Tulongan so Arum ya Onatendi ed Saray Miting
1 “Siopaman a kakaaron walad kaliberliber . . . a manpilalek ya onatendi ed saray miting so ampetapetang a naimbitaan.” Nanlapula’d inkipaway na sayan anunsio ed Nobyembre 1880 a paway na Zion’s Watch Tower, saray Tastasi nen Jehova so magunaet a mangiimbita ed totoo pian mantitipon parad instruksion na Biblia. (Apoc. 22:17) Saya so makanan kabiangan na tuan panagdayew.
2 Importanti so Iyatendi: Nagamoran iray bendision sano milimog itayo ed kongregasyon. Nagkalalon nakabkabat tayo so makapakelkelaw a Dios tayo, si Jehova. Diad kongregasyon, mantitipon itayo pian ‘paibangat ed si Jehova.’ (Isa. 54:13) Idadatak na organisasyon to so tuloytuloy a programa na instruksion na Biblia pian onapit itayo ed sikato tan mangiiter na praktikal a tulong diad pangiyaplika ed “amin a kalar na Dios.” (Gawa 20:27; Luc. 12:42) Saray miting so mangitarya na personal a panangipasal ed dunong na panagbangat ed Salita na Dios. Saray panonot manlapud Kasulatan so ontulong ed sikatayo a panggayagaan so matalonan siglaotan ed arum tan ed si Jehova a mismo. Say pilimog ed saraman so mangaaro ed Dios so mamabiskeg ed pananisia tayo.—Roma 1:11, 12.
3 Direktan Mangimbita: Manlapud pilimeron pangiyaral, imbitaan la so kada iyaaralan na Biblia ed saray miting. Sikatoy ikdan na sakey a handbill. Sagyaten so interes to diad panginabang na sakey a punto ya akapasesegan yo manlapud kasumsumpal ya aral tan diad pangonsidera ed sakey a punton singbaten ed ontumbok ya aral. Deskribien so itsura na Kingdom Hall, tan seguroen ya amta ton anapen itan.
4 No say iyaaralan et agmakaatendi a tampol, itultuloy ya imbitaan. Mangipanaon na pigaran minuto kada simba pian ipanengneng ed sikato no panon ya onkukurang so organisasyon. Usaren so brosyur a Manggagawa ed Linawa na Dios tan say video a Jehovah’s Witnesses—The Organization Behind the Name pian nikabisado to itayo tan saray miting tayo. Mangitagar na arum a manangipalapag pian nakabat da so iyaaralan. Diad pikakasi, pisalamatan si Jehova lapud organisasyon to tan salambiten a nakaukolan a milimog ed satan so iyaaralan.
5 Agmasuyat ya ontulong ed saray balon interesado a milimog ed sikatayo. Legan ya ombubulaslas so apresasyon da ed si Jehova, sikaray napakiwas a mangiyaplika ed nanaaralan da tan magmaliw a kabiangan na nankakasakey ya organisasyon na Dios.—1 Cor. 14:25.