Balon Programa ed Espisyal ya Agew ya Asamblea

“Magmaliw a Matakken ed Pakayari na Pakatalos” so tema na programa ed espisyal ya agew ya asamblea ya onggapo no Pebrero 2001. (1 Cor. 14:20) Akin et makanakana so iyatendi tayo? Manbibilay itayo ed mundon napno na kaugsan. Pian naresistian iya, nepeg tayon bayuboan so pakayari tayo ed espiritual a pakatalos ta pian nadaeg tayo so mauges diad panamegley na maong. Ontan so nitulong ed sikatayo na programa ed espisyal ya agew ya asamblea.

Dia ed manangilukas a sesyon, singbaten na manangasikaso na sirkito so “Saray Katulongan ed Pagmaliw a Matakken diad Pakatalos ed Biblia.” Iparungtal to ed sikatayo no panoy pagmaliw ya agnagiing ed pananisia bilang Kristiano. Ipabitar na bisitan espiker no panon a makana so aktual a pangusar, odino pangiyaplika, ed saray prinsipyo ed Biblia diad pamayubo na makdem a pakatebek, diad pangipaliwawa to ed teman “Salimbengan so Espiritualidad diad Pangipasal ed Pakayari Yon Manebek.”

Nepeg met a bayuboan na saray kalangweran so pakayari na pakatalos. Singbaten iya ed saray partin “No Akin a Magmaliw ya Ugaw no Nipaakar ed Kaugsan” tan “Saray Tobonbalo a Makakagamor na Pakatalos Natan.” Dengelen so ibaga na saray tobonbalo no antoy gawaen da pian napabiskeg day inkasikara ed espiritual ta pian napokpokan day antokaman ya inkamausisa nipaakar ed marelmeng a kagagawa na mundo tan napaliisay kagonigon.

Panon tayon naromog so pirmin liket ed bilay? Saya so ipaliwawa na bisitan espiker dia ed pansaran paliwawan “Pakagungguna Manlapud Pangiyaplika ed Saray Prinsipyo na Biblia Tekep na Pakatalos.” Sikatoy mangiter na saray alimbawa a mangipatnag a say pangiyaplika ed Salitay Dios so ontulong ed sikatayon onarap ed saray problema, makapandesisyon, tan talagan nagunggunaan manlapud ibabangat nen Jehova ed sikatayo.

Saramay mankaliktan a mangisimbolo na dedikasyon da ed Dios panamegley na bautismo ed danum dia ed asamblea so nepeg a mangipaamtan tampol ed manangasikason manangimaton. Markaan yo lay kalendaryo yo kayarin nipakabat so petsa na espisyal ya agew ya asamblea, tan manplano la pian nagunggunaan ed sayan makabaliksan a programa. Agsasaewen so dinanman a parti na espisyal ya agew ya asamblea! Napabiskeg kayo na satan a mansungdo ed sayan mauges a sistema tan mansiansian matoor ed si Jehova.