Balon Programa na Agew na Espisyal ya Asamblea

Lapud apabiskeg na masanton espiritu, saray inmunan Kristiano so nambunek a mangiyabawag ed maong a balita diad sankaposiblian lan laknab. (Gawa 1:8; Col. 1:23) Say balon programa na agew na espisyal ya asamblea, salanti, “Magmaliw a Pirmin Okupado ed Salita,” so ontulong ed sikatayon naalig so alay-abig ya ehemplo ra. (Gawa 18:5, NW) Sayan programa so onggapo ed Pilipinas no Pebrero, 2007.

Oniay inkuan nen Arin David nipaakar ed salita na Dios: “Say panamatua nen Jehova matua, gawaen to a makalakal so andi amta.” (Sal. 19:7) Sayan maal-alwar ya imparaan a programa parad 2007 ya agew na espisyal ya asamblea so mangipabitar ed kaimportantian na Kasulatan ed “panangipetek ed saray bengatla” tan mamaseseg ed sikatayon usaren so Salita na Dios diad pampulong tan pambangat tekep na inka-apuraan. (2 Tim. 3:16, 17) Ipabitar na balon programa no panon tayon napaliisan iray pakakulasbungan tan no panon itayon nagunggonaan diad pangiyaplika ed saray prinsipyo na Biblia diad inagew-agew a bilay tayo. Ontulong met iya ed sikatayon mangusar ed Salita na Dios pian tulongan iray kalangweran tan balo ni ya onaligwas ed espiritual.

Seguroen yon wadman kayo la no onggapo so programa, tan ontalineng a maong. Mangalay nota na saray punton personal yon niyaplika. Ipatnag so apresasyon ed saray instruksion tan panonot a naawat yo, tan morekdeken no panon yon niyaplika iray naaral yo.

Say programa na agew na espisyal ya asamblea so mamaaralem ed apresasyon tayo ed Salitay Dios, mamanonot ed sikatayon mantultuloy a manmatoor ed panangipulong na maong a balita na Panarian tekep na seseg, tan mangibangat ed sikatayo no panon a tulongan so arum a gawaen met itan. Kanian, nepeg a determinado kayon ag-onliliwat ed anggan dinan ya espiritual a panangiwanwan tan instruksion ya itatarya nen Jehova ed onian paraan!​—Isa. 30:20b, 21.