Balon Programa ed Espisyal ya Agew ya Asamblea
Say tema na programa ed espisyal ya agew ya asamblea parad balon serbisyon taon so malet a nibase ed Kasulatan: “Ontulok Kayo ed Dios—Onsumpa ed Diablo.” (Sant. 4:7) Saya so maabig a giya parad sarayan makapaangat a panaon! Say itulok tayo ed saray ganggan na Dios so mangipaarap ed sikatayo ed direktan pikompronta ed si Satanas. Bangatan itayo na programa no panon so ontalindeg a malet sumpad makaderal-pananisia tan mauges iran pakana na Diablo. Antoray pigaran espiritual a kayamanan a nagamoran tayo ed sayan asamblea?
Say manangasikaso na sirkito so mangipanengneng no panon a say “Pangipatnag na Maridios a Panagpasakop Bilang Membro na Pamilya” so mamabiskeg ed saray pamilya pian natalonaan iray desdes na mundo. Say primeron paliwawa na bisitan espiker a, “No Anto so Kabaliksan na Sumpaen so Diablo,” so mangipaliwawa no akin tan no panon a nakaukolan tayo so onkiwas a makpel pian resistian iray getma nen Satanas a deralen so espiritualidad tayo. Duaran parte so nagkalalo lan nipaarap ed saray kalangweran, a nepeg met a manalerto ed saray pakana na Diablo. Dakel a Kristianon wala la’d edad natan so angipulisay ed saray pilalek na mundo sanen wala nira’d kalangweran. Panggayagaan tayo so pakarengel ed pigara ed saray personal ya eksperiensya ra.
Say pampasakop ed autoridad so kakaukolanen ed amin a manugyop ed sosyedad na too. Kanian, say pansaran paliwawa na bisitan espiker so mangipabitar ed apatiran pamaakaran a say maridios a panagpasakop tayo so nepeg a napatnagan: (1) ed saray gobierno, (2) ed kongregasyon, (3) ed sekular iran anapan, tan (4) ed loob na pamilya. Agaylan praktikal a programa!
Saraman so manpilalek a nabautismoan diad sayan espisyal ya agew na asamblea so kaukolan a masakbay lan mangipaamta ed manangasikason manangimaton. Kaukolan tayon amin a markaan so petsa ed kalendaryo tayo tan iplano so iyatendi ed interon programa na asamblea. Saray bendisyon a nagamoran tayo so mantultuloy legan a manpapasakop tayo ed si Jehova a magnayon.