Pitatalosan ed Kristianon Ministeryo

“Onla kayo sirin tan manggawa na babangatan ed amin a nasyones.”​—MATEO 28:19.

1. Anton kimey so inter nen Kristo a mangipanengneng na pankaukolan na pitalosan?

SAY kimey nen Jesus, a nisulat ed tagey, so mangipaparungtal ed sikatayo na angat diad pitatalosan ed totoo ed ministeryo tayo leleg a mankabkaabungan, manggaway panagpawil, tan mibiang ed amin ya arum a nengneng na panagpulong na Panarian. Nitekep ed satan a kimey et say responsabilidad a mangipakabat na katuaan nipaakar ed si Jehova a Dios, si Jesu-Kristo, tan say Mesianikon Panarian a manuuley la natan si Jesus.​—Mateo 25:31-33.

2. Pian epektibon tuloy a mitalosan, anto so nakakaukolan tayo?

² Panon so pitalosan tayon epektibon tuloy? Ununa, nepeg tayon panisiaan so impormasyon ya ipapasabi tayo. Diad arum iran salita, nepeg a walaan itayo na mabiskeg a pananisia a si Jehova so sakey a tuan Dios, a say Biblia so peteg a Salita na Dios, tan say Panarian na Dios so mogmon ilalo parad katooan. Diad satan a dalan, say ibabangat tayo so manlalapud puso, tan sikatayo so makatumbok ed konseho nen Pablo ed si Timoteo: “Seetan mo a sikukuli so ompatnag a naabobonan ed arap na Dios, a singa tometeger ya anggapo so ibaing to, ya agamilen a maptek so salita na katuaan.”​—2 Timoteo 2:15.

Agsinalitan Pitatalosan

3-5. (a) Panon tayon mitalosan ya andi-esel? (b) Anto iran eksperiensia so mangipatnag ed saya?

³ Mabetbet a sasaglawien na pitatalosan iray salita. Balet, diad tua, mitatalosan tayo ed totoo anggan sakbay a mitongtong tayo ed sikara. Panon? Diad panamegley na alagey tayo tan diad dalan na panangawes tayo tan panag-ayos ed inkasikatayo. Pigaran taon ed apalabas sakey a nangraduar a misionero ed Watchtower Bible School of Gilead so manbabaroy diad panamegley na barko a mamaarap ed biek-taew ya asainmin to. Kayari na pigaran agew ed dayat, sakey ya estranghero so nantepet ed sikato no akin a sikato so ontanlan duma ed amin na saray wadman. Mitatalosan so misionero ed sakey a makanakanan bengatla​—a sikato so walaan na duman estandarte tan sikato so mainomay ya asinggeran​—​dia lambengat ed itsura tan awawey to. Saya so angilukas na maabig a pankanawnawa parad misionero a mantasi.

⁴ Lamet, sakey ya agin bii a mananalagey ed lansangan a mangoopresi na literatura na Biblia ed saray ondadalan so makaaron inmimis ed sakey a bii a dinmalan ed abay to. Sayan bii so onlalasor ed takayan a mamaarap ed estasyon na tren. Kabekta anguman so isip to, pinmawil ed agin bii, tan kinmerew na panangiyaral na Biblia. Anto so akasagyat ed sikato? Anggaman sikato so agnaopresian na literatura na Biblia, sikato so akaawat na makaaron imis a nanlapud Tasi a mantatasi ed lansangan.

⁵ Say komatlon alimbawa: Sakey a grupo na tobonbalon Tastasi so angan ed sakey a karinderia tan asurpresa ra sanen sakey ya estranghero so inmasingger ed lamisaan da tan nambayar parad kanen da. Akin a ginawa to iman? Sikato so asagyat ed awawey da. Diad agpansasalita ed estranghero, impaamta na sarayan tobonbalon Kristiano a sikaray matakot-ed-Dios iran sinansakey. Malinlinew, diad panamegley na alagey tayo, indengan, tan inkamakaaro, mitatalosan tayo anggan sakbay na pansalita tayo.​—Ipareng so 1 Pedro 3:1, 2.

Pikakatunongan Makana ed Pitatalosan

6. Iyilustra no panon a say pikatunongan et makanakana ed pitatalosan.

⁶ Pian mitalosan a berbal ed totoo nipaakar ed maong a balita, nepeg tayon akaparaan, ya agmansalitan dogmatiko, balet mikatunongan ed sikara. Naulit-ulit a nabasa tayo a si Pablo so akikatunongan ed saraman so panguggunaetan ton panginabangan na maong a balita. (Gawa 17:2, 17; 18:19) Panon tayon natumbok iyan alimbawa to? Bueno, say onuuges a kipapasen na mundo so nayarin angitonton ed arum a manduaruwa ed kiwawala na sakey a makapanyarin-amin tan maaron Dios a manasikaso parad katooan. Anggaman kuan, nayarin mikatunongan tayo ed sikara, a say Dios so walaan na panaon ed amin a bengatla. (Eclesiastes 3:1-8) Sirin, ikuan na Galacia 4:4 a sanen sinmabi so nigeter a panaon na Dios, imbaki to so Anak to ed dalin. Saya so nilibon taon kayari na impangisipan to a gawen to itan. Mipadpara sano onsabi so nigeter a panaon to, panganggaen to so kairapan tan karelmengan. Niarum ni, ipanengneng na Salita na Dios a say Dios so walaan na inkapilitan iran rason ed pangiyabuloy a mantultuloy a mabayag so karelmengan. (Ipareng so Exodo 9:16.) Say pangikatunongan ed ontan a panmoria, tan panuporta ed satan a katunongan ed saray ilustrasyon tan mabiskeg a Makasulatan a prueba, so makatulong ed saray masimoon a makamta a say ondadaak a karawalan so agnausar a bilang sakey ya argumento a si Jehova so anggapo odino agmanatalima.​—Roma 9:14-18.

7, 8. Panon a nayarin say pikatunongan et makatulong ed sikatayon mitalosan ed sakey a Judion Ortodoks?

⁷ No bilang ta diad pankabkaabungan yo et ikuan na sakey ya unabong ed sikayo: “Siak so sakey a Judio. Agak interesado.” Panon so panggapo yo? Sakey ya agin laki so angireport na impakatalona ed impangusar na sayan panangigapo: ‘Maseguro ak a mikasakey kayo ed siak a si Moises so sakey ed sankabalgan iran propeta ya inusar na Dios. Tan agyo ta amta ya inkuanto unong a nikurit ed Deuteronomio 31:29: “Ta amtak a kayari ipatey ko . . . et onsian kayo ed dalan ya inbilin ko ed sikayo et say kaugsan nagawa naani ed sikayo”? Si Moises so tuan propeta, kanian saray salita to nepeg ya ontua. Kasin satan so tinmua sanen imbaki na Dios so Mesias ed saray Judio tan satan no akin a sikatoy ag-inawat na saray Judio? Nayarin ontan so kipapasen. Natan no ontan tan akagawa ra na lingo, kasin satan so rason no akin a sikayo tan siak so manggawa na parehon lingo.

⁸ Nonoten, met, a saray Judio so nanirap a maong ed saray lima na Kakristianoan, nagkalautla legan na sayan siglo. Kanian kaliktan yo ya ibaga ed unabong a sikatayo so agkabiangan na satan. Alimbawa, nayarin kaliktan yon ikuan: ‘Agyo ta amta a sanen si Hitler so wala ed pakayari, saray Tasi nen Jehova so angikaindan ed impamatey to ed saray Judio? Sikara met so angitalirak a mangikuan na “Heil Hitler” tan manlinkor ed armada to.’a

9, 10. Panon a nayarin nausar so pikatunongan ya ontulong ed sakey a mananisia ed impernon-apuy?

⁹ Diad pambabanikel a mitalosan ed sakey a manisia ed impiernon-apuy, nayarin mikatunongan kayo a no say sakey ya indibidual so manirap a magnayon ed impierno, nepeg a sikato so walaan na ag-ompatey a kamarerwa. Say mananisia ed impiernon-apuy so maseguron mikasakey. Insan nayarin saglawien yo so salaysay na inkapalsa nen Adan tan Eva tan sipapangasin kerewen ed sikato no naimano to a diad satan a salaysay et asaglawi so ontan ya ag-ompatey a kamarerwa. Diad pangitultuloy na pikatunongan yo, nayarin natangguyor yo so imano to ed Genesis 2:7, no iner ya ibabaga ed sikatayo na Biblia a si Adan so nagmaliw a kamarerwa. Tan imanoen no anto so inkuan na Dios ed pansumpalan na kasalanan nen Adan: “Diad linget na lupam so panganan mo na tagano ya angga ed ipawil mo ed dalin, ta sikato so angalaan ed sika. Lapud sika et dabok ka dia ed dabok ompawil ka.” (Genesis 3:19) Sirin, si Adan a kamarerwa so pinmawil ed dabok.

¹⁰ Nayarin natangguyor yo met so imano ed katuaan ya agnaromog ed salaysay na Genesis a saglawien na Dios so andi-anggaan a panamairap ed impiernon-apuy. Sanen pinasakbayan na Dios si Adan ya agmangan ed isesebel a bunga, inkuanto: “Diad agew na pangan mo seguradon ompatey ka.” (Genesis 2:17) Anggapo so impamitla ed impiernon-apuy! No say peteg a pansumpalan ed kasalanan nen Adan et aliwan patey, ya ‘ipapawil ed dabok’ maandon panamairap, agta makatunongan lambengat a saya komon so impaliwawa na Dios a malinlinew? Kanian, say maalwar tan maabig a pikakatunongan so makatulong ed sakey a masimoon ya indibidual ya onnengneng ed andian na basiyan a pananisia to. Agtayo komon mangikaindan ed kaimportantian a mikatunongan legan ya inanabang tayo ed arum so katuaan na Salita na Dios.​—Ipareng so 2 Timoteo 2:24-26; 1 Juan 4:8, 16.

Nakakaukolan a Kalidades ed Epektibon Pitatalosan

11-13. Anto iran Kristianon kalidades so makatulong ed sikatayo ya epektibon mitalosan?

¹¹ Natan, antoran kalidades so nepeg tayon bayuboan ta pian nipasabi iray katuaan ed Panarian a sankaepektiboan? Bueno, anto so ibabaga ed sikatayo na alimbawa nen Jesus? Diad Mateo 11:28-30, nabasa tayoray salita to: “Dago kayo, sikayon nasasagpotan tan nabebelatan et ikdan ta kayo na pampainawa. Ala yo so pakok tan manaral kayo ed siak, ta mauyamo ak tan mapaaeba ak ed puso et naromog yo so inawa parad saray kamarerwa yo. Ta say pakok mainomay tan anlemew so awit ko” Ditan nanengneng tayo so sakey ed saray tumbok ed impanalona nen Jesus ed pitatalosan. Sikato so mauyamo tan mapaabeba ed puso. Aromog na maptek-impanpuson totoo a sikato so makarepresko. Inletneg met nen apostol Pablo so maabig ya alimbawa, ta, a singa imbaga to ed mamataken ed Efeso, manlapud inmunan agew na insabi to ed sikara, a sikato so impaaripen parad Katawan “tekep na sankaabebaan na nonot.”​—Gawa 20:19.

¹² Diad pangipapatnag tayon lawas na kauyamoan tan kaabebaan na nonot, naromog na arum a sikatayo so makarepresko met, tan magmainomay parad sikatayo so mitalosan ed sikara. Antokaman nin arum ya awawey so nayarin mamalesa na babeng ed baetan tayo tan saraman so panggugunaetan tayon pitalosanan. Petepeteg, “say kakabatan so naromog ed saray mauyamo.”​—Uliran 11:2.

¹³ Pian epektibon tuloy a nipanabang so impormasyon, nakaukolan tayo met so magmaliw a maanos tan mataktika. Seguradon si apostol Pablo so mataktika sanen sikato so nantasi ed saray pilosopon nantitipon ed arap na Pukdol na Mars. Imparungtal to so maong a balita ed paraan a natalosan da. (Gawa 17:18, 22-31) No kaliktan tayo so matalonan mitalosan ed dumerengel tayo, nepeg tayon tumboken so simbawa nen apostol Pablo ya inter to ed saray taga-Colosas sanen inkuanto: “Lawas natekepan na liga so tongtongan yo, tan agbalot magmaliw ya andi-taway; aralen no panon so pitongtong ed balang sakey a toon naabet yo.” (Colosas 4:6, The New English Bible) Say panagsalita tayo so lawas nepeg a walaan na makapasagyat a kalidad. Say ontan a panagsalita so nayarin mangilukas ed saray kanonotan na dumerengel tayo, bangbalet saray agmakanepegan a balikas so sengegan a mangikapot na kanonotan da.

14. Panon a say relaks, konbersesyonal ya iyaasingger so ontulong ed sikatayo a mitalosan ed saray arum?

¹⁴ Labay tayon ompatnag a relaks ed amin a panaon. Saya so ontulong ed dumerengel tayon komportable. Say pagmaliw a relaks et ilaktip to so agpanayarian ed amin a tongtongan. Imbes, tekep na agmanapurastan awawey tan makaaron tepetepet, ikdan tayoray dumerengel tayo na pankanawnawan mangibalikas ed inkasikara. Nagkalautla sano mantasi tayon inpormal a satan so makabat a pasesegen so sananey a mansalita. Sakey ya alimbawa, sakey a Tasi so akaabay na Romano Katolikon pari. Diad masulok lan sakey oras, say Tasi so ag-tinmundan nantepet na mataktikan tepetepet ed pari, tan say pari, diad impangebat, so nansalitan dakel ed tongtongan. Balet diad impansian da, say pari so akala na pigaran palapagan ed Biblia. Say ontan a maanos a pitongtong so makatulong ed sikatayo a mangagamil na sananey a nakakaukolan a kalidad, salanti empatya.

15, 16. Panon ya ontulong ed sikatayo so empatya a mitalosan?

¹⁵ Say empatya so pangipasen tayo ed inkasikatayo ed pasen na saray arum. Nagnap a tuloy a naapresya nen apostol Pablo so pankaukolan parad empatya, unong a nanengneng ed insulat to ed saray taga-Corinto: “Ta anggaman bulos ak ed amin a totoo, inpaaripen ak ed amin, ta pian nagamoran ko so dakel a totoo. Kanian diad saray Judio nagmaliwak a singa Judio, ta pian nagamoran koray Judio; dia ed saray wala ed silong na ganggan nagmaliwak a singa wala ed silong na ganggan, anggan andi ak a dili ed silong na ganggan, ta pian nagamoran koramay walad silong na ganggan. Diad saramay anggapo so ganggan nagmaliwak a singa anggapo so ganggan, anggan anggapo ak ed ganggan na Dios noag walad silong na ganggan nen Kristo, pian nagamoran koramay anggapo ed ganggan. Dia ed saray makapuy nagmaliwak a makapuy, pian nagamoran koray makapuy. Nagmaliwak ya ami ganagana ed amin a nengneng na totoo, ta pian nilaban koray arum.”​—1 Corinto 9:19-22.

¹⁶ Pian naalig si apostol Pablo ed sarayan pamaakaran, nepeg tayo so pagmaliw a mataktika, makatebek, tan ma-obserba. Say empatya so makatulong ed sikatayon mitalosan ed katuaan ed saray dumerengel tayo unong ed kipapasen na kanonotan tan liknaan da. Say palapagan a Reasoning From the Scriptures so mangiter na dakel a tulong ed sayan inkalapagan a kipapasen. Lawas awiten ed minister yo yo.

Aro​—Sakey a Katulongan ed Pitatalosan

17. Diad amin a Kristianon kalidades, dinan so sankakanaan diad epektibon pangipatalos na katuaan, tan panon a satan et nipanengneng?

¹⁷ Say kauyamoan, kaabebaan na nonot, anos, tan empatya so makana ed epektibon pitatalosan diad pangisabi na impormasyon. Anggaman kuan, manuna ed amin, say andi-siblet ya aro so makatulong ed sikatayo pian magmaliw a matalona ed pakasabi ed puso na arum. Si Jesus so walaan na panangabagey ed totoo lapud sikara so “maermen tan abuybuyak ira a singa saray karnero ya andian na pastol.” Say aro so amakiwas ed si Jesus a mangikuan: “Dago kayo, sikayon nasasagpotan tan nabebelatan, tan itdan ta kayo na pampainawa.” (Mateo 9:36; 11:28) Lapud aro tayo ed sikara a labay tayo met a narepreskoan iray totoo tan tulongan ira a makaloob ed dalan na bilay. Say mensahe tayo so aro, kanian mantultuloy tayo komon a mangipasabi ed satan ed maaron dalan. Nipatnag iyan aron mismo diad panamegley na makaaron imis, diad kaabigan tan inkamagalang, diad liket tan ligsa.

18. Panon tayon naalig si Pablo, unong ya impangalig to ed Katawan?

¹⁸ Diad sayan pamaakaran si apostol Pablo so sakey a maabig a manangalig ed Katawan to, si Jesu-Kristo. Akin a sikato so ontanlan matalona ed panangigapo na kongregasyon a mantutumbokan? Lapud seseg to? On. Balet ontan met lapud aro ya impatnag to. Imanoen iray balikas na aro ed balon kongregasyon diad Tesalonica: “Nagmaliw kamin mauyamo ed pegley yo, a singa sakey a sigsiwa a managano na dilin anak to. Kanian, maibibeg kami a mangaro ed sikayo, apaliket kami a tuloy a mangipanabang ed sikayo, aliwa lambengat a say maong a balita na Dios, noagta ontan met saray dilin kakamarerwa mi, lapud nagmaliw kayon sankablian ed sikami.” Say pangalig ed si Pablo so makatulong ed sikatayo ed saray sagpot tayo ed pitatalosan.​—1 Tesalonica 2:7, 8.

19. Akin ya agtayo abuloyan so ag-onkiwas a teritorya a manismaya ed sikatayo?

¹⁹ No ginawa tayo so angaay nayarian tayo a mitalosan tan sinmaew tayon nadampot so panpipilalekan iran pansumpalan, kasin nadismaya tayo? Aliwan ontan. Saray Bible Students (a singa datin tawag ed saray Tasi nen Jehova) so angikuan a pian naawat so katuaan, kaukolan na totoo a nawalaan na ‘taloran kalidades’. Nakakaukolan a sikara so magmaliw a matua, mapaabeba, tan naerasan ed espiritual. Agtayo nailaloan iray agmasimoon a totoo, saramay agmatua, ya onebat a paborable ed katuaan; nisay nailaloan tayo iray mapaatagey tan makinon ya indibidual ya ontalineng ed maong a balita. Niarum ni, anggano say sakey ya indibidual et walaan na sakey a sukat na inkamatua tan inkamaapabeba, agnailaloan a sikato so mangawat ed katuaan no sikato so agnaeerasan ed espiritual.

20. Akin a lawas a nikuan a saray sagpot tayo so aliwan andi-kana?

²⁰ Agpanduaruwaan a dakel ed naaabet yo ed teritorya yo et onkulang na sakey odino dakel ni ed ‘taloran kalidades’. Walaan na parehon eksperiensia si propetan Jeremias. (Jeremias 1:17-19; ipareng so Mateo 5:3.) Siansian, saray sagpot tayo so agbalot andi-kana. Akin ya andi? Lapud sikatayo so mangiyaabawag ed ngaran nen Jehova tan Panarian. Diad panamegley na panpulong tan diad mismon kiwawala tayo ed teritorya, sikatayo so mamapasakbay ed mauges. (Ezequiel 33:33) Tan agbalot lilingwanan a diad panamegley na saray sagpot tayo a mangipasabi na katuaan ed saray arum et nabenipisyoan tayo so inkasikatayo. (1 Timoteo 4:16) Napansiasiansia tayon mabiskeg so pananisia tan ilalo tayo ed Panarian a maliwawa. Niarum ni, napansiansia tayo so katooran tayo tan sirin minabang ed panangalangon ed ngaran nen Jehova a Dios, a napaliket so puso to.​—Uliran 27:11.

21. Anto so nikuan ed segek?

²¹ Diad pansegek: Say pitatalosan so epektibon panangipasabi na impormasyon. Say dunong na pitatalosan so makana, tan baleg a desyang so pansumpalan sano onsaew ed pitatalosan. Anengneng tayo a si Jehova a Dios tan si Jesu-Kristo so manunaan a mitatalosan tan si Jesu-Kristo so angiganggan na paralanan na pitatalosan ed agew tayo. Naimano tayo met a diad panagkawes tan awawey tayo et mitatalosan tayo, a mangipapasabi na saray mensahe ed saray arum. Walan naaralan tayo a walaan na importantin betang so pikakatunongan ed panggunaet tayon mitalosan ed totoo tan diad epektibon pitalosan, nakaukolan tayo so magmaliw a mauyamo, tan mapaabeba, mangipatnag na empatya, mangagamil na anos, tan manuna ed amin, nabayuboan na sakey so puson napno na aro. No bayuboan tayorayan kalidades tan tumboken iray alimbawa ed Biblia, sikatayo so magmaliw a matalonan Kristianon mitatalosan.​—Roma 12:8-11.

[Paimano ed leksab]

Panon so Pangebat Yo?

◻ Diad anton dalan ya onggapo so pitatalosan sakbay na pansalita?

◻ Anto iray arum ya alimbawa na pitatalosan diad panamegley na epektibon pikatunongan?

◻ Anto iran kalidades so nanggawa ed si Jesu-Kristo tan si Pablo a mitalosan ya epektibo?

◻ Akin ya agtayo nadismaya no saray resulta so matantan?