Kasin Iyaaplika Yo so Naaralan Yo ed “Manangibangat na Salitay Dios” a Distriton Kombension?
1 Siopaman ya inmatendi ed apalabas a distriton kombension so makatebek a saray totoo nen Jehova so magunaet ed panusumpal da’d kimey da a magmaliw a manangibangat na Salitay Dios. (Mat. 28:19, 20) Kasempet yo ed abung, antoran espesipikon punto na pakaibangatan so determinado yon iyaplika ed mismon bilay yo tan ed lawak na ministeryo?
2 Makagunggona ed Panagbangat so Apuyanan a Kasulatan: Say tema ed primeron agew so angipabitar ed 2 Timoteo 3:16. Impabitar na pinagka-teman paliwawa a pian magmaliw itayon “Nagnap ya Akinlongan Bilang Manangibangat na Salitay Dios,” nepeg tayon pablien so Salitay Dios, respetoen itan a nagkalalo nen say opinyon odino tradisyon na too, tan sitotoor ya iyaplika itan. Nepeg tayo met ya ipikasi ed inagew-agew so masanton espiritu pian ontulong ed sikatayo ed ministeryo tayo tan pankimeyan so pamayubo ed manunan bunga na satan—say aro. Tan nepeg tayon abuloyan so mangaraldalin ya organisasyon nen Jehova a mangipasal ed sikatayo bilang ministros panamegley na amin a miting ed kongregasyon.
3 Say simposium ed Biernes a, “Bangatan Tayoy Inkasikatayo Legan ya Ibabangat so Arum,” so angipaliwawa a nepeg itayon magmaliw a napanuliranan diad (1) pangunor ed saray ganggan na Dios ed amin ya aspekto na Kristianon moralidad, (2) panmantini ed maseseg ya ugali ed panagaral, tan (3) pangiwaklit ed saray ugali tan kipapasen na puso tan nonot a nayarin panganamotan na Diablo. Tinmumbok et naaralan tayo iray praktikal a paraan pian nasalimbengan iray pamilya tayo manlapud minumundon salot na pornograpiya. Apaseseg iray atateng a mangipanengneng na ehemplo diad ipaliis ed anggan pamasikmat labat ed seksual ya eksena tan subaybayan so panangusar na ananak da ed Internet tan panagbantay na telebisyon. Dinan iran punto ed programa na Biernes so iyaaplika yo la?
4 Say unor a paliwawa ed saman ya agew so amabiskeg na determinasyon tayo pian pablien so liwawa nen Jehova, pian mansiansian maapit ed matoor ya alanaan a klase na Dios, tan pian makatulong ed pangiyalibansa ed kareenan na totoo nen Jehova. Kasin abasa yo la so balon paway ya Isaiah’s Prophecy—Light for All Mankind II?
5 Sigpot a Kualipikado a Mangibangat ed Arum: Say pinagka-teman teksto parad komaduan agew et 2 Timoteo 2:2. Diad indengel yo ed simposium ed kabuasan na Sabado, kasin innota yo iray suhestion ed no panon ya (1) anapen iray makana, (2) bayuboan so interes da, tan (3) bangatan ira a mangunor ed amin ya ingganggan nen Kristo? Kasin iyaaplika yo so naaralan yo—ya ipanengneng ed saray unabung so anggan sakey labat a punto manlapud Kasulatan tan iletneg so pamawil ed sikara?
6 Say programa ed ngarem so angidanet ed kaimportantian na pangalig ed Matalonggaring a Managbangat, si Jesus. Diad antoran dalan a panggugunaetan yo so lalon pangalig ed sikato? Manlapud naaralan yo ed komaduan simposium ed komaduan agew, antoy padesir yo a nayarian yoy “Pagunggonaan a Nagkalalo ed Teokratikon Edukasyon”? Antoran suhestion so inyaplika yo pian onnatnat so laknab na panangimano yo legan na personal a panagaral tan diad saray miting ed kongregasyon?
7 Anggapoy duaruwa, say magano lan naawat a probisyon a Minabang ed Edukasyon na Teokratikon Eskuelaan Parad Ministeryo so ontulong ed sikatayo pian napaaligwas iray abilidad tayo bilang managpaliwawa tan bilang manangibangat na Salitay Dios. Lalon ikdan na imano iray kalidad ed panagsalita a pakabidbiran ed saray lingkor na Dios ed panaon na Biblia. Kada leksion ed balon libron-panaralan so walaan na saray kahon ya anegek ed no anto so kaukolan tayon gawaen, no akin ya importante itan, tan no panon so panggawa ed satan. Wala met iray praktikal a panagpasal. Saray agagin bibii so walaan na 29 ya eksena a pampilian diad pangipaliwawa ed saray asainmin da. Nasabi panaon, say inyanunsio iran pananguman so gawaen diad programa na eskuelaan. Kasin walaan kayo na maabig a rotina ed panagaral tan panagparaan ta pian sigpot a minabang manlapud Teokratikon Eskuelaan Parad Ministeryo kada simba?
8 Magmaliw a Manangibangat Nisesengeg ed Panaon: Imparaan na Hebreo 5:12 iray dumerengel parad Simba. Say simposium ed kabuasan a “Sikatayo so Ipaparaan na Propesiya nen Malaquias ed Agew nen Jehova,” so amaseseg ed sikatayon iter ed Dios so sankaabigan tayo tan gulaen so amin a klase na panamalikdo diad ontan et nayarin makaliktar itayo ed baleg tan makapataktakot ya agew nen Jehova. Say drama a, “Respetoen so Autoridad nen Jehova,” so mapuersan angipanengneng no panon a say kinon, ambisyon, imon, tan lingon katooran nen Kore tan saray kakaiba to nensaman so angitonton ed panagrebeldi sumpad si Jehova a mismo. Say tinmumbok a paliwawa so angiyapasakey ed modernon agew a pankaukolan na pampasakop ed maridios ya autoridad diad loob na pamilya tan ed kongregasyon. Say publikon paliwawa a, “Siopara so Mangibabangat na Katuaan ed Amin a Nasyon?,” so lalon amaneknek a saray Tastasi nen Jehova so manggagawa ed satan, a miduma ed Kakristianoan, a mankuan labat a mangibabangat ed katuaan na Biblia.
9 Malinew, ipapasal itayo nen Jehova a magmaliw a lalon maong a manangibangat na Salita to. Iyaplika tayo sirin so naaralan tayo, ya ‘imatonan tayo so kaabigan na laman tayo tan say ibabangat tayo, pian diad ontan et nilaban tayo so inkasikatayo tan saray ondengel met ed sikatayo.’—1 Tim. 4:16.