Kasin Makapan-anos Ka?

IMBAGA nen Jehova ed si Abram: “Paway ka dia ed dalin mo, . . . ed sakey a dalin ya itorok ed sika. Tan dia ed sika so pangawaan ko na sakey a baleg a nacion, tan papalaren ta ka, tan gawaen so ngaran mo ya abalbaleg.” (Genesis 12:1, 2) Si Abram so mantaon na 75 ed saman. Sikato so tinmulok tan sikakabat a nananos ed nakekeraan a kabiangay bilay to, a nanalagar ed si Jehova.

Diad kaunoran, onia so sipan na Dios ed maanos ya Abraham (Abram): “Tua a bendicionan taka naani a bendicionan, tan parakelen ta ka naani a parakelen.” Inyarum nen apostol Pablo: “Et ontan, a kayari inpanalagar [nen Abraham] a siaanos, agamoran to so sipan.”​—Hebreos 6:13-15.

Anto ta so anos? Say uker na saya ed saray diksyunaryo et say abilidad a “kalmadon panalagar ed sakey a bengatla” odino pangipatnag “na anos ed silong na panagpasyodot odino panamaskar.” Kanian say anos so niiyan ed subok sano kaukolan mon manalagar ed siopaman odino ed sakey a bengatla, odino sano sika so napapasyodot odino napapaskar. Diad saratan a situasyon, say maanos a too so mansiansian mapalna; say agmaanos so magmaliw a manapuratsa tan naalipanesan.

Say Agmaanos a Modernon Mundo Tayo

Nagkalautla ed dakel a lugar ed syudad, say nidadanet et aliwan say anos noagta say peles. Para’d minilyon a totoon manbibilay ed apusek iran syudad, balang agew so ongagapo sano ontanol so alarma na relo ed kabuasan. Ditan onggapo so apuraan ya ikiwas​—pian makasabi ed sakey a lugar, pian minengnengan ed sakey a too, pian makapanggawa na sakey a bengatla. Pankelawan ta a dakel so naaburido tan agmakaanos?

Kasin sika so nagonigon sano nidunget ed saray lingo na arum? “Agko labay so naatrasado,” kuan nen Albert. Dakel so mipakna a say panalagar ed siopaman ya agsinmabi ed oras so mamalesa na gonigon, nagkalautla no wala so deadline a nepeg ya aboten. Onia so nibaga nipaakar ed Duke na Newcastle, sakey a pulitikon taga Britanya nen koma-18 a siglo: ‘Nadadarak to so kapalduay oras na kabuasan, ya uusilan to so nakekeraan a kabiangan na sanagew tan agto naosilan itan.’ No sika so mandependi ed ontan a too ed inagew-agew, mansiansia ka tan maanos?

Sano manmamaneho na auto, kasin sika so mainomay a naingongotan, a masuyat a manalagar, odino natutukso kan manmanehon paspas? Diad ontan iran sirkumstansya, say agpakaalagar so mabetbet a mamalesa na desyang. Nen 1989, ed datin Bukig ya Alemanya, masulok ya 400,000 ya aksidente ed haywey so nansumpal ed inkarisgo odino impatey. Diad saraya, 1 ed kada 3 so lapud panagmanehon akatotok odino lapud masyadon paspas. Kanian, anggaman panon sirin et say pagmamaliw ya agmakaalagar so sengegan na inkarisgo odino impatey na masulok a 137,000 a totoo. Agaylan baleg a kantidad para’d kaandiay anos!

“Naiirapan ak a mananos sano walay manaabala ed siak a naynay,” so reklamo nen Ann, “odino say sakey so malastog a tuloy.” Aksobien nen Karl-Hermann a say anos to so naangat lapud agpanagrespeto na “saray kalangweran ed saray maedad la.”

Saraya tan arum niran situasyon so nayarin magmaliw a sengegan na pakabalang mo na anos. No ontan, panon mon bayuboan so nagkalalon anos?

Napabiskeg nen Jehova so Anos Mo

Dakel a too so manisip a say anos so mangipapanengneng na kaandiay mapekder a panagdesisyon odino kaleteyan. Anggaman ontan, para’d si Jehova, saya so mankabaliksan na biskeg. Sikaton mismo so “masungdo ed sikayo, ag to labay ya wala so siopaman a natawtaw no ag ingen amin komon nagegemtan da so panagsibkel.” (2 Pedro 3:9) Kanian, pian napabiskeg so anos mo, mansiansian maapit ed si Jehova tan manmatalek ed sikato ed interon pusom. Say pamabiskeg ed relayson mo ed Dios so sakey a sankaimportantian a kundang ed pamaaligwas na awawey na anos.

Nagkalalo ni, importanti a naamtaan iray gagala nen Jehova nipaakar ed dalin tan ed katooan. Si Abraham “so manaalagar ed syudad a walaan na saray peteg a letnegan [Panarian na Dios] a say managpaalagey tan managgawa na syudad et say Dios.” (Hebreos 11:10, NW) Mipadpara, makagungguna a pansiansiaen so malinew a panmoria nipaakar ed madibinon sipasipan tan magmaliw a kontenton manalagar ed si Jehova. No ontan et namoriam a say anos, ya agmangipanengneng na inkamasuyat, so aktual a mangingganyo ed totoo ed tuan panagdayew. Kanian, “ibilang yo a sikatoy kilaban so sungdo na Katawan.”​—2 Pedro 3:15.

Anto no diad dilin kipapasen mo et nasusubok a tuloy so anos mo? Kasin saray agmanisia so mamapasyodot ed sikayo? Kasin sika so walaay sakit ed loob la na abayag a panaon? No ontan, ipapuso so insulat nen babangatan a Santiago. Kayari impanukoy ed alimbawan impanengneng na saray propeta ed impagmaliw a maanos, imparungtal to so sekreto na pansiansian kalmado ed silong na aburido. Inkuan nen Santiago: “Wala ta so manasagmak na kaugsan ed sikayo? Pantultuloyen yon manpikasi.”​—Santiago 5:10, 13, NW.

Masimoon a manpikasi ed Dios a pabiskegen tan tulongan to ka a nakontrol so liknaan mo ed silong na subok. Mabetbet a manpikasi ed si Jehova, tan tulongan to ka a naamtaan iray kipapasen odino saray ugali na arum a manisigensigen ed inkapalnam. Say panpikasin akauna ed saray kipapasen a nayarin makasabi ed saray subok so makatulong ed sika a mansiansian kalmado.

Sakey a Suston Panmoria ed Inkasika tan ed Arum

Pian namantine a walaay kalmadon kipapasen ed kanonotan, nepeg mon moriaen so inkasika tan say arum ed dugan paraan. Saya so posibli diad panamegley na panaral na Biblia, lapud ipapanengneng na saya a balang sakey et akatawir na ag-inkayadyari tan sirin et walaay kakapuyan. Sakey ni, say pikakabat ed Biblia so ontulong met ed sika pian onaligwas so arom. Sayan kalidad so kaukolan ta pian magmaliw a maanos ed arum.​—Juan 13:34, 35; Roma 5:12; Filipos 1:9.

Say aro tan say ligsan mamerdona so mamakalmado ed sika sano sika’y napapasnokan. No siopaman so walaay ugalin mamasyodot ed sika, say aro so mangipanonot ed sika a saraman ya ugali so agmo labay, aliwan say too. Nonot mo no kaunongay kabetbet a saray dilin kakapuyan mo so manusubok ed anos na Dios tan seguradon mamaingongot ed arum.

Say suston panmoriam ed inkasika so ontulong ed sikan mananos a manalagar. Alimbawa, kasin sika so nadidismaya lapud insaew mo ed pakadampot na saray pribilihyo ed serbisyo ed si Jehova? Kasin naliliknam a say anos mo so nauupot a singa saray nakekeraan a buer ed panag-orasan? No ontan, tandaan a say baleg a pakabalang na anos et lapud kinon. “Say maanos ed espiritu sikato so magmaong nen say mapangta ed espiritu,” inkuan nen Solomon. (Eclesiastes 7:8) On, say kinon so manunan manangamper ed panamayubo ed anos. Agta tua a say mapaabeban too so makakaromog a mas mainomay so kalmadon panalagar? No ontan, bayuboan so inkamapaabeba, tan diad ontan et mas mainomay mon naawat so inkaabala tekep na kareenan na nonot.​—Uliran 15:33.

Say Anos so Mamawala na Mayaman Iran Tumang

Manunan akabatan si Abraham lapud pananisia to. (Roma 4:11) Ingen, pinabiskeg na anos so pananisia to. Anto ta so tumang to ed panalagar ed si Jehova?

Pinagamoran nen Jehova si Abraham na ombabaleg a panagmatalek. Diad ontan et say ngaran nen Abraham tan saray kailalakan to so nagmaliw a makapanyarin nasyon. Amin a nasyon ed dalin so abendisyonan da so inkasikara diad panamegley na bini to. Si Abraham so kinmanan sangiyan na Dios tan pati ed impagmaliw to a tipo na Manamalsa to. Wala ta so nagkalalon antokaman a babaleg a tumang para’d pananisia tan anos nen Abraham?

“Si Jehova so matamoy a tuloy ed panamabli” ed saray Kristianon siaanos a mansusungdo ed saray subok. (Santiago 5:10, 11, NW) Saratan a sinansakey et pangagayagaan da so malinis a konsiensia ed panggagaway linawa to. No ontan, diad kipapasen mo, no alagaren mo si Jehova tan mananos a mansungdo ed saray subok, say anos mo so mansumpal ed panangabobon tan bendisyon nen Jehova.

Say anos so walaan na maabig a nagawaan ed amin a nengneng na panagbilay. Nalmoan iya na duara ed ariripen nen Jehova, sikara di Christian tan Agnes, sanen nandesi iran manpaknaan. Pinabayag da so pipaknaan lapud respeto ed atateng nen Christian, a mankaukolan na panaon ta pian nakabatan si Agnes. Anto so nagmaliw ya epekto na sayan ginawa ra?

“Diad saginonor mi lambengat naamtan so kaimportantian na anos para’d atateng mi,” salaysay nen Christian. “Say maanos ya impanalagar mi so ag-aneral ed siglaotan min sanasawa. Balet saman so manunan manamabiskeg ed relasyon mi ed atateng ko.” On, say anos so mamawala na mayaman iran bendisyon.

Say anos so mangiyalibansa met na kareenan. Pablien na pamilyam tan kakaarom ya agmo gagawaen a sakey ya isyu so kada kakulangan da. Napaliisan so makapabaing iran nagawgawa lapud inkakalmado tan pakatalos sano alingoy arum. Sakey a proverbioy Intsik so mangibabagan: “Say anos ed kaleganan na pasnok so ontulong ed sikan makaarawi ed sanlasus ya agew na panirap.”

Say anos so mamarakep ed personalidad mo, ya ontulong ed sika pian napansiansiam so arum a maabig a kalidad mo. Pabiskegen to iya so pananisiam, pabayagen to so kareenan mo, tan agto pansigensigenen so arom. Say pagmaliw a maanos so ontulong ed sika a magmaliw a magayaga legan ya aagamilen mo so kaabigan, kamaongan, tan kaumildian. Say pagmaliw a maanos so mamaputel ed biskeg a kaukolan ed pamayubo na andukey-a-panagtepel tan dangka.

Sirin, mananos a manalagar ed kasumpalan na saray sipan nen Jehova, tan sika so maseguron nawalaan na sakey a makapakelkelaw ya arapen. Singa si Abraham, nayarin sika so ‘lapu ed pananisia tan anos, tawiren moray sipasipan.’​—Hebreos 6:12.

[Litrato ed pahina 23]

Say maapit a siglaotan ed si Jehova so ontulong ed sika a mankapan-anos, a singa ed ginawa nen Abraham