Iyopresi Iray Magasin Diad Ministeryo Yo
1, 2. Panon a mangaapekta ed bilay na saray totoo so Say Panag-Bantayan tan Awake!?
1 “Makapainteres, nipanpanaon, makapaseseg.” “Saya la so sankaabigan a dyurnal ya abasak.” Sarayan balikas so matukoy a manideskribe ed panmoria na saray managbasa ed sankamundoan nipaakar ed Say Panag-Bantayan tan Awake! On, saray magasin tayo so apaneknekan lan makanakanan instrumento pian nipasabi so maong a balita ‘ed amin a totoo’.—1 Tim. 2:4.
2 Sakey a negosyante so akaawat na magasin ya Awake! a walaay teman naninteresan to. Diad saginonor, binasa to so katekep na satan ya isyu na Say Panag-Bantayan, a walaan na artikulon amakiwas ed sikaton usisaen so abangonan to lan pananisia ed Trinidad. Anagyat itan ed interes to. Kalabas na anem bulan sikatoy abautismoan. Walay sananey nin laki a naynay a makakaawat na saray magasin balet ta agton balot babasaen iratan. Diad biek a dapag, papaliisan na asawa to iray Tasi balet ta babasaen toray magasin a nititilak ed masiken to. Atenyeg so puso to ed sipan na Biblia a paraison dalin a panayaman na matunong a totoo. Asabi panaon et sikato, say anak ton laki, tan say agi ton bii so nagmaliw a lingkor nen Jehova.
3. Antoy kaabigan na saniban pangiyopresi ed saray magasin?
3 Iyopresi Iratan a Saniba: Singa ipapanengneng na saray asalambit ya alimbawa, agtayo naseguro no siopa so mamasa ed saray magasin tayo odino no dinan so managyat na interes da. (Ecl. 11:6) Kanian maabig no saniban iyopresi so Say Panag-Bantayan tan Awake!, anggaman kaslakan lan sakey labat a magasin so ipapaimano tayo ed presentasyon. Diad arum a kipapasen, nayarin matukoy so pangiyopresi na pigaran nanduruman isyu na magasin tayo sano dadalawen tayo ira.
4. Panon tayon niyeskedyul so panagmagasin?
4 Maabig no iyeskedyul so sakey agew ed kada simba parad pibiang ed panagmagasin. Diad 2005 Calendar of Jehovah’s Witnesses, intalaga so kada Sabado bilang “Agew na Panagmagasin.” Siempre, lapud nanduruma so sirkumstansya na balang sakey tan ed balang lugar, nayarin sananey ya agew so itatalaga na arum parad panangiyopresi na saray dyurnal tayo. Kasin kabiangan itan ed sinimban eskedyul yo?
5. Antoran pankanawnawa so nepeg a panalistoan tayo pian makapangipalima na saray magasin, tan antoy ontulong ed sikatayon nagawaan itan?
5 Mangiletneg na Dilin Kalat: Natulongan itayon magmaliw a lalon sinononot ed panangipalima na saray magasin no gawaen tayon personal a kalat ed binulan so pangipalima ed saratan. Wala tay rota yo na magasin? Mangiyoopresi kayo kasi magasin ed saramay nakakatongtong yo ed ministeryo? Makapangiyoopresi kayo ta na saray magasin diad karsada, pasen na negosyo, tan diad publiko iran pasen? Mangaawit kayo kasi na saray magasin sano manbiabiahe, mansasaliw, tan sano walaray kasipan yo ed tongtongan? Anamoten so kada matukoy a pankanawnawa pian natulongan so arum a nagunggonaan ed Say Panag-Bantayan tan Awake!
6. Panon tayon epektibon nausar iray daan ya isyu na saray magasin?
6 Gawaen tayo met a kalat so pangipalima ed saray daan ya isyu a walad sikatayo. Anggano agnipalima iray magasin ed loob na sakey odino duaran bulan manlapud petsa na paway, agmanguuman so kablian na impormasyon. Ipalima iratan ed saray interesado. Parad minilyon a totoo, saray magasin a Panag-Bantayan tan Awake! so nagmaliw a ‘salitan nibalikas ed dugan panaon.’ (Uli. 25:11) Usaren tayo iratan pian natulongan so minilyon nin totoo a makapikabat tan manlingkor ed si Jehova.