Panon Kabayag Ni so Anos na Dios?

TALON libon taon la so apalabas, ya insulat na sakey a makabat a toon: “Inuleyan na too so too ed kasakitan to.” (Eclesiastes 8:9) Nanlapulad impakaimano to ed satan, ag-inmaligwas iray kondisyon. Diad loob na awaran, saray sinansakey odino grupo so walan anamsam ed pakayari, sakey kayari sananey, a manguuley tan mangaanamot ed arum a totoo. Siaanos a nansungdo si Jehova a Dios ed saya.

Manaanos si Jehova ambegyan saray gobierno so responsabli ed ipapatey na nilaksalaksa nisesengeg ed bakal tan mangiyabuloy ed alablabas ya ekonomikon ag-inkahustisya. Natan, sikato nin siansia so mangaagamil na anos legan a dederalen na totoo so ozone layer na Dalin tan dudutakan so atmospera tan dayat. Agaylan makapasakit ed sikato a nanengneng so inkaderal na maabig a mabungan dalin tan say andi-kabaliksan a panagderal ed saray takel tan mabilay ya atap!

Akin ya Ontanlan Maanos so Dios?

Say sakey a simplin ilustrasyon so makatulong ed sikatayon onebat ed sayan tepet. Ipasen pa so epekto ed negosyo sano maparanay ya onsabin atrasado so sakey ya empleyado. Anto so nepeg a gawaen na akankayaryan? Say simplin inkaalas so mankaukolan ed sikaton mangekal a tampol ed empleyado. Balet nayarin nanonotan to so uliran ed Biblia: “Saman so matantan a manpasnok so daakan na pakatebek, balet saman so maigagano ya espiritu paatageyen to so inkaatiw.” (Uliran 14:29) Lapud pakatebek sikato so manalagar sakbay ya onkiwas. Nayarin desidien ton mangiyabuloy na panaon parad kipasal na kasalat ta pian say negosyo et aglalon nalugi.

Say pililikna so mamaalagar met ed sikato. Akin ya agpasakbayan so mapaulyan ya empleyado a mamasimbalo ed awawey to? Akin ya agmitongtong ed sikato tan amtaen no kasin say niugalin inkaatrasado to et lapud sakey a probleman nasolbar odino ed agnatambal a mauges ya awawey? Anggaman nadeside na akannegosyo a mangagamil na anos, say anos to so limitado. Say empleyado so balanglan mamasimbalo odino diad kaunoran et nidunget ed pakaekal. Maptek lambengat itan ed negosyo a mismo tan ed saray empleyadon manutumbok ed saray ganggan.

Diad mipadparan dalan, mangaagamil si Jehova na anos sano niarap ed mauges a gawa ta pian mangiyabuloy na panaon diad pakakimey na maptek a solusyon ed pigaran problema. Niarum ni, say anos to so mangiter ed saray managgaway mauges na pankanawnawan mamasimbalo ed saray dalan da tan makagamor na maandon gungguna. Kanian, papasesegen itayo na Biblia a manliket ed anos na Dios. Imbes, inkuanto: “Ipasen so anos na Katawan tayo a bilang kilalaban.”​—2 Pedro 3:15.

Sakey ya Alimbawana Anos na Dios

Si Jehova a Dios so nananos sakbay na baleg a Delap ed agew nen Noe. Say mundo ed saman a panaon so napno na karawalan tan marelmeng a tuloy. Nabasa tayo: “Anengneng nen Jehova a say kaugsan na too so daakan ed dalin . . . Kanian inkuan nen Jehova: ‘Pagiten koray totoon pinalsak ed tapew na dalin.’” (Genesis 6:5, 7) On, wala ed kanonotan nen Jehova so ultimon solusyon ed probleman karelmengan nen saman: say kaekal na marelmeng a totoo. Balet agto kinmiwas a tampol. Akin ya andi?

Lapud aliwan amin so marelmeng. Si Noe tan say pamilya to so matunong ed mata na Dios. Kanian parad pankaabigan da, nanalagar a siaanos si Jehova pian abuloyan iray pigaran matunong a sinansakey a manparaan parad kilalaban. Niarum ni, satan ya andukey ya impanalagar so angiter ed Noe na pankanawnawan magmaliw a “managpulong na inkatunong,” a mangiiter ed marelmeng a totoo na pankanawnawan mamasimbalo ed saray dalan da. Ikuan na Biblia: “Say anos na Dios so nanalagar ed saray agew nen Noe, legan a nipapaalagey so biung, a daiset a totoo, salanti, waloran kakamarerwa, so nilaban ed danum.”​—2 Pedro 2:5; 1 Pedro 3:20.

Akin a Maanos Natan so Dios

Natan, mipadpara so kipapasen. Say mundo so napno lamet na karawalan. A singa ed agew nen Noe, walan inukom la na Dios iyan mundo, ya ikuan na Biblia, ya “angigeter na agew na panangukom tan ed kadederal na agmaridios a totoo.” (2 Pedro 3:7) Sano nagawa itan, anggapo la so panagderal na kaliberliber, panaglames ed duka, odino maagum a panangabuso ed pakayari.

Sirin, akin ya agla dineral na Dios nensaman so agmaridios a totoo? Lapud walara so salisalan a resolbien tan importantin pamaakaran ya iyuksoy. Peteg, a mamapaarap si Jehova ed permanentin solusyon ed probleman karelmengan a mangilalanor ed dakel iran bengatla, a pati say pangilaban ed maptek-impanpuson totoo manlapud panangaripen na sakit tan patey.

Tekep na resultan asaglawi ed sampot na unor a parapo diad kanonotan, ginagala nen Jehova a mangitarok na Manangilaban a mangopresi na dondon parad saray kasalanan tayo. Nipaakar ed sikato, ikuan na Biblia: “Ontanla so panangaro na Dios ed mundo ya imbaki to so bogbogtong ya Anak to, ta pian amin a mangagamil na pananisia ed sikato so agnaderal noag ingen nawalaan na andi-anggaan a bilay.” (Juan 3:16) Nankaukolan na niliboran taon pian iparaan so dalan nen Jesus pian onsabi tan ibagat to so bilay to ed biang na katooan. Legan na saratan a taotaon, siaaron nananos so Dios. Balet agta say ontan a probisyon et makanan alagden?

Intarok nen Jesus so dondon parad katooan ed ngalngalin duan libon taon ed apalabas. Sirin, akin, a siansian mangaagamil na anos so Dios? Bilang sakey lambengat a rason, say impatey nen Jesus so ananda na gapoan na sakey ya edukasyonal a kampanya. Nakaukolan a naaralan na katooan iyan maaron probisyon tan naitdan na pankanawnawan awaten odino ikaindan itan. Mankaukolan itan na panaon, balet satan so panoan a nausar a maong. Ikuan na Biblia: “Si Jehova so agmatantan a manumpal ed sipan to, anggaman ikunsidera na arum a totoo so inkatantan, balet sikato so maanos ed sikayo lapud agto kaliktan a siopaman ed sikayo so naderal balet kaliktan ton nadampot yon amin so panagbabawi.”​—2 Pedro 3:9.

Say Salisalan na Gobierno

Sananey nin importantin bengatla so mangala met na panaon. Wala so pankaukolan a resolbien so problema ed gobierno na katooan. Nen inmuna, say too so walad silong na madibinon gobierno. Balet diad tanamanan na Eden, a say inmunan ateng tayo so angitalirak ed satan. Pinili da so pagmaliw ya independenti ed Dios, a labay dan uleyan so inkasikara. (Genesis 3:1-5) Anggaman kuan, peteg ya agpinalsa so too ya uleyan to so inkasikato. Insulat na propetan Jeremias: “Kabat ko, O Jehova, ya anggapo ed mangaraldalin a too so dalan to. Anggapo ed too a manakar a mangitonton ed basbas to.”​—Jeremias 10:23; Uliran 20:24.

Anggaman ontan, lapud say salisalan na gobierno so apalesa, siaanos ya angiyabuloy si Jehova na panaon a manresolbe ed satan. Peteg, sikato so sibubunlok ya angiyabuloy na nilibon taotaon ed too a manali ed amin a nanonotan a nengneng na gobierno. Diad anton nansumpalan? Mabitar ya anggapo so gobierno na too a makaekal ed kairapan, ag-inkahustisya, o arum a sengegan na kaermenan.

Peteg, nipaakar ed atooan ya awaran, wala kasi so siopaman a peteg a makapangibaga a say Dios so agmaptek sanen inyabawag to so getma to a mangekal ed amin ya atooan a gobierno tan salatan iratan ed sakey a kien to? Maseguron andi! Positibon tuloy ya abrasaen tayo so kasumpalan na sayan propesiya ed Biblia: “Diad agew na saraman ya arari say Dios na tawen so mangiletneg na sakey a panarian ya agbalot naderal. Tan satan a panarian a mismo so agniiter ed siopaman ya arum a totoo. Mekmeken to tan panganggaen to so amin na sarayan panarian, tan sikaton mismo so ontalindeg ya ando lan ando.”​—Daniel 2:44.

Say mangatatawen ya Ari na satan a Panarian so say apaolin Jesus. Say kipaparaan to ed satan a posisyon​—tan ontan met ed panpili ed totoon kaiba ton manuley​—so nankaukolan na panaon. Legan na satan ya amin a panaon, walan angagamil na anos so Dios.

Gungguna Natan Manlapud Anos na Dios

Natan, minilyon iran sinansakey ed ag-onkulang a 212 daldalin so nagugunggunaan ed anos na Dios. Nankakasakey ira ed pilalek dan mangunor ed Dios tan manlinkor ed mangatatawen a gobierno to. Sano sikaray mantitipon ed Kingdom Halls da, naaralan da no panon a magmaong so pangiyaplika ed saray prinsipyo na Biblia ed bilay da. Sikaray agmibibiang ed saray naapag-apag a politiko na sayan mundo, anggaman pauleyan da so inkasikara ed atooan iran gobierno legan a siaanos ya aabuloyan na Dios irayan onkurang.​—Mateo 22:21; Roma 13:1-5.

Say ontan a pikokoopera ed limog na ontanlan dakel a totoo so mangialangon ed si Jehova a bilang say Sakey a makapangitarok na pantutunusan ed limog na totoo a tekep na bulos a linawan manaral a mangaro ed sikato tan malabay a manlinkor ed sikato. Agpanduaruwaan ya akaabet kayo la na sarayan totoo legan ya itutultuloy da so parehon kimey ya inggapon mismo nen Jesus, salanti say panagpulong na maong a balita na Panarian na Dios. Impasakbay nen Jesus so pantok na sayan kimey sanen inkuanto: “Sayan maong a balita na panarian so nipulong ed amin a panaayaman ed dalin a pantasi ed amin a nasyones; insan onsabi so anggaan.”​—Mateo 24:14.

Agla Manbayag!

Say nanengneng ya ebidensya so mamaneknek a saray oksuy parad matunong a gobierno na Dios ya onsalat ed inagew-agew ya uley na dalin so ngalngali lan nakompleto. Kayarin impaneskribe ed teriblen nansumpalan na insaew na atooan a gobierno a walan anengneng tayo legan na sayan siglo, inkuan nen Jesus: “Sano nanengneng yolarayan bengatla, kabaten yo a manasingger la so panarian na Dios.”​—Lucas 21:10, 11, 31.

Asingger la, ya ekalen na Dios so marelmeng ed mangaraldalin ya eksena. Saray salita na salmista so walaan na literal ya inkausar: “Ta saray managgawa na mauges napater ira . . . Ta wala ni so daiset et say bagel onandi la; tan peteg ya imanoen mo so pasen to et onandi.” (Salmo 37:9, 10) Naisip yo ta so mundon andian na karelmengan? Siopa sirin so mangimaneho ed saray kurang na katooan? Ikuan na Biblia: “Nia sakey ya ari [nitronon Kristo Jesus ed katawenan] so manari naani ed kaptekan; tan nipaakar ed saray prinsipe [saray matoor a tinuro ed dalin], manuley ira naani a bilang priprinsipe ed inkaalas a mismo. Et say gawa na inkatunong sikato naani so deen et say kasumpalan na inkatunong, inkaulimek tan kaligenan lawas. Et say baley ko manayam naani ed mareen a panagayaman tan dia ed maligen a paspasen tan dia ed saray mareen a panpainawaan.”​—Isaias 32:1, 17, 18.

Sirin, say mangatatawen a gobierno na Dios so mangekal ed mauges iran epekto na kasalanan na too tan organisaen iramay maniilalo ed Sikato ed sakey a nantutunosan a sosyedad na too. Isasalaysay iyan pantutunosan, ikuan na Biblia: “Et say lobo miayam naani ed kordero, tan say leopardo so miakdol ed kilaw na kanding, tan say kilaw na baka tan kilaw na leon tan say pinataban ayep so mantitipon ira; tan sakey a melag ya ugaw so mangitonton ed sikara . . . Ag-ira naani mamaunong odino mamagbag dia ed amin a masanto a palandey ko; ta say dalin napano naani ed pikakabat ed si Jehova a singa saray danum sakbongan da so dayat.”​—Isaias 11:6-9.

Agaylan makapakelaw a pansumpalan manlapud pangagamil na Dios na anos! Sirin, imbes a manreklamo a say Dios et abayag lan manaalagar, akin ya aglaen a bentaha so anos to a pauleyan so inkasikayo ed Panarian to? Aralen manlapud Biblia no anto iray estandarte to tan mitukoyan ed saratan. Milimog ed saray arum a mikakasakey a pauleyan ed sikato. Diad ontan, say anos na Dios so mansumpal ed andi-anggaan iran bendisyon parad sikayo.