Say Salita na Dios et Mabisbiskeg
1. Antoy tema na espisyal ya asemblea parad 2014?
1 Aliwan singa saray ginawa na agperpekton totoo, say Biblia et walaay pakayarin mamasimbalo ed sikatayo, tan ontutulong iyad sikatayon nauman so kabibilay unong ed panlabayan nen Jehova. Panon kabiskeg so Salita na Dios? Panon tayon sigpot a nausar so pakayari na saya ed bilay tayo? Panon tayo iyan epektibon nausar pian tulongan so arum? Matalek kamin napabiskeg so pananisia yo legan ya pantongtongan irayan punto ed programa diad agew na espisyal ya asemblea parad 2014. Say tema to et “Say Salita na Dios et Mabisbiskeg,” ya base ed Hebreos 4:12.
2. Nepeg tayon dengelen iray ebat ed anto ran tepet?
2 Amtaen Iray Ebat ed Sarayan Tepet: Legan kan ondedengel ed programa, inota iray ebat ed saray tepet a walad leksab.
• Akin et nepeg tayon manmatalek ed Salita nen Jehova? (Sal. 29:4)
• Panon tayon nasali a mismo so pakayari na Salita na Dios? (Sal. 34:8)
• Panon mon nausar so pakayari na Salita na Dios ed ministeryom? (2 Tim. 3:16, 17)
• Panon tayon napaliisay pagmaliw a biktima na mapalikdon mundo nen Satanas? (1 Juan 5:19)
• Panon kan onaligwas ed espiritual bilang kalangweran? (Jer. 17:7)
• Panon tayon magmaliw a mabiskeg anggano makapuy itayo? (2 Cor. 12:10)
• Antoy ontulong ed sikatayon tuloytuloy a manpasimbalo, anggano wala ray abayag lan makapuy a bisyo tan ugali tayo? (Efe. 4:23)
3. Likud ed idengel ed programa, panon tayo nin nagunggonaan ed agew na espisyal ya asemblea?
3 Nagunggonaan tayon maong diad idengel ed saratan ya importantin impormasyon! Sakey ni, singa say sirkiton asemblea tan distriton kombension, say agew na espisyal ya asemblea et mangiiter ed sikatayo na pankanawnawa pian inatnat so panangaro tan panliketan so piulop ed saray agagid arum ya kongregasyon. (Sal. 133:1-3; 2 Cor. 6:11-13) Kanian ikday panaon so pilimog ed saray dati lan kakaaro, tan mikaaro ni. No walay inyasain ya visiting speaker ed agew na espisyal ya asemblea, singa say manangasikasoy distrito odino agin manlapud Bethel, agta maabig no abrasaen mo ira? On, dakel so rason tayo pian talaranan so manasingger lan agew na espisyal ya asemblea!