Sigpot a Mibiang ed Panagani
1 Tinukoy na saray propeta nen Jehova nensaman ontan met ed si Jesu-Kristo a mismo so panagtipon a kimey. (Isa. 56:8; Ezeq. 34:11; Juan 10:16) Nagagawa la itan a kimey natan legan a nipupulong ed sankamundoan so maong a balita na Panarian. (Mat. 24:14) Napapatnagan lan maong so pakabidbiran ed saraman so manlilingkor ed Dios tan saraman so agmanlilingkor ed sikato. (Mal. 3:18) Antoy kabaliksan na saya ed sikatayo?
2 Dilin Responsabilidad: Makaaral itayo ed alimbawa nen Pablo, a sigpot ya akibiang ed panangidaulo na Makristianon ministeryo. Alikna to so obligasyon a manpulong ta pian amin a totoo so nawalaan na pankanawnawan makarengel ed maong a balita tan nilaban. Saya so amakiwas ed sikato ya andi-tundan mansagpot nisengeg ed sikara. (Roma 1:14-17) Lapud mapeligron situasyon ya aarapen na katooan natan, agta walaan itayo na babaleg a responsabilidad a pulongan iramay walad teritoryan niasain ed sikatayo?—1 Cor. 9:16.
3 Panaon La Pian Maganat ya Onkiwas: Say panagpulong a kimey so nikompara ed panag-anap tan panangisalba a kimey. Nepeg ya anapen iray totoo tan ilegyas ira sakbay ya atrasado la. Limitado so panaon. Walad kapeligroan iray bilay! Agpankelawan a pinaseseg nen Jesus iray babangatan to a ‘mikasi ed Katawan na aaniyen, pian mangibaki na saray manani ed aaniyen to.’—Mat. 9:38.
4 Lapud bibidbiren da so inkaganatan la natan, dakel a komikimey nipaakar ed Panarian so amadaak na pibibiang da ed sayan manangisalbay-bilay a kimey. Sakey a tin-edyer a manngaran na Hirohisa so kaiba na sulon-ateng to tan apatira nin yugtan to. Sinuportaan toy pamilya to diad ibangon ed alas-tres na palbangon pian mangitulor na saray peryodiko. Anggan ontan so kipapasen to, kaliktan nen Hirohisa a malaem so nagawaan to ed ministeryo, kanian sikatoy nanregular payunir. Wala ta iray paraan a makapibiang kayon nagkalalo ed sayan aglan balot naulit a kimey?
5 “Say panaon apatikeyan la.” (1 Cor. 7:29) Sirin, gawaen tayo komon so anggaay nayarian tayo ed sankaimportantian a kimey a gagawaen ed sankadalinan natan—say panangipulong ed maong a balita na Panarian tan panaggaway babangatan. Inyaliling nen Jesus iyan ministeryo ed panaganin kimey. (Mat. 9:35-38) Diad sigpot a pibiang tayo ed panagani, saray bunga na sagpot tayo so mangilaktip ed panulong ed siopaman pian magmaliw a kabiangan na baleg ya ulop na saray managdayew ya adeskribe ed Apocalipsis 7:9, 10.