Parte 8—Pangikondukta na Progresibo Iran Panangiyaral na Biblia
Iwanwan Iray Iyaaralan ed Organisasyon
1 Say kalat tayo ed pangiyaaral na Biblia et aliwa labat a pian ibangat iray doktrina noagta pian tulongan iray iyaaralan ya onkamang ed Kristianon kongregasyon. (Zac. 8:23) Makatulong so brosyur a Jehovah’s Witnesses—Who Are They? What Do They Believe? pian nagawaan tayo iya. Ikdan na kopya iray balon iyaaralan na Biblia, tan pasesegen iran basaen itan. Niarum ni, mangigetar na pigaran minuto kada simba diad panagaral yo pian manginabang na sakey a punto nipaakar ed organisasyon nen Jehova.
2 Saray Pantitipon na Kongregasyon: Say manunan paraan pian naapresya na saray iyaaralan na Biblia so organisasyon na Dios et say pilimog da ed sikatayo diad saray pantitipon na kongregasyon. (1 Cor. 14:24, 25) Sirin, ipaamta yo iratan ed sikara diad sansakey a paneskribe ed limaran sinimban pantitipon. Ibaga yo so tema na onsublay a paliwawa parad publiko. Ipanengneng ed sikara so materyal a konsideraen ed onsublay a Panagaral na Panag-Bantayan odino Panagaral na Kongregasyon ed Libro. Deskribien so Teokratikon Eskuelaan Parad Ministeryo tan say Pantitipon Parad Panagserbi. No walay betang yo ed teokratikon eskuelaan, nayari yon ipasal itan a kaiba ira. Inabang iray alay abig a punto a nipresenta ed saray pantitipon. Diad primeron panagaral et imbitaan la ran tampol.
3 Sano manasingger lay Memoryal, asamblea, tan bisita na manangasikaso na sirkito, mangiganay panaon pian ipaliwawa tan paaralemen so interes da ed sarayan uksoyan. Sansakey yon ebatan iray tepet a singa say: Akin ya atawag itayon Saray Tasi nen Jehova? Akin a Kingdom Hall so tawag tayo ed saray pantitiponan tayo? Antoray kimey na saray mamatatken tan ministeryal a lingkor? Panon a naoorganisa so panagpulong a kimey tan say teritorya? Panon a napapawala iray literatura tayo? Panon a nasusuportaan ed pinansyal so organisasyon? Anto so betang na sangan opisina tan Mananguley ya Ulop ed panangiwanwan ed kimey?
4 Saray Makaibangat a Video: Sakey nin paraan a nanengneng na saray iyaaralan na Biblia so makapadinayew ya organisasyon nen Jehova et diad panamegley na saray video. Ipapanengneng na video a To the Ends of the Earth so sankamundoan a panagpulong a kimey tayo; ipapanengneng met na Our Whole Association of Brothers so sankamundoan ya impanaagi tayo; tan ipapanengneng na United by Divine Teaching so pankakasakey na saray Tasi nen Jehova. Sakey a biin limay taon lan makakaawat na saray magasin tan arum nin literatura tayo so akalua ed video a Jehovah’s Witnesses—The Organization Behind the Name. Naaralan to lay manmatalek ed saray Tasin ondadalaw ed sikato, balet kayari ton abantayan so video, alikna to a napanmatalkan to met so organisasyon. Nigapo so pormal a panangiyaral na Biblia ed sikato, tan diad tinmumbok a simba, sikato lay inmatendi ed saray pantitipon ed Kingdom Hall.
5 Diad pigaran minuto ed kada simba a pakapitongtong tayo ed saray iyaaralan na Biblia, kalkalna tayo ran nipaarap ed organisasyon ya uusaren natan nen Jehova.