Say Panag-Bantayan tan Awake!—Nipanpanaon Iran Magasin na Katuaan
“Sika dinondon moak, O Jehova, sika, Dios na katuaan.”—SALMO 31:5.
1, 2. (a) Anto so alikna na sakey ya agin bii nipaakar ed bengatlan abasa to ed The Watchtower? (b) Antoran tepet so nitepet nipaakar ed saray magasin tayo?
“SALAMAT na baleg,” insulat na sakey a Kristianon agin bii, “ed marakerakep ya impormasyon ed artikulo na Watchtower ‘You Can Find Comport in Times of Distress.’a Dakel a tuloy ed saray punton sinaglawi yo so eksakton nasasagmak ko a kaukolan kon pidenengan; sayan artikulo so singa nisulat a direkta para’d siak. Diad inmunan inpakabasak ed satan, siak so akalua. Agaylan makapakelkelaw a tuloy so pakamorian walay makaaamta ed liknaan ko! Siak so misadsalamat ed impagmaliw kon sakey ed saray Tasi nen Jehova. A pakarumogan tayo na saray sipan na bilay ya andi-anggaan diad Paraiso ed asingger ya arapen tan, natan, et ligliwa ed saray kamarerwa tayo! Salamat ed sikayo. Salamat na agnasabsabaan.”
2 Ontan ta so aliknam? Kasin wala ta so singa sakey a bengatla ed Say Panag-Bantayan odino say kaiba ton magasin, ya Awake!, a nikadkaduman nisulat para’d sika? Anto ta so niwalad magasin tayo a makapaayat ed kapusoan na totoo? Panon tayon natulongan so arum pian nagunggunaan manlapud manangiliktar-bilay a mensahe a karga na saratan?—1 Timoteo 4:16.
Saray Magasin a Mangiwawandag na Katuaan
3. Diad anton rason a Say Panag-Bantayan tan Awake! a magasin so anenyeg ed kapusoan na dakel a managbasa?
3 Si Jehova so “Dios na katuaan.” (Salmo 31:5) Say Salita to, say Biblia, so sakey a libro na katuaan. (Juan 17:17) Saray matuan-impanpuson totoo so onkikiwas ed katuaan. (Ipareng so Juan 4:23, 24.) Say sakey a rason a Say Panag-Bantayan tan Awake! so manetenyeg ed kapusoan na nilaksan managbasa et lapud saratan so magasin na katooran tan katuaan. Diad tua, lapud isyu na katooran ed katuaan na Biblia a Say Panag-Bantayan so nigapon nipalapag.
4, 5. (a) Antoran sirkumstansya so angitonton ed si C. T. Russell ed pangipalapag na Watch Tower? (b) Panon a say magasin a Panag-Bantayan so uusaren na “matoor tan makabat ya aripen”?
4 Nen 1876, si Charles T. Russell so nagmaliw a kaulop nen Nelson H. Barbour, na Rochester, Nueva York. Angitarok na saray pundo si Rusell pian ibangon so pangimprinta lamet ed relihyoson peryodiko nen Barbour a Herald of the Morning, si Barbour so manunan editor tan si Rusell bilang katulongan ya editor. Anggaman ontan, ngalngalin sakey taon tan kapaldua ed saginonor, ed Agosto 1878 a paway na Herald, insulat nen Barbour so sakey ya artikulo ya angiburi ed mananondon a balor na inpatey nen Kristo. Si Russell, a ngalngalin malalangwer na 30 a taon nen si Barbour, so inmebat ed sakey ya artikulo ed katumbokan ton paway ya anuporta ed dondon, a satan so tinukoy to bilang “sakey ed saray sankaimportantian a bangat na Salita na Dios.” (Mateo 20:28) Kayari na nauli-ulit iran sagpot ed makasulatan a pikakatunong ed si Barbour, diad kaunoran et deniside nen Russell a pultoten so amin a siglaotan ed Herald. Ginmapo nen Hunyo 1879 a paway na satan a magasin, aglan balot inmapireng so ngaran nen Russell bilang katulongan ya editor. Sakey bulan ed saginonor, si Rusell a mantaon na 27 so ginmapon angipalapag ed Zion’s Watch Tower and Herald of Christ’s Presence (kabat natan bilang Say Panag-Bantayan a Mangipapalapag na Panarian nen Jehova), a nanlapulad gapo et manusuporta ed Makasulatan a katuaan, a singa say dondon.
5 Diad apalabas lan 114 a taon, Say Panag-Bantayan, a singa onsianon abogado, so akabatan bilang manangidepensa na katuaan tan doktrina na Biblia. Diad kipapaway, satan so panmamatalkan na nilaksan maapresyan managbasa. Satan so siansia nin mabiskeg a manusuporta ed dondon. (Nengnengen, alimbawa, so paway na Pebrero 15, 1991.) Tan satan so mantutultuloy a manunan instrumento na “matoor tan makabat ya aripen” tan say Mananguley ya Ulop para’d pangipalapag na niletneg a Panarian nen Jehova tan pananginabang na espiritual a tagano “ed panaon a kinepegto.”—Mateo 24:14, 45.
6, 7. Anto so nibagan gagala na The Golden Age, tan anto so mangipapanengneng a saray maisip a totoo so kinmiwas ed mensahe to?
6 Komusta balet so magasin ya Awake!? Nanlapulad inggapo to, say Awake! so mangiwawandag met na katuaan. Datin tatawagey The Golden Age, sayan magasin so denisinyo pian ibunog ed publiko. Nipaakar ed gagala na satan, say inmunan paway, ya apetsaan na Oktubre 1, 1919, so angikuan: “Say gagala na saya et ipaliwawa unong ed liwawa na Madibinon kakabatan so tuan kabaliksan na baleg a nagawgawa ed kaplesan ya agew tan paneknekan ed saray maisip diad panamegley na sigpot a katuaan tan makakumbensi a say panaon na sakey a babaleg a bendisyon ed katooan so asingger la.” Saray maisip a totoo so kinmiwas ed mensahe na The Golden Age. Diad loob na dakel lan taon, say sirkulasyon to so lalon dakel nen Say Panag-Bantayan.b
7 Anggaman ontan, say makaayat ed Say Panag-Bantayan tan Awake!, et say bengatlan mangipapalapag na doktrinal iran katuaan tan mangipapaliwawa ed mapropetikon kabaliksan na saray kipapasen ed mundo. Nagkalalo la ed apalabas a sakey odino duaran dekada, saray magasin tayo so anagyat ed kapusoan na totoo para’d sananey met nin rason.
Nipanpanaon Iran Artikulo a Mangaapekta ed Bilay na Totoo
8. Anton pananguman so ginawa nen Judas ed sulat to, a mangipapaseseg ed saray managbasa to a manumpa ed antoran impluensya ed loob na kongregasyon?
8 Ngalngali 30 a taon kayari na inpatey tan inkioli nen Jesu-Kristo, say managsulat na Biblia a si Judas so nidunget ed makapaangat a kipapasen. Saray imoral, inaayep a totoo so akapuslit ed limog na saray Kristiano. Ginagala nen Judas so mansulat ed kaparan Kristianos nipaakar ed sakey a tema na doktrina—say kilalaban para’d amin ya alanaan a Kristianos. Imbes, diad inpangiwanwan na masanton espiritu, naimano ton kaukolan ton pasesegen iray managbasa to a manumpa ed abulok iran impluensya ed loob na kongregasyon. (Judas 3, 4, 19-23) Kinmiwas si Judas unong ed kipapasen tan angitarok na nipanpanaon a simbawa a mangapet ed saray pankaukolan na Kristianon agagi to.
9. Anto so nalalanor ed pangitatarok na nipanpanaon iran artikulo para’d saray magasin tayo?
9 Mipadpara, say panangiparaan na nipanpanaon iran artikulo para’d saray palapagan tayo et sakey a makapaangat a responsabilidad. Manguuman iray panaon, tan ontan met iray totoo—saray pankaukolan tan saray interes da so midumaan ed apalabas a samplora odino ed duamplon taon. Sakey a managbiahen manangasikaso so akaimano na onia ed agano ni: “Sanen siak so nagmaliw a Tasi ed saray taon na 1950, say paraan tayo ed panangiyaral na Biblia ed totoo so kaslakan a nipaakar ed doktrina—ya ibabangat ed sikara so katuaan nipaakar ed Trinidad, impiernon-apuy, say kamarerwa, tan arum ni. Balet natan et ompatnag a walaray dakel a problema tan kairapan ed kabibilay na totoo a nepeg tayon ibangat ed sikara no panon so manbilay.” Akin ya ontan?
10. Akin a sikatayo so agnikelawan ed iyuuges na kabibilay na katooan nanlapulad 1914?
10 Nipaakar ed “saray kaonoran ya agew,” inpasakbay na Biblia: “Saray totoo a mauges tan saray managsaol onuges lara’n onuges, a managsaol ira, tan nasaol ira met a dili.” (2 Timoteo 3:1, 13) Sirin, nepeg tayon agpankelawan so iyuuges na kabibilay na katooan nanlapulad panaon na anggaan a ginmapo nen 1914. Si Satanas, a say panaon ton natitilak et antiktikey la, so mangipapangget ed sanok to ed sosyedad na katooan ya agnin balot agawa nen kapiganman. (Apocalipsis 12:9, 12) Bilang resulta, saray estandarte nipaakar ed moral tan say pamilya so duman tuloy ed apalabas labat a 30 odino 40 a taon. Saray totoo ed inkalapagan so aliwan relihyoso a singa ed apalabas iran dekada. Say krimen so onpapalalon tuloy a sengegay panaalwar na totoo a bengatlan agginawa ed apalabas a 20 odino 30 a taon.—Mateo 24:12.
11. (a) Antoran nengneng na tema so walad kanonotan na totoo, tan panon a say matoor tan makabat ya aripen a klase so kinmiwas ed saray pankaukolan? (b) Mangiter na sakey ya alimbawa na sakey ya artikulo na Panag-Bantayan odino Awake! ya anenyeg ed bilay yo.
11 Agmakapakelaw, sirin, a saray isyu ed emosyonal, sosyal, tan pamilya so sankanonot na dakel a totoo. Say matoor tan makabat ya aripen a klase so sipapakpel ya inmebat ed Say Panag-Bantayan tan Awake! diad pangipapalapag ed nipanpanaon iran artikulo a manutukoy ed peteg iran pankaukolan na totoo tan tuan makaapekta ed bilay da. Konsideraen so pigaran alimbawa.
12. (a) Akin a saray artikulo nipaakar ed mansusulon-ateng iran pamilya so inparaan para’d Say Panag-Bantayan nen 1980? (b) Panon so inpangibalikas na sakey ya agin bii ed apresasyon to ed saray artikulo ed mansusulon-ateng iran pamilya?
12 Panpamilya iran isyu. Sanen impanengneng na sankamundoan iran report so maples ya indaak na bilang na mansusulon-ateng iran pamilya, saray duman tuloy ya artikulo ed teman “One-Parent Families—Coping With the Problems” so inparaan para’d Setyembre 15, 1980, a paway na The Watchtower. Saray artikulo so walaan na nankaduan gagala: (1) pian tulongan iray mansusulon atateng diad panalona ed nikaduma iran probleman kidudungetan da tan (2) pian tulongan iray arum a nawalaan na nagkalalon pikakabat ta pian nipanengneng da so ‘panangabagey’ tan talagan “naasikaso” iray pamilya na mansusulon-ateng. (1 Pedro 3:8; Santiago 1:27, NW) Dakel iran managbasa so nansulat pian ibalikas so apresasyon ed saray artikulo. “Satan so peteg ya amalua ed siak sanen anengneng ko so apis,” kuan na sakey a mansusulon-ateng a bii, “tan sanen binukay ko so magasin tan binasak so impormasyon, say pusok so manlepwa na pisasalamat ed si Jehova ed pangitatarok na ontan ya impormasyon diad panaon a nakakaukolan iman.”
13. Anton aralem-a-tuloy a diskusyon na kagogonigon so nipalapag ed Awake! nen 1981, tan anto so inbaga na sakey a managbasa nipaakar ed satan?
13 Saray isyun emosyonal. Say tema ed pakakagonigon so asingbat ed Say Panag-Bantayan tan Awake! nanlapulad saray taon na 1960. (1 Tesalonica 5:14) Balet sakey a balo tan positibon nengneng ed tema a nisalaysay ed saray seryen “You Can Fight Depression!” ed Septyembre 8, 1981, ya Awake! Ag-abayag et dakel a sulat na apresasyon so nipawit ed Watch Tower Society a nanlapud sankamundoan. “Panon kon nibalikas ed sulat iray liknaan ko?” insulat na sakey ya agin bii. “Siak so mantaon na 24, tan diad loob na apalabas a samploran taon, dakel a panaon a siak so nagogonigon. Balet natan et naliknak a mas maapit ak ed si Jehova tan misadsalamat lapud sikato so angebat ed saray pankaukolan na nagogonigon a totoo diad panamegley na sarayan maaron artikulo, tan kaliktan kon ibaga itan ed sikayo.”
14, 15. (a) Panon a say tema ed panang-abuso ed ugaw so nisiglaot ed saray palapagan tayo? (b) Dinan iran artikulo na magasin so akasagyat ed sakey a lomolomba na kabayo ed Australia?
14 Pan-sosyal iran isyu. Impasakbay na Biblia a diad “saray kaonoran ya agew” saray totoo so magmaliw a “mangaro ed saray lamalaman da, . . . angapo so aro ra a nianakan, . . . aliwa ra’n maadia, maruksa ra, maingongot ed saray maabig.” (2 Timoteo 3:1-3) Sirin, sikatayo so agmankelaw a say panag-abuso ed ugugaw so malaknab a nagagawa natan. Sayan tema so direktan asingbat ed artikulon “Help for the Victims of Incest” ed The Watchtower na Oktubre 1, 1983. Waloran taon ed saginonor, say serye ed apis a “Healing the Wounds of Child Abuse” ed Oktubre 8, 1991, na Awake! so siaalwar a niparaan pian mangitarya na pakatalos tan ilalo para’d saray biktima ontan met ed pakaliwawaan na arum ta pian sikara so makatulong. Sayan serye na saray artikulo so akagamor na sankaraklan ya ebat na saray managbasa diad awaran na saray magasin tayo. Insulat na sakey a managbasa: “Say sankabalgan ya epekto ed inyabig ko et say makaligliwa iran kanonotan tan makasulatan iran inpanukoy ed sarayan artikulo. Say pikabat a siak manaya so aliwan ontanlan abebbeba ed imaton nen Jehova, so balbaleg a pakainawaan. Say pikabat a siak manaya so agmanbokbokor, so makaligliwa met.”
15 Sakey a milolomba na kabayo ed Melbourne, Australia, so nan-long-distance ed opisina na Watch Tower Society ed Sydney, ya ibabalikas to so pandimla to ed lombaay-kabayon kaliber-liber. Inkuan ton abasa to so Marso 8, 1993 ya Awake! ed “Rape—A Woman’s Nightmare” tan mairap a panisiaan a say ontan a makanan magasin so wala. Sikato so nantepet ed ngalngalin 30 minuto tan aliketan ed nadngel ton niiter iran ebat.
16. Diad antoran paraan a nidemostram so apresasyon mo ed saray magasin tayo?
16 Kumosta ka met? Kasin say bilay mo so naapektoan na sakey ya espisipikon artikulo ya impalapag ed Say Panag-Bantayan odino ed Awake!? No ontan, andi-duaruwan sika so makakalikna na baleg ya otang a linawa para’d saray magasin tayo. Panon mon nidemostra so apresasyon mo? Petepeteg diad panbasam a mismo na kada paway. Sika met so makapibiang diad sankalaknaban a panangibunog na sarayan mablin palapagan. Panon iyan nagawaan?
Inabang Iratan ed Arum!
17. Anto so nagawaan na saray kongregasyon pian ondaak so panangibunog na magasin?
17 Ununa, wala so nagawaan na kada kongregasyon ed sayan bengatla. Say Oktubre 1952 a paway na Informant (a natan et Say Ministeryo Tayo ed Panarian) kuanto: “Say sankaepektiboan iran metodo na panangibunog na saray magasin et diad kabkaabungan tan ed saray lakoan. Kanian isusuheri na Sosyedad a sarayan paraan na panangibunog na magasin so magmaliw a maparanay a kabiangan na Panagmagasin ya Agew.” Satan a simbawa so siansia nin makana natan. Saray kongregasyon so nayarin mangiyeskedyul na sakey a regular a Panagmagasin, niganan agew para’d panagmagasin. Para ed maslak a kongregasyon, saray nidisignan Sabado so andi-duaruwan maabig a panaon. On, komon ta kada kongregasyon so mangigana na espesyal iran agew odino labin panagtasi diad panagmagasin—diad kabkaabungan, lakoan, lansangan, tan diad saray rota na magasin. Niarum ni, anto so nagawaan mo bilang manangipalapag na Panarian ed pamadaak na panagbunog na magasin?
18, 19. (a) Panon a say inkamakabisado ed Panag-Bantayan tan Awake! so ontulong ed sikayo diad pangipalima na saray magasin? (b) Anto so pankaabigan na antikey, mitunosay ed presentasyon sano mangiyoopresi na saray magasin? (c) Anto so mangipapanengneng ed kablian na pakapangitilak na saray magasin ed saray ayaman na totoo?
18 Say pagmaliw a maisip ed “Panag-Bantayan” tan “Awake!” so ununan kundang. Basaen iray magasin ya ununa. Legan a babasaen mo so kada artikulo, tepetan mo so inkasika, ‘Diad siopa a sayan artikulo so makapainteres?’ Nonoten moray pigaran salita a nibagam pian naliing so interes a walad artikulo. Nilikud ed regular a panusuporta ed Panagmagasin, akin ya agmangawit na saray kopya ta pian naanamot so kada pankanawnawa ed pangipanabang ed saratan diad saray arum—sano manbiabiahe odino mansasaliw tan sano mitotongtong ed saray katrabahoan, kakaabay, kaeskuela, odino saray bomabangat?
19 Say pamasiansian simpli ed presentasyon so komaduan suhestion. Inkuan na Disyembre 1, 1956, a Panag-Bantayan: “Say antikey, direkta-ed-punton presentasyon so sankaabigan sano iyoopresi iray magasin. Say gagala et say pakapangipalima na dakel a kopya. Saratan so mismon ‘mansalita’.” Aromog na arum a manangipalapag ya epektibo so pamili na sakey ya ideya manlapud sakey ya artikulo, tibukelen ed pigaran salita, tan insan iyopresi iray magasin. Bektaman a say magasin so walalad saray ayaman, saray magasin so nayarin ‘mansalita’ ed arum a totoo nilikud ed toon angawat ed saratan manlapud sika. Diad Ireland sakey a walad kalangweran a bii ya estudyante ed unibersidad so akabasa ed Setyembre 1, 1991, a paway na Say Panag-Bantayan, ya inawat na ama to manlapud sakey a Tasi. Saray artikulo nipaakar ed pitatalosan tan arum niran tema so amaliing na interes to. Kabasa to ed magasin, tinelepono toray Tasi, tinawagan to so numeron walad direktory. Nigapon tampol so sakey a panagaral na Biblia, tan sayan walad kalangweran so abautismoan diad “Madibinon Panangibangat” a Distriton Kumbension nen Hulyo 1993. Petepeteg, komon ta makapangitilak itayo na saray magasin ed saray ayaman, a saratan so nayarin ‘mansalita’ ed totoo! Inyopresi na sakey a managbiahen manangasikaso so sananey a simplin suhestion: “Ipaway iray magasin ed bag yo.” On, no say ibabaga yo so ag-akaalay interes na unabong, insan say makaayat iran ilustrasyon ed apis so nayarin mangipalima ed saray magasin para’d sika.
20, 21. (a) Panon kayon magmaliw a manangitukoy sano mibibiang ed panagmagasin a kimey? (b) Pian makapangipalima na dakel iran magasin ed kada bulan, anton personal iran kalat so nisusuheri?
20 Say komatlon suhestion et say pagmaliw a manangitukoy. (Ipareng so 1 Corinto 9:19-23.) Mangiparaan na pigaran antikey iran presentasyon. Tandaan so sakey ya artikulo a makapaliket ed lalaki, say sananey et para’d bibii. Para ed tobonbalo, nayarin ipresentam so sakey ya artikulo a “Young People Ask . . . ”. Magmaliw a manangitukoy, met, sano mibiang ka ed panangibunog na magasin. Niarum ed Agew na Panagmagasin, nayarin naimanom a say panagtasi ed labi so mangitarok na sankaabigan a pankanawnawa ed pangiyopresi na saray magasin ed kabkaabungan.
21 Say komapat a suhestion et say pangigeter na personal a kalat. Say sigpit a “Saray Magasin So Mangituturo ed Dalan na Bilay,” a pinmatnag ed Say Ministerio Tayo ed Panarian na Marso 1984, so angikuan: “Bilang suhestion, a nayarin saray manangipalapag so nawalaan na kalat, alimbawa, 10 magasin ed kada bulan, mandependi ed saray sirkumstansya; nayarin panbanikelan na saray payunir ya aboten so 90. Siempre, nayarian na arum so mangipalima na mas dakel ni tan sirin mangigeter na atagtagey a personal a kalat. Anggaman ontan, nisengeg ed kakapuyan na laman, nengneng na teritorya, odino arum niran maabig a rason, say kalat na arum so nayarin abebbeba. Ingen say serbisyo ra ed si Jehova so parehon mabmabli. (Mat. 13:23; Lucas 21:3, 4) Say importantin bengatla et say pangigeter na personal a kalat.”
22. Diad anton paraan a nipanengneng tayo a sikatayo so misadsalamat ed si Jehova para’d nipanpanaon iran palapagan tayo na katuaan?
22 Agaylan sikatayo so misadsalamat a si Jehova, a “Dios na katuaan,” so manguusar ed matoor tan makabat ya aripen a klase tan ed Mananguley ya Ulop to ed pangitatarok ed sikatayo na sarayan nipanpanaon a palapagan! (Salmo 31:5) Legan ya iyabuloy nen Jehova, sarayan magasin so mantultuloy a mangibanekel ed peteg iran pankaukolan na totoo. Pansiansiaen da so pangitandoro ed atagey iran estandarte nen Jehova ed moralidad. Saratan so ag-ontunda ed pangiyalibansa na suston doktrina. Tan saratan so mansiansia ed pangipapaimano ed pakasusumpal na propesiya a manatanda ed saray agew tayo legan a say Panarian na Dios so manuuley tan say linawa na Dios so nasusumpal diad dalin ya agnin balot agawa nen kapiganman diad panamegley na sakey ya ondaraak a bilang na saray tuan managdayew nen Jehova. (Mateo 6:10; Apocalipsis 11:15) Agaylan mablin kayamanan so walad sikatayo diad Say Panag-Bantayan tan Awake! Anamoten tayo sirin so amin a pankanawnawa ed panginabang ed sarayan importantin palapagan ed saray maulimek-inpanpuson totoo a walaay epekto ed kabibilay na totoo tan manangiwandag na saray katuaan na Panarian.
[Saray paimano ed leksab]
a Hulyo 15, 1992, pahina 19-22.
b Diad loob na dakel lan taon Say Panag-bantayan so inpasen bilang sakey a magasin a nagkalautlan para’d alanaan a Kristianos. Anggaman ontan, nanlapulad 1935, lalon panangidanet so niiter ed pamapaseseg ed “baleg ya ulop,” a say ilalo ra et bilay ya andi-anggaan diad dalin, so pangala tan pamasa ed Say Panag-Bantayan. (Apocalipsis 7:9) Pigaran taon ed saginonor, nen 1940, Say Panag-Bantayan so regular a niyoopresi ed totoo diad saray lansangan. Diad ontan et, maples a dinmaak so sirkulasyon to.
Anto So Ebat Mo?
◻ Anto so mangipapanengneng a Say Panag-Bantayan tan Awake! so palapagan na katuaan
◻ Panon a Say Panag-Bantayan tan Awake! so anenyeg ed kabibilay na totoo?
◻ Anto so nagawaan na saray kongregasyon pian napadaak so panangibunog na magasin?
◻ Antoran suhestion so makatulong ed sikayo pian makapangipalima na dakel a magasin?
[Kahon ed pahina 22]
Arum ya Artikulon Angapekta ed Kabibilay na Totoo
Diad inlabas na saray taon, dakel a managbasa so nansulat pian ibalikas so apresasyon para’d espisipiko iran artikulo a nipalapag ed Say Panag-Bantayan tan Awake! Nilista ed leksab iray pigara lambengat ed dakel a tema ya akaapekta ed saray managbasa tayo. Kasin saraya odino arum iran artikulo so amasimbalo ed bilay mo?
Say Panag-Bantayan
“Awaten so Tulong na Dios Diad Panalona ed Niamot Iran Kasalanan” (Disyembre 1, 1985)
“Panangagamil na Maridios a Debosyon ed Matatatken ya Atateng” (Hunyo 1, 1987)
“Edukasyon a Walaan na Gagala” (Nobyembre 1, 1992)
Awake!
“You Can Fight Depression!” (Setyembre 8, 1981)
“When someone You Love Dies . . . ” (Abril 22, 1985)
“Protect Your Children!” (Oktubre 8, 1993)
[Litrato ed pahina 23]
Diad Canada—panagpulong ed kabkaabungan tekep na saray magasin
[Litrato ed pahina 24]
Diad Myanmar—panangiparungtal na saray magasin a mangituro ed dalan a mamaarap ed bilay