Say Salita na Dios et Mausa-usar ed Panagbangat
1. Anto so tema na sirkiton asemblea parad 2014, tan anton tepet so naebatan diad programa?
1 Say “Makapadinayew a Managbangat” tayo, si Jehova, so sankamaongan ya managbangat ed interon uniberso. (Isa. 30:20, 21, NW) Balet, panon to itayon ibabangat? Intarya to so sankaabigan ed amin ya libro—say impuyan a Salita to, say Biblia. Panon a say bangat a manlalapud Dios et ontulong ed pisikal, mental, emosyon, tan espiritualidad tayo? Naebatan iyan tepet diad programa na sirkiton asemblea tayo parad 2014. Say tema na programa ya “Say Salita na Dios et Mausa-usar ed Panagbangat,” et base ed 2 Timoteo 3:16.
2. Saray manunan punto na programa et nipabitar diad saray ebat ed anto ran tepet?
2 Talaranan Irayan Manunan Punto: Nipabitar iray manunan punto na programa diad saray ebat ed sarayan tepet:
• Antoy epektod sikatayo na bangat a manlalapud Dios? (Isa. 48:17, 18)
• No manggawa tayoy pananguman ed bilay tayo pian sigpot a makapanlingkor ed si Jehova, antoy nailaloan tayo? (Mal. 3:10)
• Antoy nepeg tayon gawaen no makadngel tayoy “agkabat iran bangat”? (Heb. 13:9)
• Panon tayon naalig so “paraan na panagbangat” nen Jesus? (Mat. 7:28, 29)
• Akin a nepeg ya ibangat na saray managbangat ed kongregasyon so sarili da? (Roma 2:21)
• Panon a mausa-usar so Salita na Dios? (2 Tim. 3:16)
• Panon ya naapektaan iray totoo diad ‘panmayegmeg’ ed saray nasyon? (Ag. 2:6, 7)
• Antoy iilaloan nen Jehova ed sikatayo? (Efe. 5:1)
• Akin ya nepeg tayoy mansagpot a mansiansiad bangat nen Jehova? (Luc. 13:24)
3. Akin et kaukolan tayoy onatendi tan ondengel a maong ed sayan nipanpanaon ya programa?
3 Diad gapo na 2 Timoteo kapitulo 3, antis ya insulat nen Pablo iray salitan angibasiyan na tema na sayan programa, deneskribe to iray nikadkaduma tan mair-irap a panaon diad kaunoran iran agew. Oniay insulat to: “Saray mauges a totoo tan saray mankuankuanan et magmaliw a lalon mauges, a sikaray mamapalikdo tan napapalikdo.” (2 Tim. 3:13) Sirin pian ag-itayo napalikdo, kaukolan tayon dengelen tan iyaplika iray bangat a manlalapud Dios! Komon ta determinado tayon onatendi tan ondengel a maong ed sayan nipanpanaon ya programa.