‘Nagawa Komon so Linawa na Dios’
1. Anto so tema na programa na espisyal ya asemblea parad 2012, tan akin ya manepeg tayon ikonsidera itan?
1 Sikatayoy apalsa lapud linawa nen Jehova. (Apo. 4:11) Kanian, imposiblin nasumpal so gagala na impamalsa ed sikatayo no agtayo amtaen tan gawaen so linawa na Dios. Ag-iya mainomay lapud kaukolan tayon labanay tendensia na panggaway “bengatlan labalabay na laman tan saray kanonotan” odino panggawad “labalabay na saray totoo ed mundo.” (Efe. 2:3; 1 Ped. 4:3; 2 Ped. 2:10) No anggapoy tulong na Dios, sikatayoy nayarin ‘nakalotan a mabilay na Diablo pian gawaen so linawa to.’ (2 Tim. 2:26) Say programa ed agew na espisyal ya asemblea tayo parad taon 2012 so ontulong ed balang sakey ed sikatayo ya onkiwas a mitunosan ed komatlo ed saray taloran manunan imbaga nen Jesus ya ipikasi, salanti, “nagawa komon so linawam.”—Mat. 6:9, 10.
2. Anto ran tepet so naebatan legay programa?
2 Saray Tepet ya Naebatan: Legan yon mandedengel ed programa, talaranan so ebat ed sarayan tepet: Antoy singa kaimportante na say idengel ed Salita na Dios? Panon tayon natebek no anto so linawa na Dios ed sikatayo? Akin et kaukolan a mabulos itayon ontulong ed amin a klase na totoo? Panon a magmaliw ya maliket tan makapnek so bilay tayo? Sikayoran kalangweran, antoy kaukolan yon paneknekan ed si Jehova? Antoran gunggona so nagamoran diad panggaway linawa na Dios? Akin et inkaganatan a pabiskegen tan pasesegen so arum?
3. Panon tayon sigpot a minabang ed sayan espiritual a probisyon?
3 Seguradoen yon wadman kayo tan ondengel ya maong ed programa. Say bisitan espiker et nayarin sakey ya Bethelite odino ombiabiahen manangasikaso. Antis tan kayari programa, sarag yoy mitongtong ed sikato tan say asawa to, no wala. Kasempet yod abung, agkayo komon magmaliw ya “mililingwan a dumerengel,” imbes, rebyuen so programa kaibay pamilya yo tan pantongtongan yo no panon kayon nagkalalon onkiwas unong ed linawa na Dios.—Sant. 1:25.
4. Akin ya importantin iyuna tayoy panggawa ed linawa na Dios?
4 Saramay mangiyuunad sarilin pilalek da tan agmanpapasakop ed linawa nen Jehova et maganggano lan naderal. (1 Juan 2:17) Kanian misalsalamat tayo ta intarya nen Jehova iyan nipanpanaon ya impormasyon ya ontulong ed sikatayon niyunay panggawa ed linawa na Dios!