Saray Gayaga ed Sigpot-Panaon a Serbisyo
1 Bilang kalangweran, maseguron inisip mo la so nipaakar ed arapen mo. Ibabaga ed sikatayo na Uliran 21:5 a “saray kaisipan na saray makuli arap ira lambengat ed inkadaakan.” Nagunggonaan ka diad panumameng ed saray kalat mo ed bilay. Legan kan manplaplano parad arapen mo, ikonsideram so iloob ed sigpot-panaon a serbisyo. Akin?
2 Tepetan mo ray pigaran wala la’d edad a nampayunir legan na panaon na inkatobonbalo ra no anto so impresyon da tan seguradon nampadpara so ibaga ra: “Saraman so sankaabigan a taotaon na bilay ko!” Sakey ya agin laki ya aka-eksperiensya ed saray gayaga ed sigpot-panaon a serbisyo manlapud inkatobonbalo to so angikuan diad saginonor: “Lapuan na pirmin inkakontento so panmolimoli ed panaon na inkatobonbalo tan nikuan a tinalineng na sakey so makabat a simbawan: ‘Nonoten mo met so Manamalsam dia ed agew na inkaugaw mo.’” (Ecl. 12:1) Kaukolan mo tan saray atateng mo, so maalwar a panagplano natan, pian makapanggaway paraan a naeksperiensyam iyan klase na gayaga legay inkatobonbalom.
3 Atateng, Ipaseseg so Sigpot-Panaon a Serbisyo: Bilang maaron Ama, si Jehova, so mangipapanengneng ed sikayo no iner so nepeg yon pankurangan. (Isa. 30:21) Diad pangitatarya na ontan a maaron panangiwanwan, sikatoy angiletneg na maabig ya ehemplo parad sikayo bilang Kristianon atateng. Imbes a paulyan yo ray anak yon mandesisyon no antoy sankaabigan parad sikara, sikakabat ya ipasal yo ira ed dalan a nepeg dan laen pian nagamoran da so bendisyon nen Jehova. Insan, sano ontakken la ra, say impangipasal yo so ontulong ed sikara a ‘mangibiig na maong tan mauges.’ (Heb. 5:14) Naeksperiensya la na saray wala la’d edad ya agda napanmatalkan so dili ran pakatalos; kaukolan a manmatalek ira ed si Jehova pian niwanwan ira. (Uli. 3:5, 6) Sayan pankaukolan so mas nagkalalo la parad saray kalangweran, a daiset ni eksperiensya ra ed bilay.
4 Sikayon atateng, legan a manmarmarikit odino manbalbalolaki iray anak yo, odino anggan masakbay ni, realistikon mitongtong ed sikara nipaakar ed saray kalat da a karera. Saray counselor ed eskuelaan, mamaestra, tan kaklase ra so manalin mangimpluensya ed sikara a pilien so minumundo tan materyalistiko iran gegemtan. Tulongan yo ray anak yon manpili na kurso ed eskuelaan a mangitarya na praktikal iran kipasal, a mangiparaan ed sikaran nalegpet so materyal iran pankaukolan da ya agda nisasakripisyo so intereses na Panarian. (1 Tim. 6:6-11) Diad dakel a kaso, say edukasyon ed haiskul tekep na kurson vocational tan/odino pan-aprentis lambengat so nakakaukolan pian magenap lan nalegpet na sakey iray pankaukolan to legan ya onggagapo ed regular payunir a ministeryo.
5 Pasesegen iray kalangweran a gemtanen ni so langkap na inkawala’d kasuloan. No diad saginonor et desidien da so mangasawa o miasawa, sikara lay akaparaan a manakbat ed mas ambelat iran responsabilidad nipaakar ed panangasawa. (Nengnengen so parapo 19 na Hunyo 2001 ya insert na Ministeryo Tayo ed Panarian a “Kasin Niparaan Moy Inkasika?”) Panamegley na positibon pangitongtong nipaakar ed panagpayunir, panlingkor diad kawalaan na babaleg a pankaukolan, serbisyo ed Bethel, tan misionaryon kimey, ipaslep ed saray kalangweran anggan ugugaw nira so pilalek a mangusar ed saray bilay da diad paraan a mamaliket ed si Jehova, makagunggona ed arum, tan mangitarok na gayaga ed inkasikara.
6 Kalangweran, Iyuna Yo so Sigpot-Panaon a Serbisyo: Sikayoran kalangweran, agyo la kaukolan ya umamengen ni no panon kasi so panagpayunir a kimey. Sarag yon salien itan a sagpaminsan diad pan-auxiliary payunir legan na taon na pan-eeskuela tan legan na bakasyon. Diad ontan et nalikna yo no panon a peteg a makapenek so panagpayunir a serbisyo! Kasin makapanplano kayo lan masakbay pian makapan-auxiliary payunir balang la’d natan anggad mansampot so tiagew?
7 No sakey kan tobonbalo ya agin laki diad organisasyon na Dios, morekdek mo met so pandampot pian onkualipika bilang ministeryal a lingkor. (1 Tim. 3:8-10, 12) Niarum ni, mandesisyon no labay mo so mangaplay parad serbisyo ed Bethel odino manaral ed Ministerial Training School, bektan kualipikado ka la ed edad. Say eksperiensyam ed panagpayunir a ministeryo so mangibangat ed sika na makana iran leksion, a singa say no panon so panumbok ed eskedyul, no panon mon napaaligwas so personal a panangorganisa, no panon so pideneng ed arum, tan no panon a nabayuboan so inka-responsable. Amin na saraya so mangiparaan ed sika parad babaleg iran pribilehyo ed serbisyo diad saginonor.
8 Say importantin aspekto pian ontalona ed sigpot-panaon a serbisyo et say pagmaliw a makuli diad panaglingkor ed Dios. Ipapaseseg nen apostol Pablo so ontan a walna, tan impabitar to ray bendisyon a resulta na satan: “Dinanman a gawaen yo, gawaen yon mabulos, a singa nipaakar ed Katawan . . . Kabaten yo ya awaten yo ed Katawan naani so tumang a tawir.” (Col. 3:23, 24) Bendisyonan kayo komon nen Jehova na dakel a gayaga diad sigpot-panaon a serbisyo!