Magmaliw ya Epektibon Mitatalosan!
1 Pian nagawaan so kimey tayo a pampulong tan panggaway babangatan, kaukolan tayon ipasabi so impormasyon ed arum. (Mat. 24:14; 28:19, 20) Say pitatalosan so nayarin mairap anggan diad limog na saray sankakaaro. Antoy ontulong ed sikatayo pian nipasabi ed agkabat a totoo so maong a balita?
2 Magmaliw a Kaaro Aliwan Estranghero: Salien yon ipasen so inkasikayo ed kipapasen na saramay kakatongtongen yo ed ministeryo. Lapud kipapasen na mundo natan, natalosan tayo no akin a mainap, odino natatakot ni ingen so arum ed saray agda kabat. Saya so mangamper ed pitatalosan. Panon yon natalonaan so inkamasuyat ed unona na saramay nakatongtong yo? Antis ni ingen a mansalita itayo, say sakey a paraan na pitatalosan et diad masimpit a personal ya itsura tayo. Say maayos a panangawes tan mapagalang ya indengan tayo so ontulong pian ag-ira natatakot.—1 Tim. 2:9, 10.
3 Say sananey nin makatulong ed pitatalosan et say relaks tan makaaron awawey. Ontulong iya pian kalmado so arum tan nagkalalon onkiling iran ondengel. Nakaukolan so maabig a panagparaan ed sayan pamaakaran. No malinew ed nonot tayo no anto so ibaga tayo, sikatayoy lalon relaks. Tan sayan inkakalmado tayo so managyat ed arum ed mensahe tayo. Oniay inkuan na sakey a bii nipaakar ed indalaw na sakey a Tasi: “Say natandaan ko ed makakaimis a lupa to et say mareen a nonot to. Asagyat so interes ko.” Saya so angilukas na dalan pian ondengel so bii ed maong a balita.
4 Saray Kalidad a Managyat: Kaukolan a walaan itayo na masimoon a personal ya interes ed arum. (Fil. 2:4) Sakey a paraan pian nagawaan iya et diad agpandomina ed tongtongan. Diad tua et lalanoren met na pitatalosan so idengel. Sano pasesegen tayoray ondedengel ed sikatayo a mansalita tan interesado itayon ondengel ed saray komento ra, nalikna ran iyaansakit tayo ira. Kanian no mansalita iray ondedengel ed sikayo, agkayo manapurastan ipawil ed imparaan yon presentasyon. Masimoon a komendaan ira no nagawaan yo, tan iyadapta iray komento yo ed ibabaga ra. No napatnagan ed saray komento ra so kapapagaan da, iyadapta so presentasyon yo pian naikdan na imano iray kapagaan da.
5 Say kauyamoan tan kaabebaan na nonot so manggawa ed pitatalosan a marakep. (Uli. 11:2; Gawa 20:19) Asagyat iray totoo ed si Jesus lapud sikato so ‘mauyamo tan mapaabeba ed puso.’ (Mat. 11:29) Diad biek a dapag, say pabidbir a walna so mamaatap. Kanian, anggaman sigpot itayon kombinsido a walad sikatayo so katuaan, makabat a paliisan tayo so mansalitan singa mamaong.
6 Panon to no napatnagan ed saray komento na too iray sisiaen ya agmitunosan ed ibabangat na Biblia? Kasin obligasyon tayo a sikatoy korihien? On, diad saginonor, balet agtayo nakaukolan a gawaen so ontan diad unonan dalaw. Mabetbet a maabig so pamalaknab ed saray ideya a pipaknaan tayo ed saray dumerengel tayo, antis ya inabang iray bangat ed Biblia a mairap ton awaten. Mankakaukolan iya na anos tan inkamataktika. Si Pablo so angiletneg na maabig ya ehemplo ed sayan pamaakaran sanen manpupulong ed saray ukom diad Areopago.—Gawa 17:18, 22-31.
7 Nagkalalo ed amin, say andi-siblet ya aro so ontulong ed sikatayo pian magmaliw ya epektibon mitatalosan. Singa si Jesus, kaukolan ya abageyen tayo iray totoo a ‘maermen tan abuybuyak, a singa saray karnero ya anggapoy pastol.’ (Mat. 9:36) Saya so manenyeg ed sikatayon ipasabi so maong a balita tan tulongan iran makaromog ed dalan a mamaarap ed bilay. Say mensahe tayo et mensahe na aro, kanian itultuloy tayon ipasabi iya diad maaron paraan. Diad panggawa ed saya, aaligen tayo si Jehova a Dios tan si Jesu-Kristo—saray sankamanunaan a Mitatalosan ed uniberso.