Kanian anggaman ed nayarin reaksion na pigaran totoo ed kimey tayo, say reaksion ed tawen so panliketan tayon maong!
3 Manparaan a Maong: Say maabig a preparasyon so mangaarum met na gayaga tayo. Say pamparaan ed ministeryo et agmankaukolan na baleg a kimey. Mankaukolan labat itan na pigaran minuto pian konsideraen so pantongtongan a punto manlapud peles iran magasin odino peles ya opresin literatura. Mamili na sakey a presentasyon manlapud “No Anto so Ibaga Nipaakar ed Saray Magasin,” ed Ministeryo Tayo ed Panarian, odino nengnengen so libron Reasoning parad epektibon introduksion. No naaamper kayo ed kaslakan ya isusuppiat na saray unabung, mangiparaan na iyebat a mangaksobi ed komento ra tan ipaarap so imano ed makasagyat-interes a tema. Say libron Reasoning so makatulong a maong diad panggawa ed saya. Diad pangusar ed sarayan katulongan et mangiter ed sikatayo na kompiyansa a nakaukolan tayo pian manpulong tekep na gayaga.
4 Masimoon a Manpikasi: Say pikakasi so makana parad magnayon a gayaga. Lapud gagawaen tayo so kimey nen Jehova, kaukolan tayon kerewen so espiritu to, a sakey a bunga na satan et say gayaga. (Gal. 5:22) Si Jehova so mangiter ed sikatayo na biskeg pian makapantultuloy a manpulong. (Fil. 4:13) Say pampikasi nipaakar ed ministeryo tayo so makatulong ed sikatayo pian mansiansian duga so panmoria tayo sano walaan itayo na negatibo iran eksperiensya. (Gawa 13:52; 1 Ped. 4:13, 14) No liknaen tayon natatakot itayo, ontulong ed sikatayo so pikakasi pian mantultuloy a makpel tan masayaksak.—Gawa 4:31.
5 Mamalesa na Saray Pankanawnawa: Siempre, say ministeryo tayo so nagkalalo lan magayaga sano naromog tayo iray totoo tan mantasi ed sikara. Iduma yoy oras na panagkabkaabungan yo, ompan mas epektibo so pampulong ed ngarngarem la odino mansirunget. Makakaabet kayo na totoo kada manakar kayo ed karsada, mansaliw, onlugan ed bus, odino manpasyar ed parke. Akin et agmangiparaan na antikey a manangigapon tongtongan tan manbulon lan asinggeran iraman so ompatnag a makaaro? Odino nayarin mantratrabaho ka o maneeskuela, a ditan et inagew-agew kan makapitotongtong ed arum. Nayarin nawalaan ka na pankanawnawan manpulong diad pamalesa labat na Makasulatan a tema a mamaliing lay interes. Dinanman ed sarayan sagpot so mamadaak a maong na gayaga na sakey ed panagpulong.
6 Lapud say gayaga so ontutulong ed pakapansungdo tayo, agaylan importante a mantinien itan! Diad panggawa ed satan, manani itayo na baleg a tumang sano manampot la iyan aglan-balot-naulit a kimey. Satan a mismon iilaloan so mamadaak na gayaga tayo ed panagpulong.—Mat. 25:21.