‘Naakan Diad Dugan Panaon’
1. Panon ya akatulong ed sika tan ed arum so agano nin espisyal ya asemblea?
1 Kayarin naatendian so espisyal ya asemblea tayo, mabetbet ya ibabaga tayo, “Dugaruga iratan ya panonot!” Inreport na sakey ya manangasikaso na sirkito a kayarin arengelan so programa, arum so angibalikas na pilalek dan palaknaben so pibibiang da ed ministeryo. Oniay imbaga na sakey a manangasikaso na sirkito: “Tinulongan to kamin nonoten a maong no iner lay kawalaan tayo ed agus na panaon legan tayon uusisaen iray desisyon tayo’d bilay.” Inkuan na sakey ni: “Dakel a manangipalapag so angibagan satan so panonot ed sikara a seguroen ya akasentro ira ed samay sankaimportantian, salanti say ministeryo.” Panon ya akatulong ed sika so espisyal ya asemblea?
2. Antoray ipaliwawa ed programa ed sayan taon?
2 Nipanpanaon met so programa ed sayan taon. Say tema et “Pasalimbengan ed si Jehova,” ya imbase ed Salmo 118:8, 9, NW. Nia iray arum ed saray tema ya ipaliwawa: “No Panon a Salimbeng si Jehova Diad Panaon na Gonigon,” “Tulongan so Arum a Pasalimbengan ed Saray Payak nen Jehova,” “Aligey Jehova Diad Panangiter na Salimbeng,” “Sikayoran Kalangweran, Manmatalek Kayo’d si Jehova!” tan “Espiritual a Paraiso—Probisyon nen Jehova Pian Salimbengan Itayo.”
3. Panon tayon sigpot ya nagunggonaan diad iyatendi tayo?
3 Pian Nagunggonaan: No nipakabat lay petsa, iplano lan masakbay so iyatendi, tan itagar yo ray iyaaralan yo na Biblia. Pian ‘manbunga tan mansungdo’ itayo, nepeg tayon tandaan iray nadngel tayo. (Luc. 8:15) Kanian ondengel ya maong ed programa, tan isulat ya antikey iray manunan punto ontan met ed saray instruksion ya plano yon iyaplika ed kabibilay tan ministeryo yo. Mangigana na panaon kayari asemblea a pantongtongan so programa bilang pamilya, tan konsideraen iray espisipikon paraan ya niyaplika yo tan na pamilya yo so impormasyon.
4. Akin a nepeg a pitalaran tayo so espisyal ya asemblea tayo?
4 Singa mananam tan masustansian panangan, say espisyal ya asemblea ed sayan taon so imprepara tan ninonot a maong tekep na baleg a panangaro. Bendisyonan komon nen Jehova iray sagpot yon onatendi pian nagunggonaan ed sayan ‘naakan diad dugan panaon’ a mamabiskeg ed espiritualidad na saray Kristianon ministro.—Mat. 24:45.