Balon Programa ed Sirkiton Asamblea
1 Pian makatalindeg a malet ed pananisia diad agmaligen a mundo, nepeg itayon manmatalek ed si Jehova. Panon tayon nipatnag itan a panagmatalek diad agew-agew a panagbilay tayo? Panon a say panagmatalek ed si Jehova so mangapekta ed bilay tayo bilang indibidual tan bilang pamilya? Panon ya ontulong itan ed sikatayon naresistian so impluensya na mundo nen Satanas? Say programa ed sirkiton asamblea parad 2003 so mangebat ed saratan a tepet. Say tema na satan et “Manmatalek ed si Jehova tan Manggawa na Maong.”—Sal. 37:3.
2 Say panagmatalek tayo ed si Jehova so aglambengat ipatnag diad espisyal iran okasyon odino diad panaoy pankaukolan. Apektaen na satan so amin ya aspekto na inagew-agew a panagbilay tayo. Saya so idadanet na manangilukas a paliwawan, “Manmatalek ed si Jehova Diad Amin a Panaon.” (Sal. 62:8) Ipanengneng ed sikatayo na nankapat a parte a simposium ya “Ipatnag so Panagmatalek ed si Jehova” no panon a naromog tan niyaplika so nibase ed Biblian impormasyon a makatulong ed sikatayo pian niletneg so matalonan panamaley, pian naasikaso iray probleman onlelesa diad loob na pamilya, tan pian napenek iray materyal a pankaukolan tayo.
3 Sasalien na mundo nen Satanas ya ipasa ed sikatayo so pikewet a panmoria nipaakar ed duga tan aliwa tan wewetweten itayo na satan nipaakar ed saray kaukolan ya iprayuridad tayo. (Isa. 5:20) Saray paliwawan “Manbantay Sumpad Saray Kaapaan na Bilay” tan “Paliisan so Mauges—Manggawa na Maong” so mamabiskeg ed determinasyon tayon mangitandoro ed atagey iran estandarte nen Jehova.—Amos 5:14.
4 Sano panganggaen la nen Jehova so peles a marelmeng a sistema na bengabengatla, saray lingkor na Dios so kaukolan a sigpot a manmatalek ed sikato. Saya so ipabitar diad publikon paliwawa ya, “Asingger lay Kililiktar Manlapud Gonigon ed Mundo.” Kayari na satan et nakerew ed sikatayon usisaey inkasikatayo diad partin “Kasin Nibilang Kayon Makana Diad Panarian na Dios?” Manampot so programa panamegley na panamaseseg a “Manmatalek ed Sipasipan nen Jehova.”
5 Say makanan parte ed kada asamblea et say paliwawa ed bautismo. Siopaman a manpipirawat a nabautismoan so kaukolan a masakbay la komon a mangipaamta ed manangasikason manangimaton pian nagawaan la iray nakakaukolan ya uksoyan.
6 Diad sarayan panaon ya anggapoy pakaseguroan, si Jehova lambengat so peteg a panlapuan na kompiyansa tan inkaligen. (Sal. 118:8, 9) Komon ta amin tayo so mamabiskeg ed panagmatalek tayo ed sikato diad iyatendi ed interon programa na sirkiton asamblea.