Komustay Gana Yo ed Espiritual a Panangan?
1 Walay diparan a ‘napatnagan ed inkasikatayo so kakanen tayo.’ On, apektaen na panangan tayo so pisikal a biskeg tan bunigas tayo. Lapud inkuan nen Jesus: “Aliwa a say tinapay labat so napambilay na too noag say amin a salitan ombesngaw ed sangi’ Dios,” say ganas tayo ed espiritual a panangan so mangapekta ed sikatayo diad pankaabigan tayo odino andi. (Mat. 4:4) Kanian, sirin, komusta so panangan yo ed espiritual a paraan? Kasin maumit kayo? Kasin manapura kayon mangan? Odino kasin panliliketan yo so regular, balanse, tan makapabiskeg ed espiritual a panangan?
2 Analisaen so Panangan Yo: Mangitatarya si Jehova na “tagano ed panaon a kinepeg to” tan “sakey a liket ed saray mataba a bengatla,” diad panamegley na “matoor tan makabat ya aripen.” (Mat. 24:45; Isa. 25:6) Pian sigpot a nagunggonaan manlapud sarayan maaron probisyon, nepeg itayon manbanikel a mangan a maong ed espiritual.
3 Nayarian yon tepetan so inkasikayo: ‘Kasin babasaen ko so teksto tan komento a kada agew? Kasin babasaen tan dadalepdepen ko ya inagew-agew so Biblia? Kasin manpaparaan ak parad saray miting ed kongregasyon diad panaral ed materyal a masakbay? Kasin babasaen ko iray sankabaloan a publikasyon, pati say Isaiah’s Prophecy—Light for All Mankind?’
4 Insipan nen Jesus: “Mapalar iray duruka ed espiritu . . . Mapalar iray narasan tan napgaan unong ed katunongan; ta sikaray peselen.” (Mat. 5:3, 6) Tan diad pangan a maong ed espiritual, sikayo so mas mabiskeg tan mas mabunigas ed espiritual.