Sirkiton Asemblea ya Ontulong ed Sikatayon Nasalimbengan so Espiritualidad Tayo
1. Anton probisyon a manlalapud si Jehova so ontulong ed sikatayon gawaen so kimey tayon panangiyabawag na maong a balita?
1 Si Jehova et mabulos a mangitatarya na impormasyon, panangipasal, tan panamaseseg a nakaukolan tayo pian makapibiang itayo ed inter ton kimey, salanti, say pangiyabawag ed maong a balita. (Mat. 24:14; 2 Tim. 4:17) Say sakey ed saratan a probisyon et say tinaon a sirkiton asemblea tayo. Say tema na satan ya asemblea ed taon 2010 et “Salimbengan so Espiritualidad Yo,” a nibase ed Roma 8:5 tan Judas 17-19. Onggapo so serye na sayan asemblea ed komatlon simba na Enero 2010.
2. (a) Antoray nagamoran tayon gunggona diad iyatendi ed sirkiton asemblea? (b) Panon kan atulongan na apalabas iran sirkiton asemblea diad ministeryom?
2 No Panon Itayon Nagunggonaan: Pasakbayan itayo na asemblea manlapud saray kapeligroan, a singa saray pakaabalaan a mangupot na panaon tayo tan mangisuawi na imano tayo manlapud saray talagan importanti. Naaralan tayo no panon a resistian so espiritu na alablabas ya inkamaabuloy, tan naaralan tayo met no antoy kabaliksan na pagmaliw a maespiritual a too. Ipanengneng na simposium ed Simba no panon a napabiskeg na kada indibidual tan pamilya so espiritualidad da anggaman nipapaarap ira’d ompapalalon desdes tan seryoson subok ed pananisia. Say programa so ontulong pian nasalimbengan so puso tayo, napansiansia so espiritual a bunigas tayo, tan magmaliw a malinew ed nonot tayo iray daakan a bendisyon ya akaparaan parad saramay manasalimbeng ed espiritualidad da.
3. Kapigan so onsublay a sirkiton asemblea, tan anto so nepeg yon gawaen?
3 No amta yo la no kapigan tan no iner so pakagawaan na onsublay a sirkiton asemblea yo, iplano yo la so iyatendi tan idengel a maong ed saray sesyon kada agew. On, seguradon bendisyonan nen Jehova so kimey na saray makuli.—Uli. 21:5.
4. Antoray seguradon nagamoran tayo ed nagawan sirkiton asemblea tayo?
4 Peteg a si Jehova so Manangitarya na sayan maabig a regalo. Say programan intarya na matoor ya aripen a klase so talagan kakkaukolan tayo pian makapantultuloy bilang Kristianon ministro. Misalsalamat itayo’d si Jehova ed amin a maaron probisyon to ya ontutulong ed sikatayon ‘nituloy ya iyabawag so ilalo tayo ed amin a totoo ya anggapo so panduaruwa.’—Heb. 10:23-25; Sant. 1:17.