Maligsan Inkiwas!
1 Maligsan inapresya na saray Kristianon pamilya ed nanduruman pasen so video a Young People Ask—How Can I Make Real Friends? Inkuan na sakey ya ama diad Estados Unidos a kayari ran binantayan itan et nanumameng iray ilalak to ta natatalosan da so amin a walad video! Sakey a report ed Malawi so nankuan a natatalosan itan na saray kalangweran ya agagi diman lapud naeeksperiensya ra so parehon pananesdes a manlalapud saray kaedaran da diad eskuelaan. Oniay inkuan na sakey ya ama diad Alemanya nipaakar ed video: “Ipapasen ko iyan ebat ed saray pikakasik.” Inkuan na sakey a tobonbalo: “Salamat ed impangipanonot yo’d siak a peteg ya iyaansakit ak nen Jehova.” Oniay inreport na sakey a matatken ed New Zealand: “Tinmulong itan ed sakey ed saray tin-edyer mi ya ompawil ed dalan na bilay.” Sakey ya asawan bii so nambantay ed satan tan oniay inkuan to: “Pirawrawat kon nabantayan komon na balang tobonbalon walad katuaan iyan video tan napakiwas a mangayarian ed katuaan!” Sikayoran pamilya, akin ya agbantayan lamet iya? Insan, singbaten a mankakaiba iray onggendan a tepet.
2 Introduksion: Anto so tuan kaaro?—Uli. 18:24.
3 Saray Babeng ed Pikakaaro: Panon mon natalonaan so liknaan a sikay nipuepuera? (Fil. 2:4) Akin a nepeg a mabulos kan mamaaligwas ed personalidad mo, tan siopa so makatulong ed sikan nagawaan itan? Anto so mangilukas ed saray pankanawnawan nawalaan na mas dakel a kakaaro, tan iner so pakaromogan ed sikara?—2 Cor. 6:13.
4 Pikakaaro ed Dios: Panon mon nabayuboan so relasyon mo ed si Jehova, tan akin a makagunggona itan? (Sal. 34:8) Siopa so sankaabigan a makapabiskeg na pikakaarom ed Dios?
5 Saray Makapuy a Kakaaro: Sioparay mauges a kaulop? (1 Cor. 15:33) Panon a niwanwan na makapuy a kakaaro so sakey ed espiritual a kaderal? Anto so ibabangat ed sika na salaysay na Biblia nipaakar ed si Dina?—Gen. 34:1, 2, 7, 19.
6 Sakey a Modernon-Agew a Drama: Panon a naapektaan na inkabegtebegtew si Tara? Panon ton inkatunongan so pililimog to ed taga-paway iran kalangweran? Diad antoran peligro so angidungetan da ed sikato? Akin ya agnaimano na atateng to so aarapen to lan kapeligroan, balet anto so walna ra diad impanulong da ed sikaton napapawil so espiritualidad to? Panon a pinaneknekan na payunir ya agin bii a sikatoy peteg a kaaro ed si Tara? Akin a nepeg a talinengen na saray Kristiano so Uliran 13:20 tan Jeremias 17:9? Anton importantin leksyon so naaralan nen Tara?
7 Konklusyon: Antoran leksyon so naaralan mo ed sayan video? Panon mon nausar iya pian tulongan so arum?—Sal. 71:17.