Iyopresi Iray Magasin a Mantatasi ed Katuaan
1. Anto so betang na Say Panag-Bantayan tan Awake!?
1 Say Panag-Bantayan a Mangipapalapag na Panarian nen Jehova tan say kapares ton Awake! et siansian manunan kabiangan na panangipulong ed Panarian tan panaggaway babangatan. (Mat. 24:14; 28:19, 20) Panliliketan tayo so regular a panangipresenta ed sarayan duaran nipanpanaon a magasin legan itayon mibibiang ed nanduruman aspekto na serbisyo na Panarian.
2. Antoran pananguman so ginawa ed Say Panag-Bantayan tan Awake!, tan akin?
2 Diad inlabas na saray taon, anengneng tayo so impanguuman ed kabaleg tan lugan na saray magasin ontan met ed saray metodo ed panangibunog ed saratan. Ginawa irayan pananguman a say gagala et pian lalon makapasagyat tan epektibo iray magasin, diad ontan et say mensahe na Panarian et makasabi ed puso na “amin a totoo [pian] nilaban ira komon, tan ondago ra ed pakapikabat ed katuaan.”—1 Tim. 2:4.
3. Panon a nausar iray magasin ed ministeryo?
3 Nanlapula’d Enero 2006, nipasal tayo lay pangusar ed nanduruman presentasyon parad binulan ya isyu na Awake! Natan et mangusar itayo met na miparan metodo diad pangiyopresi ed parad publiko ya edisyon na Say Panag-Bantayan a Mangipapalapag na Panarian nen Jehova ed ministeryo tayo. Saray pangaligan a presentasyon so naromog ed beneg a pahina na Ministeryo Tayo ed Panarian. Saraya so kaslakan lan mangipapabitar na sakey ed saray walad unaan ya artikulo na magasin balet no maminsan et iparungtal met iray arum ya artikulo a makapasagyat ed dakel a totoo. Sankaepektiboan so paraan na pangusar tayo ed saray nipalapag a suhestion no kabisado tayo so artikulo a niparungtal ed pangaligan a presentasyon tan ibalikas itan ed dili tayon salita pian niyadapta ed teritorya tayo.
4. Akin a makagunggona so pangusar na arum niran presentasyon likud ed nisuheri iran presentasyon ed Ministeryo Tayo ed Panarian?
4 Anggaman say Ministeryo Tayo ed Panarian et mangisusuheri na duaran suhestion ed kada magasin, bulos kayon mangusar na duman presentasyon. Say sakey a rason ed panggawa ed satan et lapud say arum ya artikulo et nayarin mas makapainteres ed teritorya yo. Odino nayarin isipen yo a wala ni mas epektibon presentasyon diad pangusar ed sakey ya artikulo a mas makapainteres ed sikayo.
5. Antis a mangiparaan na presentasyon parad iparungtal a magasin, antoy nepeg yon gawaen?
5 No Panon ya Iparaan so Presentasyon Yo: Manuna ed amin, nepeg a kabisado yo so artikulo ya iparungtal yo. Nayarin aliwan naynay a kabisado yo so amin ya artikulo ed magasin antis yon igapon usaren itan ed lawak na ministeryo. Balet, nepeg a napatnagan ed sikayo so ligsa tan inkasimoon diad saray artikulon pinili yon iparungtal. Nagawaan yo labat itan no kabisado yon maong so impormasyon ya ipresenta yo.
6. Panon tayon niparaan iray dilin presentasyon tayo?
6 Ontumbok, sano manpaparaan kayo, manggawa na saray introduksion a nitukoytukoy. Nayarin mangusar na matukoy tan makasagyat na interes a tepet a mitukoyan ed artikulo bilang pangigapoy tongtongan. Lawas manilalo ed pakapanyari na Salita na Dios a manabi ed puso. (Heb. 4:12) Mamili na matukoy a teksto a mitunosan ed tema ya iparungtal yo, mas maabig no samay nisitas odino inaon ed artikulo ya ipaparungtal yo. Nonoten no panon ya itunos so teksto ed artikulo.
7. Panon tayon parakepen ni iray presentasyon tayo?
7 Diad Amin a Pankanawnawa: Pian epektibo so sakey a presentasyon, nepeg ya usaren itan. Mibiang ed kongregasyon ed agew na panangiyopresi na magasin ed Sabado. Iyopresi iray magasin ed totoo ya angawat na literatura nen imbeneg. Opresian a naynay na magasin iray iyaaralan yo na Biblia tan arum a totoo a nayarin nasabi yo sano manggagawa kayoy panagpawil. Makapangiyopresi kayo na saray magasin ed totoo a nakatongtong yo ed panagsaliwan, diad panagbiahe, odino sano manaalagar kayo diad klinik na doktor. Parakepen iray presentasyon yo legan yon uusaren itan ed interon bulan.
8. Diad antoran paraan a nikaduma so Say Panag-Bantayan tan Awake!?
8 Nikaduman magasin so Panag-Bantayan tan Awake! Itatandoro na saratan si Jehova bilang Soberano ed uniberso. (Gawa 4:24) Saratan so manliligliwa ed totoo tekep na maong a balita na Panarian na Dios tan mangipapaseseg na pananisia ed si Jesu-Kristo. (Mat. 24:14; Gawa 10:43) Niarum ni, sarayan magasin so manbabantay ed saray nagagawa ed mundo legan a susumpalen na saraya so propesiya na Biblia. (Mat. 25:13) Tulongan iray totoo ed teritorya yo a nagunggonaan ed sarayan palapagan diad pamparaan a mangiyopresi ed saratan ed amin a matukoy a pankanawnawa!
9. Panon tayon niparaan so ipawil?
9 Sano akapangipalima kayo na magasin, odino maabig so impangitongtong yo ed espiritual a bengatla, lawas mangitilak na sakey a tepet odino makapainteres a balikas a pamawilan yo ed ontumbok a maespiritual a pitongtong yo. No maseseg itayon mangitanem na bini na katuaan, makaseguro itayon lukasan nen Jehova so kapusoan na saramay masimoon a manpilalek a mikabat tan manlingkor ed Sikato.—1 Cor. 3:6.