Protektaan Moy Nonot Mo
1. Anto so tema na sirkiton asemblea ed 2013, tan antoy gagala na programa?
1 Binilin nen Jesus iray disipulo to ya aroen day Jehova ed interon puso, kamarerwa, tan nonot da. (Mat. 22:37, 38) Say kombension tan saray asemblea ed sayan taon et denesinyo pian ontulong ed sikatayon napabiskeg so inkatoo tayo. No natandaan yo, say tema na distriton kombension et “Protektaan Moy Pusom!” Say tema na programa na espisyal ya asemblea et “Protektaan Moy Konsiensiam,” tan say sirkiton asemblea parad 2013 et atemaan na “Protektaan Moy Nonot Mo,” ya nibase ed Mateo 22:37. Adesinyo iyan programa pian nausisa tayoy nonot tayo tan magmaliw ya makapaliket ed si Jehova.
2. Anto ran tepet so naebatan legan na programa ya kaukolan tayon talaranan?
2 No Anto ray Nipresenta: Legan itayon ondedengel ed sirkiton asemblea, kaukolan tayon talaranan so ebat ed sarayan tepet ya mangipabitar ed saray manunan punto:
• Panon tayon napaliisan so panisip ed “kanonotan na totoo”?
• Panon itayon makatulong ed pangekal ed sakbong ya mamubulag ed kanonotan na saray agmananisia?
• Anton panagnonot so labay tayon niwalad sikatayo?
• Anto ray gunggona ed dugan panagdalepdep?
• Panon tayon abuloyan si Jehova ya manmoldi ed kanonotan tayo?
• Panon ya makatulong iray asawan lalaki, asawan bibii, atateng, tan ananak pian magmaliw a maliket so pamilya?
• Panon tayon makapanparaan parad agew nen Jehova?
• Antoy labay ya ibaga na pangiparaan ed nonot tayo parad impasyan kimey?
• Anto ray gunggona na saramay mangiyaaplikad saray naaralan da?
3. Akin ya importantin duaran agew so atendian tayo, ondengel ya maong, tan iyaplika iray naaralan tayo?
3 Gagawaen nen Satanas so anggaay nayarian ton deralen so kanonotan tayo. (2 Cor. 11:3) Kanian kaukolan tayon protektaay nonot tayo pian napaliket si Jehova. Nepeg ya itultuloy tayon ipatnag so kanonotan na Kristo tan labanay impluensya na sayan mauges a mundo. (1 Cor. 2:16) Kanian iyeskedyul tayon atendiay duaran agew na sirkiton asemblea. Ondengel itayon maong. Insan tayo iyaplika iray importantin impormasyon ya nipresenta pian niparaan tayoy nonot tayon maseseg a manlingkor parad Panarian.—1 Ped. 1:13.