Balon Programa ed Espisyal ya Agew ya Asamblea
1 Bangta say media tan saray edukador ed mundo so mangidadalangirang ed materyal a kaykayamanan, sikatayo so papasesegen na Salita na Dios a “Magmaliw a Mayaman ed Maabig Iran Kimey.” (1 Tim. 6:18, NW) Satan so tema na programa ed espisyal ya agew ya asamblea ya onggapo no Pebrero 2003. Anton panamaseseg so naawat tayo ed sayan asamblea?
2 Singbaten na manangasikaso na sirkito no antoy kabaliksan na “Magmaliw a Mayaman ed Arapan na Dios,” tan manginterbio na pigara a mangisesekar ed inkasikaran gamoray espiritual a kayamanan. Diad primeron paliwawa to ed satan ya agew, say ombibisitan espiker so mangipanengneng no panon a saray totoo na Dios so manggagawa na “Maabig Iran Kimey Diad Sayan Panaon na Panag-ani.” Napaseseg so balang sakey ed sikatayo a mangonsidera no panoy pakapibiang tayo nin nagkalalo diad nagagawa la natan a panag-anin kimey ya ingganggan na Dios.
3 Agaylay liket tayo sano nanengneng tayo iray Kristianon kalangweran a mangegemtan ed espiritual a kayamanan! Saya so mangiglogloria ed si Jehova tan ontutulong ed saray kalangweran a mangiletneg na maabig a pundasyon parad arapen iran pribilehyo ed panaglingkor. Say partin “Komendaan Iray Kalangweran Lapud Maabig Iran Kimey Diad Pangidadayew ed si Jehova” so mangipabitar ed maabig iran kimey a nagagawaan na saray Kristianon kalangweran ed lokal.
4 Antoray resulta na pangegemtan ed maabig iran kimey? Saya so singbaten na ombibisitan espiker diad unor a paliwawan, “Mantultuloy ed Maabig Iran Kimey tan Anien Iray Bendisyon nen Jehova.” Konsideraen to so apatiran aspekto a sikatayoy man-ani na daakan iran bendisyon: (1) bilang indibidual, (2) bilang pamilya, (3) bilang kongregasyon, tan (4) bilang sankamundoan ya organisasyon.
5 Saramay angidedika la ed si Jehova so nawalaan la na pankanawnawan manpabautismo. No akaparaan kayo lan manpabautismo, ipaamta yo lan tampol itan ed manangasikason manangimaton.
6 Sano nipakabat so petsa na asamblea diad lugar yo, alisto kayo lan manggawa na saray pihon plano pian makaatendi. Pampelengan so isabin masakbay pian makapibiang kayo ed panangilukas a kanta tan pikakasi. Say pagmaliw a presente tan atentibo diad interon programa ed espisyal ya agew ya asamblea so mamabiskeg ed sikatayon mantultuloy a mangegemtan ed kurso a manggawa ed sikatayon peteg a mayaman ed arapan na Dios tayo, si Jehova.