‘Onkabayo a Nisesengeg ed Katuaan’
“Tan diad karlangan mo et sika so onaligwas; onkabayo a nisesengeg ed katuaan tan kauyamoan tan inkatunong, tan say kawanan a limam so mangibangat ed siak diad saray makapataktakot a bengatla.”—SALMO 45:4.
1, 2. (a) Anton mensahe so anagyat ed salmista? (b) Akin a satan a parehon mensahe so nepeg a mamakiwas ed sikatayo?
SAY umaanlong-kumakanta so magunaet a mangigapo ed kanta to. Say panatalaran ed onsasabin maabig a gobierno ed lima na sakey ya agnaderal, matunong a manuley so mabiskeg a tuloy. Sikato so agmakapandeen. Agtola nayarian ya itepel ed inkasikato, say salmista so angibesngaw ed sarayan salita: “Say pusok so mangililipwa na maabig a bengatla. Ikuan ko: ‘Saray kimey ko so nipaakar ed sakey ya ari.’ Komon ta say dilak so singa pluma na sakey ya onsianon managsakal.” (Salmo 45:1) Say orihinal ya umaanlong-kumakanta so abayaglan inatey. Balet say mapropetikon kanta to so siansia nin mabilay, tan say puersa na satan so nagkalalon mabiskeg natan.—Ipareng so Colosas 3:16.
2 Anto so “maabig a bengatla” ya anagyat ed puso na salmista? Sikato so misiglaotan ed maong a balita na Panarian na Dios! Ontan lan “maabig” so mensahe na Panarian a kanepegan to so “kipulong ed amin a panaayaman a dalin ya onkanan pantasi ed amin a nasyones” sakbay a “say anggaan” na sarayan nasyones so onsabi. (Mateo 24:14) Natan, kasin say “maabig” a tema na Mesianicon Panarian na Dios so mamapaligsa ed puso yo? Nepeg ya ontan. Akin? Lapud say Hebreon berbon nipatalos a “mangililipwa” (ra·chashʹ) so mananda na maligsan kiwas, a singa manlipwa, manlelwag a likido. Say berbo met so mangipatalos na inkagnap. Tan nonoten, say Pangulo tayo, si Jesu-Kristo, so angikuan: “Manlapud inkadaakan na puso et [say] sangi so mansalita.” (Lucas 6:45) Sirin, kasin sikayo, singa say salmista, so walaan na sakey a puson manlipwa ed “maabig a bengatla”? No ontan, sirin anggapo so makapatunda ed sikayo diad pangikanta ed sayan superlatibon katuaan: Si Jesu-Kristo so manuley ed Panarian na Dios!
Panangikayat ed Kanta na Katuaan
3. Anton duaran manunan metodo so nausar diad panangikayat ed maong a balita na Panarian natan?
3 Panon so nayarin kilaknab na sayan maarin kanta? Diad panamegley na masanton espiritu et say dila na salmista so nagmaliw a sakey a “pluma” ed saray lima nen Jehova. (Ipareng so 2 Samuel 23:2.) Saray insulat a liriko so kinanta a para ed pandengel na amin na saray inmunan managdayew ed si Jehova. Sikatayo natan so makapangipatalona ed Panarian na Dios diad duaran miulibay a dalan. Ununa, diad panamegley na saray salita tayon narengel diad panagpulong ed lapag tan, komadua, diad panamegley na saray salita tayon nabasa ed saray literatura tayo. Sirin, sano ibunog tayo so niletneg-ed-Biblia a literatura, ibabaga tayo so imbaga la na dila na apuyanan a masanton totoo. (2 Timoteo 3:16; 2 Pedro 1:20, 21) Tan natan et say nigalot a mensahe na Panarian so nibubunog ed dakel a bilang tan lenguahe tan diad peles ya agnaisip na salmista. Kasin sikayo so maparanay a mibibiang diad kilaganap to, nagkalautla diad panamegley na panangibunog ed saray palapagan a Watchtower tan Awake!?
4. (a) Panon a si Kristo Jesus so nagmaliw a “maong ya indengan nen saray anak a lalaki na totoo”? (b) Panon so pangaalig na alanaan a bantay a klase ed ‘kalimgasan na saray bibil nen Kristo’?
4 Say impatnag na Ari nen Jehova so amaliing ed salmistan mangisulat: “Sika a peteg so lalon maong ya indengan nen saray anak a lalaki. Say kalimgasan so nikalbo ed saray bibil mo. Sikato no akin a sika so benindito na Dios ed panaon ya ag-ageteran.” (Salmo 45:2) Manlapud agew na inkalanaan to ed espiritu na Dios, saray bibil nen Jesus so nantultuloy ya angipulong ed Panarian, ya anggad saray totoon ahente nen Satanas so temporaryon amepe ed sikara. Lapud katooran nen Jesus, sikato so benindisyonan nen Jehova ed ando lan ando diad impamaoli ed sikato a manlapud saray inaatey tan intandoro to ed tagey na amin nin arum a pinalsa. (Filipos 2:8-11) Nanlapulad mangatatawen ya inkigloria nen Jesus, sanen sikato so ‘eksakton representasyon na mismon kipapasen na Dios,’ sikato so nagkalalon malimgas nen say nitantandoron maong a manuley, too odino anghel. (Hebreos 1:3, 4) Natan, bilang nitronon Ari, pinabiskeg nen Jesus iray bibil na alanaan a bantay a klase tan say kakaiba ra diad pangikantan sitetepel ed maong a balita na Panarian. Anggaman kuan, saya met so sakey a kanta na bakal.
5, 6. (a) Anto so tutukoyen na ‘ikabayo [nen Kristo] a nisesengeg ed katuaan’? (b) Panon so panguusar na bantay a klase ed The Watchtower tan Awake!?
5 Insan say salmista so kinmelyaw ed manuley ya Ari: “Ibalkes mo so kampilan mo ed banel, O makapanyarin sakey, a pati kagalangan mo tan karlangan mo. Tan diad karlangan mo et sika so ontalona; onkabayo a nisesengeg ed katuaan tan kauyamoan tan inkatunong, tan kawanan a limam so mangibangat ed sika diad saray makapataktakot a bengatla.” (Salmo 45:3, 4) Nanlapulad 1914 et si Kristo so mangabkabayo la a mibakal, akaparaan lan onkiwas. (Apocalipsis 6:1, 2) Sikato so abalkesan na sakey a kampilan—say simbolo na bakal tan ontan met ed autoridad tan pakayarin nanlapud Dios a maneral ed saray onsusumpan nasyones. Si Kristo so akibakal ed si Satanas tan saray demonyos to, a sikara so imbasileng to a nanlapud katawenan tan sikara so impukok to ed kaliberliber na dalin.—Apocalipsis 12:1-13.
6 Anggaman kuan, sakbay a nipawil so kareenan, saray bengatlan lalon teribli nen say saya so gawaen na nikawanan a lima na Ari sano sikato so ‘onkabayo a nisesengeg ed katuaan’ diad Armagedon pian deralen to so amin a kakabusol na Dios ed dalin. (Salmo 45:4; Apocalipsis 16:14, 16; 19:17, 18) Pinatepel nen Kristo so alanaan a bantay a klase a mangikanta ed sayan pasakbay met. Anto so usaren na “bantay” diad pamakasil na boses to? Manuna ed saray pahina na magasin a Watchtower—say palapagan a matalona diad panangiyabawag ed niletneglan Panarian nen Jehova. Say bantay a klase, a singa sakey ya armadan walaan na maritan alakdan-duron, a naikdan na parehon espiritun manadagdag ed si Kristo ya “onkabayo a nisesengeg ed katuaan.” (Apocalipsis 9:7-11) Epektibo, uusaren daray magasin ya imparaan ed leksab na panangidirihe na “bantay”—say The Watchtower tan Awake!—“a nisesengeg ed katuaan.”—Mateo 24:45; ipareng so Apocalipsis 9:16-19.
‘Onkabayo a Nisesengeg ed Katuaan’
7. Diad anton agresibon dalan so pangiyaalibansa na Watchtower tan Awake! a magasin ed katuaan na Biblia?
7 Diad masulok lan sanlasus taon, say The Watchtower so mangipapatalona ‘na nisesengeg ed katuaan na Panarian.’ Onsianon uusaren to so Salita na Dios a bilang kampilan diad panangubak ed saray latip na katilaan ya amalkot ed saray palson relihyoson bangat. (Ipareng so Efeso 6:17; Hebreos 4:12.) Say magasin ya Awake! so mangiyaalibansa met ed katuaan. No nipaakar ed kaplesan iran nagagawa, say Awake! so angesat ed sakbong ya amalkot ed saray sientipikon teorya tan mapeligron kurang na sosyal tan moral a manmomodmora-ed-Biblia. Anto so nagawaan tayo ta pian nipalima irayan magasin ed mas dakel a totoo diad ontan et sikara so makadngel ed manangiliktar-bilay a mensahe na Panarian?
8, 9. Panon a say panangiyaplika ed prinsipyo na Efeso 5:16 diad panagbasa ed The Watchtower tan Awake! so ontulong ed sikayon “manlipwa” a mibiang ed panagtasi ed magasin? Mangiter na saray ehemplo?
8 Amin a manangaro na katuaan so nepeg a “manlipwa” ed mensahen karga na Watchtower tan Awake! (Salmo 45:1) Panon? Akin a saratan so agbasaen bektaman a sikara so naawat yo? ‘Agko basaen so sakey a sekular a magasin odino libro anggad sano nabasak ya ununa so interon magasin tayo,’ so inkuan nen Lillian ed inkasikato ed imbeneg lan samploy taon. Sikato nin siansia so matoor ed satan a desisyon. (Mateo 6:33) Anto so nagawaan yo kayari na pamasa ed saratan? Itongtong so karga ra ed arum—pamilya tan diad saray kaparan membro na kongregasyon. Saya met so mamapetang na seseg ed sikayo diad pantasi a tekep na saray magasin ta pian komon nibaga yo ed saray kakaabay yo so maabig a bengatlan abasa. Andi duaruwan labay yo so mibiang diad panagtasi ed magasin a kada simba, a sikara so itarok yo ed kaabungan na kakaabay yo. Saya so nayarin nipareng ed nengneng a si apostol Pablo so “nagnap ya angitarok na pantasi.”—Gawa 20:20, 21.
9 Si Peter tan si asawa ton Petra so manlilingkor a bilang misionero ed sakey a bansa ed Africa ed apalabas lan apat taon. Saray magasin a Watchtower tan Awake! so sakey ed saray manunan subol na biskeg da. “Say The Watchtower so mamapabilay ed sikamin mansiansian aliing ed espiritual diad teritorya mi,” so inkuan nen Petra. “Sikami so mangaasol na panamaseseg tan biskeg a manlapud kada paway na The Watchtower tan Awake!,” so inyarum nen Peter, “tan kada onsabi iray magasin, singano sikami so mangaawat na sulat a nanlapud abung.” (Ipareng so Salmo 46:1.) Kasin walaan kayo na ontan ya aralem ya apresasyon ed saray palapagan tayo tan kasin sikayo so magunaet a singa si Peter tan si Petra? Say ontan a nengneng na espiritu so managdag ed sikayon mangiyopresi ed saray magasin a maparanay ed arum met.
10. Diad anton nengneng na awawey so nakaukolan diad epektibon panagtasi ed magasin, tan antoran gungguna so pawalaen to?
10 Saray manangipalapag na Panarian so nepeg a walaan na positibon awawey diad panagtasi ed magasin. Saray totoon masimoon ed relihyon so siansian mangaabrasa ed niletneg-ed-Biblia ya impormasyon a nilugan ed saray palapagan tayo. (Ipareng so Gawa 10:15, 30-33.) Akin? Lapud satan so agda nagamoran ed arum a sengegan. Masulok lan 45 taon a linmabas ed Sweden, si Lars so akaawat na pigaran magasin a nanlapud sakey ya impleado. “Saya so makabaliksan,” so kuanto ed akulaw to kayari na impamasa ed saratan. “No anto so ibabaga na Biblia, saratan so ibabaga na The Watchtower.” Say abasa nen Lars so anenyeg ed sikato diad bautismo—Marso 1940. Imanoen so sananey nin alimbawa: Duaran ministron payunir ed abalaten ya Estados Unidos so angibaga:
“Sakey a bii so apitongtongan diad kimey ed magasin. Sikato so tesorera na sakey a baleg ya iglesia na Baptist tan sankaseryosoan ya estudyante met na Biblia. Sanen abasa toray serye ed tema na Armagedon diad saray paway na Watchtower na Enero 1 ya anggad Pebrero 15, 1985, sikato so aliketan. Diad inmuna, inusar to so dakel ya oras diad impangusisa ed satan a tema tan anggapo so aromog to nilikud ed kasulatan a wala ed Apocalipsis 16:16. Akauna la, intepet to ed ministro to: ‘Anto so Armagedon? Kasin nipaliwawam?’ Nilimgis na ministro tan kuanto, ‘Satan a tema so aralem,’ tan insan linma la. Inkuan na bii a say The Watchtower, ed biek a dapag, so angebat ed amin a tepet to tan saya lambengat so sengegan ya aromogan to a tekep na kasulatan diad tema ed Armagedon.”
11. (a) Akin ya iyeskedyul so panagtasi ed magasin, tan panon kabetbet? (b) Kasin say kimey ed magasin so ontulong ed kimey na panangiyaral ed Biblia? Ipaliwawa. (c) Panon so pakayari yon mangipalima ed The Watchtower tan Awake!? Nengnengen so kahon.
11 Kasin niyeskedyul yo so anggan sakey ya agew a para ed panagtasi ed magasin a kada simba, a saya so gawaen a kabiangan na espiritual a kurang mo? (Ipareng so Filipos 3:16.) “Saray manangipalapag, tan saray payunir met, so agmanguusar na magenap a panaon diad kimey na magasin,” so inkuan na sangan opisina na Watch Tower Society ed Nigeria. Balet kasin say panagtasi ed magasin natan so manatalona ed kimey na panaggaway-babangatan? Diad kasuniyan, saray report a nanlapud sanga na Sosyedad ed Australia tan Brazil so mangipapanengneng a say panangipalima ed saray magasin so manunan kundang diad impanangigapo na dakel a panangiyaral ed Biblia. “Manlapud saray inmunan nipalimak a magasin, taloran panangiyaral so nigapo,” so inkuan na sakey ya agin Australiana. Panon so nayarin pangipalima yo ed saray magasin a nayarin mangitonton ed panangiyaral na Biblia? Nengnengen so kahon ya apauloan na “Panangipalima ed Saray Magasin” a para ed saray suhestion.
Kasin Sarayan Suhestion So Sinali Yo La?
12. Antoran suhestion so apaneknekan a makatulong ed sakey a manangipalapag?
12 Say Ministeryo Tayo Ed Panarian a Mayo 1984, so walaan na apatiran-pahinan suplemento diad panagtasi ed magasin. Kasin saray suhestion ya inyopresi to so sinali yo la? Saray manangipalapag na Panarian so maong no basaen da lamet itan a suplemento tan iyaplika ra so simbawa to diad lawak na kimeyan. Sakey ya agin bii ed Estados Unidos so nanggawa ed satan; saray nansumpalan so makapalikliket ya anurprisa ed sikato. Insulat to:
“Gagawaen ko iray punto a nidatak ed suplemento na Mayo 1984 a Ministeryo ed Panarian nipaakar ed saray panangipalima ed magasin, tan say inkaepektibo to! Diad sampot na 1983 et siak lambengat so akapangipalima na 36 a magasin ed interon taon! Siak so aliwan maliket, aliwan ontan a tuloy lapud saray bilang ed report, noagta lapud siak so sinmaew a mangipalima ed sayan manangiter-bilay ya impormasyon ed totoon mankaukolan. Siak so nampikasi ed si Jehova nipaakar ed pamaakaran tan siak so determinadon mansagpot a lalo diad pangipalima ed The Watchtower tan Awake! Tinumbok koray suhestion nipaakar ed panangiletneg na personal a kalat diad panangipalima, ya inusar so antikey a presentasyon a mangipabitar ed sakey lambengat a magasin, maparanay ya ompaway ed lawak na kimeyan diad agew na magasin, tan walaan na positibon awawey. Natan sano aglabay na unabung so kaplesan ya opresi, ikuan ko: ‘Bueno, diad ontan itilakan takayo lambengat na sankabaloan iran paway na The Watchtower tan Awake! diad 40 cents.’ Sarayan punto so peteg ya epektibo. Diad unor ya apatiran bulan, ayarian ko so nampromedio na 14 a magasin a kada bulan!”
13. Anton simbawa so nipalapag nen 1888 a siansia nin praktikal natan?
13 Diad Disyembre 1888 a paway na Zion’s Watch Tower, diad leksab na paulon “A Suggestion to the Reapers,” sayan simbawa so niiter: “Say sankabalgan a kairapan ed biang na dakel so ompaway a saray kapusoan da so napnon tuloy na maabig a balita, a sikara so natukson mangibaga na malaem nipaakar ed Plano na Dios.” Kasin satan a simbawa so siansia nin onaplika? Sanen atepetan no anto so nayarin gawaen na saray manangipalapag pian napadaak so nipalima a magasin, sakey a manangasikaso na sirkito ed Pransya so inmebat: “Gawaen ya antikey. Direkta ed punto.”
14, 15. Panon a saray retrato ed The Watchtower tan Awake! so nausar diad panagtasi? Mangiter na saray ehemplo.
14 Diad dakel iran lenguahe a pinatnagan na magasin saray makasagyat iran ilustrasyon ed apatiran kolor so angarum ed dakep na mensahe na Panarian legan a narapat toray nanduruman nengneng na totoo. Diad Enero 8, 1987 a paway, say Awake! so nikasakey ed The Watchtower diad kiprinta to ed apatiran kolor ed maslak a manunan lenguahe. Kasin inusar yoray ilustrasyon tan retrato ed magasin a bilang pantotongtongan a punto? Dakel so nanggawa na ontan, a tekep na maabig iran nansumpalan. Si Theresa, sakey a misionera ed Arawin Bukig nanlapulad 1976, so nanggawa na ontan. Sikato so angibunog na 260 magasin ed sakey a bulan. Inusar koray retrato a mangipabitar ed saray manunan punto ed presentasyon ko,” so kuanto. “Mabetbet a basta ipanengneng ko so apis ed unabung tan salambiten so tema, tan say magasin so mangipalima la ed inkasikato.”
15 Si Kay, sakey a misionero ed bansa na Suriname, so walaan na miulibay ya eksperiensia. Sikato tan say masiken to so wadman la ed samploran taon, tan aromog daray retrato ya epektibo sano mantatasi, nagkalautla ed saraman so wala ed pananisian Hindu. Akin? Impaliwawa nen Kay:
“Say relihyon a Hindu so sakey a retraton relihyon. Diad sakey a puerta, tinepetan ko so sakey a bii: ‘Ipangasim ya ibaga ed siak so ngaran na saray dirios mo ed saray retratom.’
“‘Saya si Shiva,’ so inyebat to.
“‘Natan, dinan so manunan dios?’ so intumbok kon intepet. Ag-inmebat. ‘Basaen ta so Jeremias 10:10-12. Dinan a Dios so mangibabagan sikato so Amalsa? Si Jehova lambengat. Amta mi ya inarom iray retrato. Agta sarayan retrato ed The Watchtower tan Awake! so mararakep tan makapasagyat? Agta labay mon panggayagaan so pakaaral ed kabaliksan da?’”
Akin ya agsalien ya ipanengneng iray retrato diad tongtongan yo diad ontumbok a sikayo so mibiang ed kimey na magasin?
16. Antoran suhestion a nanlapud sakey a manangipalapag ed Hong Kong so nayarin naromog yon makatulong?
16 Legan a manseserbi ed Hong Kong, si Gene so nampromedio na 300 a nipaliman magasin a kada bulan. Panon so impakapanggawa to na ontan? Impaliwawa to:
“Ununa, ipikasi so panamendisyon nen Jehova ed panagtasi yo ed magasin. Komadua, magmaliw a positibo, maimis, tan makaaro. Komatlo, magmaliw a manangitukoy tan mipapakna, tan anapen so panaabobonan a tongtongan ed unabung. Komapat, mamedido na magenap a magasin a para ed interon bulan. Siak so walaan na baleg a pedido, lapud saya so mangiter ed siak na baleg a motibasyon. Komalima, sika so angigana na sakey a labi ed kada simba a para ed kimey na magasin, lapud dakel a totoo so wala ed abung ed satan tan manpapainawa. Komanem, mangigapo na ruta na magasin, anggano satan so melmelag.”
Ruta na Magasin
17. (a) Diad anton nengneng na panagtasi tayo ed magasin a niyaplika so prinsipyo ed Gawa 15:36? (b) Diad saray bansa a makapkapuy so koreo, anto so sakey a dalan diad pakapalima na manangipalapag ed saray magasin?
17 “Say pangiyapiger na suston rekord no iner so akapangipalimaan na saray magasin tan insan ondalaw a maparanay so sakey a dalan diad pamadaak na nibunog a magasin,” so kuan nen Ollie, a manseserbi ed bansa na Africa a Burkina Faso. “Siak so walaan na 15 totoo diad rutak ed magasin. Lapud say Burkina Faso so aliwan sakey a manag-imprintan sanga tan say koreo so makapuy, saray Tasi so mabetbet a makaawat ed saray magasin ya ibunog a bansag, nayarin apatira odino limaran paway ed sakey a panaon.” Kasin satan met so tua ed bansa yo? No ontan, anto so nagawaan pian natalonaan iyan angat na panangipalima ed saray magasin? “Nayarian yon ipanengneng so pigaran kopya na kada paway, tan ibuskag iray magasin pian imbitaan so interesadon too a manpili no dinan so labay ton basaen,” so insuhiri nen Ollie. “Gendagendat, sikato so mangala ed satan ya amin.”
‘Manlipwa ed Maabig a Bengatla’
18. Anton aspekto na agano nin report ed lawak na kimeyan so nagkalautlan komendabli, tan diad anto so nayarin pangiteran tayo na babaleg ya imano?
18 Sikayoran manangipalapag na Panarian so tinmulong ed dramatikon indakel na saray bilang na suskripsion a nipalima ed saray magasin. Sikayo met so nakomendaan diad seseg yo a mangikayat ed maong a balita ed onian dalan. Ontan met a komendabli et say intagey na dagup na nipaliman magasin. Angangko, anggaman kuan, niiter tayo so lalon imano diad indibidual a nipalima tayon magasin. Diad lalon malaknab a panangobre ed teritorya, saray nipaliman magasin na kada manangipalapag so dinmaiset. Lapud sikatayo so manbibilay ed kautelan na anggaan na panaon, kasin sikatayo so magmaliw a lalon ‘manlipwa ed maabig a bengatla’ ed Panarian diad panamegley na panagtasi ed magasin?—Salmo 45:1; 1 Pedro 4:7.
19. Diad anton duaran dalan so pakapangipatalona tayo ed katuaan na Panarian?
19 Si Kristo ed karlangan na Panarian so mangabkabayo ed aligwas diad panamasantos masanton ngaran nen Ama to tan diad panangalangon ed sankatalbaan ya inkasoberano To. (Apocalipsis 6:2) Usaren tayoray dila tayo tan say inggalot a pahina diad pangiyabawag ed isasabi to. Komon ta sikatayo so sitotoor a mangikasil ed saray boses tayo a kaiba so alanaan a bantay a klase legan a mibiang ed si Kristo diad panangipatalona ed katuaan na niletneglan Mesianicon Panarian na Dios. On, sikatayo so malaknab a mangibunog ed The Watchtower tan Awake!—saray magasin a mamano na makanan betang legan a say Ari tayo so ‘onkabayo a nisesengeg ed katuaan.’—Salmo 45:4.
Kasin Nanonotan Yo?
◻ Anto so “maabig a bengatla” a mamaligsa na puso yo?
◻ Say ‘ikabayo [nen Kristo] a nisesengeg ed katuaan’ so mangitarok na antoran resulta?
◻ Diad anton pantalos a say The Watchtower tan Awake! so manserbi “a nisesengeg ed katuaan”?
◻ Panon ya ikdan tayo na lalon imano so panagtasi ed magasin?
[Kahon/Litrato ed pahina 21]
PANANGIPALIMA ED SARAY MAGASIN
Kasin Sinali Yo La?—
◆ Panagtasi ed kabkaabungan
◆ Panagtasi ed lansangan
◆ Panagtasi ed negosyo
◆ Panagtasi ed ruta-na-magasin
◆ Panagtasi ed labi
◆ Sano ag-inawat so opresin libro
◆ Sano manggagawa na panagpawil
◆ Ondadalaw ed saray datin iyaaralan na Biblia
◆ Sano manbibiahe odino mansasaliw
◆ Sano mitotongtong ed kakanayon, katrabahowan, kakaabay, kaeskuelaan, odino mamaestro