Balon Programa ed Sirkiton Asamblea

Diad sarayan ‘maatap a panaon,’ kaukolan tayo so maridios a kakabatan pian nagamoran tan napansiansia so abobon nen Jehova. (2 Tim. 3:1) Say programa ed sirkiton asamblea ed 2005 so mangipagamor ed sikatayo na praktikal a konseho tan panamaseseg legan a titibukelen na satan so teman “Paigiya ed ‘Kakabatan a Manlalapud Tagey.’”​—Sant. 3:17.

Say unonan simposium ya “Ipatnag ed Bilay Tayo so ‘Kakabatan a Manlalapud Tagey,’” so ontulong ed sikatayon natalosan no antoy nalalanor ed pagmaliw a masimpit, mikakareenan, makatunongan, tan akaparaan ya ontulok. Insan say manangasikaso na sirkito so mangipaimano ed talora nin aspekto na kakabatan manlapud Dios. Sampotan na manangasikaso na distrito so unonan agew diad pangipabitar to no panon a saray Kristianon ministro, anggaman ipapasen na arum bilang “andi aral tan kabanyakan,” so nakikinlongan a salitaen so kakabatan na Dios.​—Gawa 4:13.

Diad komaduan agew, say simposium ya apauloan na “Gegemtanen Iray Bengatlan Makapabiskeg” so ontulong ed sikatayon nabidbiran tan napaliisan iray bengatlan mamaletey ed sikatayo ed espiritual. Ipanengneng met na satan no panon tayon napabiskeg so arum diad saray pantitipon ed kongregasyon, diad lawak na ministeryo, tan diad loob na pamilya. Say publikon paliwawan, “No Panon a Mangunggona ed Sikatayo so Maridios a Kakabatan,” so mamaaralem na apresasyon tayo ed saray gunggona a nagagamoran tayo legan tayon iyaaplika so madibino iran prinsipyo ed bilay tayo. Say pansaran paliwawan, “Say Ikiwas Unong ed Kakabatan na Dios so Manalimbeng ed Sikatayo,” so mamabiskeg ed determinasyon tayon manilalo ed si Jehova parad kakabatan legan na sarayan kaunoran ya agew.

Say kapantokan na kada asamblea et say bautismo na saray balon babangatan. Say Teokratikon Eskuelaan Parad Ministeryo tan say Panagaral na Panag-Bantayan parad simba so iparungtal met ed programa. Pilalek nen Jehova ya amin tayo so nagunggonaan manlapud kakabatan ya itatarya to. Say konseho tan panamaseseg a manatalaran ed sikatayo ed sirkiton asamblea so mamabiskeg ed espiritualidad tayo.​—Uli. 3:13-18.