Balon Programa ed Sirkiton Asamblea
Sakey ya uker na takot et “aralem a panamagalang a nagkalalo la ed Dios.” Saya so manideskribe ed maabig a takot ya atukoy ed Kasulatan bilang “sengeg na kakabatan.” (Sal. 111:10) Diad kasunian, say sananey a klase na takot so manodomina ed mundo nen Satanas a walad kaliberliber tayo. Panon tayon paliisan itan a mauges a liknaan legan a babayuboan tayo so mapagalang a takot ed si Jehova? Say balon programa na sirkiton asamblea ed 2002 a serbisyon taon so mangipabitar ed sayan tepet. Say tema et “Takotan so Dios tan Iter ed Sikato so Gloria.” (Apoc. 14:7, NW) Natalosan tayo so dakel a paraan a say takot ed si Jehova so mangunggona ed sikatayo bilang indibidual tan bilang sakey ya organisasyon.
Anggaman say takot so nayarin mangisuheri na kapagaan odino kaandian na tepel tan inkamasuyat ed arap na mairap iran situasyon, ibabaga na Biblia: “Mapalar so balang sakey ya ontakot ed Jehova.” (Sal. 128:1) Say programa ed asamblea so mangipanengneng ed sikatayo no panon tayon natalonaan iray angat ed tuan panagdayew. Talosan tayo no panon a natulongan iray balo ni a mamayubo ed ontan a mabunigas a takot ed Dios, a diad tua et mamakiwas ed sikara a malabay a manlingkor ed sikato ed interon puso, kamarerwa, nonot, tan biskeg da. (Mar. 12:30) Say primeron agew so sampotan ed paliwawa na manangasikaso na distrito a “Lawas Onapit ed Saraman so Aaroen Yo.” Ipaliwawa to no panon itayon makapansiansian alerto ed panggugunaet na Diablo ya iyarawi itayo ed si Jehova, ed pamilya tayo, tan ed Kristianon agagi tayo.
“Takotan si Jehova, Aliwan Saray Totoo” so tema na apatiran parte na simposium ed komaduan agew. Ipaliwawa na satan no akin tan no panon tayon nepeg a talonaan so antokaman a takot a mangamper ed sikatayo ed sigpot a panumpal ed ministeryo tayo odino panmantini ed integridad tan ed malinis a konsiensia tayo diad eskuelaan tan diad pantratrabahoan. Say publikon paliwawa a “Takotan so Dios tan Sumpalen Iray Ganggan To” so nibase ed nantutumbokan iran agawa ya adeskribe diad Apocalipsis kapitulo 14. Sampotan so sirkiton asamblea tekep na makapaseseg a panangiwanwan pian “Mantultuloy a Mankurang diad Takot ed si Jehova.”
Say Teokratikon Eskuelaan Parad Ministeryo, say pangaligan a Service Meeting, paliwawa ed bautismo, tan say sumaryo ed Panagaral na Panag-Bantayan so kaaruman iran pabitar na programa ya agyo labay a nasaew. Itagar yon onatendi iray iyaaralan yo na Biblia. Siopaman a manpirawat a nabautismoan so kaukolan a masakbay lan mangipaamta ed manangasikason manangimaton. Amin tayo so malabay a mangipatnag na mabunigas a takot ed si Jehova tan ipaarap ed sikato so gloria diad ag-isaew ed dinanman a parte na sayan alay abig a programa!