Balon Programa ed Sirkiton Asamblea

Amta tayon si Jehova a Dios so makanepegan na panangaro tan nikabkabiig a debosyon tayo. Balet, sasagyaten itayo na mundo pian agtayo namantini so maapit a siglaotan tayo ed Dios. (Juan 17:14) Pian napaelet so panangaro tayo’d si Jehova tan pian napabiskeg itayon resistian iray bengatla na mundo a maneral ed espiritualidad tayo, say balon programa na sirkiton asamblea ed 2001 so atemaan na “Aroen so Dios​—Aliwan Saray Bengatlan Walad Mundo.”​—1 Juan 2:15-17.

Pakiwasen itayo na pirmin panangaro ed si Jehova pian sikatoy ipulong tayo. Anggaman ontan, aliwan mainomay parad dakel a totoo na Dios so pampulong. Diad partin “Pakiwasen Itayo na Panangaro ed Dios dia ed Ministeryo Tayo,” naamtaan no panon ya atalonaan na dakel so inkamabaing tan arum a babeng ta pian sigpot a makapibiang ed sayan kimey.

Panon a makaapekta ed sikatayo iray onuuges ya estandarte na mundo? Saray kagagawa a datin impasen a marelmeng et ibabagan normal lan awawey natan. Say paliwawan “Sikayoran Manangaro ed si Jehova, Busolen so Mauges” tan say simposium a “Saray Bengatlan Walad Mundo​—Panoy Panmoria Tayo ed Saratan?” so mamabiskeg na determinasyon tayon ompaliis ed mauges iran pilalek.

Nilaktip ed programa so napangaligan a Teokratikon Eskuelaan Parad Panagministro tan Service Meeting, ontan met ed sumaryo na aaralen ya artikulo ed Panag-Bantayan ed satan a simba. Say publikon paliwawan, “No Panon a Daegen na Aro tan Pananisia so Mundo,” so mamaseseg ed sikatayon aligen si Jesus diad panresisti ed pananesdes na mundo. (Juan 16:33) Seguroen yon imbitaan ya onatendi iray iyaaralan yoy Biblia. Siopaman a mankaliktan a manpabautismo so mangibaga lan masakbay ed manangasikason manangimaton ta pian nagawa laray nakaukolan ya uksoyan.

Iyapasakey na sayan sirkiton asamblea so imano tayo ed no iner so akasentroan na panangaro tayo ta pian napanggayagaan iray bendision nen Jehova. Agsasaewen so dinanman ed satan!