Programa ed Agew na Espisyal ya Asemblea Parad 2010
1. (a) Antoray Makasulatan a tema na imbebeneg ya agew na espisyal ya asemblea? (b) Kasin walaray nidanet ed imbebeneg iran asemblea ya akatulong diad ministeryo yo?
1 “Seguroen Iray Lalon Makanan Bengatla,” “Ontalindeg a Malet Bilang Sakey a Pulok,” “Mantultuloy a Mantasi ed Katuaan,” tan “Pitek Itayo—Si Jehova so Domadamili.” (Fil. 1:9, 10, 27; Juan 18:37; Isa. 64:8) Pigara labat iraya ed dakel a teman asingbat ed saray apalabas ya agew na espisyal ya asemblea. Kasin pitalaran yon atendian so agew na espisyal ya asemblea ed sayan taon? Say tema na asemblea et: “Say Panaon Apatikeyan La,” a nibase’d 1 Corinto 7:29.
2. Panon a napawalay ligsa na saray agagi diad pantalaran ed sayan asemblea?
2 Paligsaen iray agagi ed kongregasyon a mantalaran ed espisyal ya asemblea no nipakabat lay petsa na satan. Ipaparaan na arum ya atateng iray anak dan mantalaran diad panmarka’d petsa na satan diad kalendaryo, laktip la ray nakaukolan ya awiten na balang sakey, insan da bibilangen no pigara nin agew so nakekeraan antis na asemblea. Legan na Panagdayew na Pamilya yo, repasoen iray nota yo ed apalabas iran espisyal ya asemblea. Niparaan yo met so puso yo ed sayan ebento diad panrepaso’d Minabang ed Teokratikon Eskuelaan Parad Ministeryo, pahina 13-16, pian natulongan kayo tan say pamilya yon ‘imanoen no panon so pandengel yo.’—Luc. 8:18, NW.
3. Panon itayon sigpot a nagunggonaan ed saray narengelan tayo?
3 Iyaplikay Naaralan Yo: Say mabetbet tayon narerengel kayari na asemblea et “Agaylay dakep na programa!” Tua itan, lapud say asemblea et sakey ed saray dakel a probisyon nen Jehova. (Uli. 10:22) Pian walay maabig a resulta na nadngelan yo, nepeg yo itan a dalepdepen tan pansiansiaen ed nonot. (Luc. 8:15) Legan a manbiabiahe kayari na asemblea, pantongtongan iray nadngelan yo’d programa a kaibay pamilya odino saray kaluganan yo. Pantongtongan yo iray kalat na balang sakey tan saray punton ontulong ed sikayo diad ministeryo. No gawaen yo itan, siansia nin nagunggonaan kayo ed nadngelan yo anggan abayag lan asumpal so asemblea.—Sant. 1:25.
4. Akin ya espisyal iyan asemblea parad sikatayo?
4 Nalikna tayon napapabli itayo sano makaawat tayoy regalo a talagan kakkaukolan tayo. Agta pitalaran tayoy intarya nen Jehova parad sikatayo diad onsublay ya espisyal ya asemblea tayo? Seguradon satan so sigpot a pakagunggonaan tayo. Nailaloan tayo a nipanpanaon so regalo ed sikatayo na mangatatawen ya Ama tayo, si Jehova, panamegley na panamaseseg tan panangipasal pian nagawaan tayoy kimey ya impabtang to ed sikatayo.—2 Tim. 4:2; Sant. 1:17.