Mantultuloy a Nagunggonaan Manlapud Say Panag-Bantayan tan Awake!

Natan ta agla ipapawit ed koreo iray subskripsion ed Panag-Bantayan tan Awake! a magasin, nakaukolan so pansagpot pian naseguro tayo, tan ontan met ed saramay pupulongan tayo, ya anggapoy nasaew ya anggan sakey ya isyu.

Personal Iran Kopya: Sano manpaso la so subskripsion yo, aruman so peles a pedido yo diad panag-alaan na magasin. Nepeg a mangala so atateng na magenap iran magasin pian nawalaan na kopya so balang membro na pamilya. Say pangisulat na ngaran yo ed personal a kopya yo so mamaseguro a satan so agyo nipalima ed lawak. Sano sinmabi la iray magasin, ipaway a tampol na agin mangaasikaso ed saratan so isyu diad Kingdom Hall.

Saray Rota na Magasin: Nepeg a panggunaetan na saray manangipalapag so pangiletneg na rota na magasin ed amin ya interesado a mankaliktan a mangawat na kada kopya. Say personal a pangitulor na saray magasin ed saratan a totoo so mangiter ed sikatayo na pankanawnawan nabayuboan so impatnag dan interes tan pian nigapo so panagaral na Biblia.​—Nengnengen so Ministeryo Tayo ed Panarian, Oktubre 1998, pahina 8.

Saramay Walaan na Nikaduman Pankaukolan: No impatnag na indibidual so puron interes balet ta manaayam ed agni niasain a teritorya, nayarin sikatoy nikonsidera pian naabuloyan a makaawat na saray magasin panamegley na subskripsion ed koreo. No say toon manaayam ed teritoryan sakop na kongregasyon so agnasabi na rota na magasin balet ta interesadon tuloy a makaawat na saray magasin, isingbat so kipapasen ed Congregation Service Committee. No inabobonan da, nayarin ipawit so subskripsion parad interesadon too. Nayarin usaren iray datin porma na subskripsion (M-1 tan M-101) parad sayan gagala.

Matalek itayo a mantultuloy a bendisyonan nen Jehova so amin a sagpot tayo ya ipakabat so Panarian panamegley na Say Panag-Bantayan tan Awake!